Tag: عمرہ زائرین

ریاض: سعودی عرب میں آج سے مختلف ممالک سے عمرہ زائرین کی آمد شروع ہوگی۔

تفصیلات کے مطابق مسجدالحرام میں کرونا وائرس کے حوالے سے تمام احتیاطی تدابیر مکمل کر لی گئی ہیں، آج سے عمرہ زائرین کی آمد شروع ہوگی۔

روزانہ 20 ہزار عمرہ زائرین اور 60 ہزار افراد نماز باجماعت ادا کر سکیں گے، ایئر پورٹس، بندرگاہوں، برۤی سرحدی چوکیوں پر زائرین کے استقبال کی تیاریاں بھی مکمل ہو چکی ہیں۔

سعودی عرب پہنچنے پر عمرہ زائرین کو 3 دن آئسولیشن میں رہنا ہوگا، مکہ مکرمہ میں یومیہ 10 ہزار عمرہ زائرین کی بکنگ ہوگی، ایک دن میں 500 گروپس کو عمرہ ادائیگی کی اجازت ہوگی۔

واضح رہے کہ سعودی وزارت حج و عمرہ نے مکہ مکرمہ میں بیرون ملک سے آنے والے عمرہ زائرین کے سفری ضوابط مقرر کیے ہیں، عمرہ زائرین کی ہر بس خود کار نگرانی کے نظام سے آراستہ ہوگی، شاہراہوں پر بس سروس کی سہولت مہیا ہوگی، ہر بس کا ایک ڈرائیور اور ایک اس کا ہیلپر ہوگا۔

بس کے روٹ، منزل اور عمرہ زائرین کے ناموں کی فہرست تیار کی جائے گی، جس میں ڈرائیور اور ہیلپر کا نام بھی درج ہوگا، بسوں میں سینیٹائزر فراہم کیے جائیں گے۔

ریاض: سعودی وازرت صحت کی جانب سے عمرہ زائرین کے لیے اہم مشورے جاری کر دیے گئے ہیں۔

تفصیلات کے مطابق سعودی وزارت صحت نے کہا ہے کہ عمرے کے لیے مکہ آنے والے زائرین کی صحت پر وہ نظر رکھے ہوئے ہیں، مسجد الحرام کے اطراف قائم صحت اداروں میں تمام سہولتیں مہیا کی جا چکی ہیں۔

سعودی وزارت صحت کے ترجمان ڈاکٹر محمد العبد العالی نے عمرہ زائرین کو 4 اہم مشورے بھی دیے ہیں۔

انھوں نے کہا عمرہ زائرین موسمی انفلوئنزا ویکسین سمیت تمام ضروری ویکسین لینے کے بعد مقدس شہر کا رخ کریں۔ کوئی بھی عمرہ زائر دوسرے کی نجی اشیا استعمال کرنے سے پرہیز کرے۔

تمام زائرین حفاظتی ماسک کی پابندی کریں اور اپنے دونوں ہاتھ پابندی سے دھوتے رہیں۔ تمام عمرہ زائرین ایک دوسرے سے محفوظ فاصلہ برقرار رکھیں۔

ادھر مکہ ریجن میں محکمہ صحت کے ڈائریکٹر جنرل ڈاکٹر وائل المطیر کا کہنا ہے کہ اجیاد جنرل اسپتال کے ایمرجنسی وارڈ میں مریضوں اور عمرہ زائرین کے لیے تمام صحت خدمات موجود ہیں، تمام اسپتالوں اور ہیلتھ سینٹرز میں صحت عملہ پوری طرح مستعد ہے۔

وزارتِ صحت کے ترجمان کا کہنا تھا کہ ایک ہزار سے زائد صحت کارکن مطاف جانے والے عمرہ زائرین کے گروپس کو منظم کر رہے ہیں اور حفاظتی تدابیر کی پابندی کرا رہے ہیں۔