کراچی: پاکستانی عمرہ زائرین کو ویزا ملنے میں مشکلات پر سعودی حکام نے کراچی اور اسلام آباد میں ویزا اسٹمپنگ اسٹیکر بھیج دیے، اسٹیکر نہ ہونے سے زائرین عمرہ کی سعادت حاصل نہیں کرپارہے تھے، اب ان کی مشکلات کم ہونے کا امکان ہے۔
اے آر وائی نیوز کے نمائندہ صلاح الدین کے مطابق اے آر وائی نیوز نے عمرہ زائرین کی مشکلات پر خبر نشر کی تھی کہ ویزا اسٹیکر نہ ہونے سے 55 ہزار سے زائد پاکستانی زائرین عمرے کی سعادت پر روانہ نہیں ہوسکے تھے۔
خبر کا نوٹس لیتے ہوئے سعودی حکام نے ہنگامی بنیادوں پر آج ویزا اسٹیکر بھیج دیے ہیں اور آج سے کراچی اور اسلام آباد قونصلیٹ سے ویزوں کا اجرا شروع کردیا گیا ہے۔
انہوں نے بتایا کہ ویزا نہ ملنے سے بیشتر زائرین نے اپنی فلائٹس اور ہوٹل کی بکنگ بھی منسوخ کرادی تھی۔
سعودی حکام کا کہنا ہے کہ انہوں نے ایک لاکھ ویزا اسٹیکر پاکستان بھیج دیے ہیں، 28 گھنٹوں کے اندر ویزا جاری کردیا جائے گا۔
