فیصل آباد : عمرے کی آڑ میں شہریوں سے منشیات اسمگلنگ کروانے والے گینگ کے مرکزی ملزم شاہ صدام حسین کو گرفتار کرلیا گیا۔

فیصل آباد: ایف آئی اے کمپوزٹ سرکل فیصل آباد نے انسانی اور منشیات اسمگلنگ کے خلاف بڑی کارروائی کرتے ہوئے مرکزی ملزم گرفتار کر لیا۔

ترجمان ایف آئی اے نے بتایا عمرے کی آڑ میں شہریوں سے منشیات اسمگلنگ کروانے والے گینگ کے مرکزی ملزم شاہ صدام حسین کو سپریم کورٹ سے ضمانت قبل از گرفتاری منسوخ ہونے پر گرفتار کیا گیا۔

ترجمان کا کہنا تھا کہ ملزم شاہ صدام حسین نے ساتھیوں کے ساتھ مل کر پانچ افراد پر مشتمل ایک خاندان کو سعودی عرب بھیجا۔ متاثرہ خاندان کو مفت عمرہ کا جھانسہ دیا گیا تاکہ وہ بغیر کسی شک کے سفر کریں۔

مزید پڑھیں : عمرے کی آڑ میں 4 خواتین کی سعودی عرب اسمگلنگ کی کوشش ناکام

ملزم نے خاندان کو ایک بیگ سعودی عرب پہنچانے کے لیے دیا، جس میں منشیات چھپائی گئی تھی۔ سعودی حکام نے بیگ چیک کرکے منشیات برآمد کی اور متاثرہ خاندان کو گرفتار کر لیا۔

ایف آئی اے نے اس کارروائی کو انسانی اور منشیات اسمگلنگ کے خلاف ایک اہم کامیابی قرار دیا ہے اور مزید تحقیقات جاری ہیں۔

کراچی : ایف آئی اے حکام نے 2024 سے اب تک 204 بھکاریوں کی بیرون ملک جانے کی کوشش ناکام بنائی اور دو سو چارافرادکوگرفتار کرلیا۔

تفصیلات کے مطابق عمرے کی آڑ میں بھیک مانگنے کیلیے سعودیہ جانے والوں کے خلاف ایف آئی اے نے گھیرا تنگ کردیا۔

رواں سال 221 افراد کو گرفتار کیا گیا اور چھبیس میں سے صرف 2 ایجنٹس پکڑے گئے۔

امیگریشن حکام نے2024 سے اب تک 204 بھکاریوں کی بیرون ملک جانے کی کوشش ناکام بنائی گئی جبکہ بھیک مانگ کر وطن واپس آنیوالے 269 شہریوں کو کراچی ایئر پورٹ پردھر لیاگیا۔

ایف آئی نے بھیک مانگنے جانیوالوں کے پاسپورٹ بلیک لسٹ میں شامل کرکے بیرون ملک سفرپرپانچ سال کی پابندی عائدکردی ہے جبکہ ذمہ داروں کے شناختی کارڈ اور بینک اکاؤنٹس بلاک کردیئے ہیں۔

فیصل آباد : عمرے کی آڑ میں منشیات اسمگلنگ میں ملوث گروہ کے سرغنہ کو گرفتار کرلیا، ملزم نے متاثرہ خاندان کو ایک بیگ سعودی عرب پہنچانے کےلیے دیا تھا۔

تفصیلات کے مطابق ایف آئی اے کمپوزٹ سرکل فیصل آباد نے کارروائی کرتے ہوئے انسانی اسمگلنگ اور عمرے کی آڑ میں منشیات اسمگلنگ میں ملوث گروہ کے سرغنہ کو گرفتار کرلیا۔

ایف آئی اے نے بتایا کہ ملزم اسرار اللہ کو موچی گیٹ لاہور سے گرفتار کیا گیا، ملزم نے ساتھیوں کےہمراہ 5افرادپرمشتمل ایک خاندان کوعمرہ ویزاپرسعودی عرب بھجوایا۔

ترجمان کا کہنا تھا کہ ملزم کی جانب سے متاثرہ خاندان کو مفت عمرہ کا جھانسہ دیا گیا، ملزم نےمتاثرہ خاندان کوایک بیگ سعودی عرب پہنچانے کےلیےدیا اور بیگ میں ملزم نےمنشیات چھپائی ہوئی تھی۔

سعودی حکام نے منشیات برآمد کرکے پورے خاندان کو گرفتار کرلیا تھا تاہم ملزم کے دیگرساتھیوں کی گرفتاری کیلئے کارروائیاں کررہے ہیں۔

کراچی : کراچی ایئر پورٹ پر عمرے کی آڑ میں بھیک مانگنے جانے والے 10 گداگروں کو گرفتار کرلیا گیا۔

تفصیلات کے مطابق ایف آئی اے امیگریشن نے کراچی ایئر پورٹ پر بڑی کارروائی کرتے ہوئے عمرے کی آڑ میں بھیک مانگنے جانے والے 10 گداگروں کو گرفتار کرلیا۔

حکام نے بتایا گرفتارملزمان میں 7خواتین بھی شامل ہیں ، ٹریول ایجنٹ نے گداگروں کے سفری دستاویزات کا بندوبست کیا۔

ایف آئی اے حکام نے ملزمان سے عمرہ ادائیگی کا بنیادی طریقہ کار پوچھا تو وہ ناواقف نکلے جبکہ مسافروں کے پاس ہوٹل بکنگ کے علاوہ اخراجات کیلئے کوئی رقم بھی موجود نہ تھی۔

دوسری جانب غلط پتہ دے کر سعودی عرب جانیوالی 2 خواتین بھی ایف آئی اے کے نرغے میں آگئیں، ایف آئی اے کے مطابق ملزمہ زرینہ اور شہناز نور نے خود کو سرگودھا کا ظاہر کیا لیکن پاسپورٹ پر جائے پیدائش رحیم یارخان لکھی تھی۔

خواتین نے دوران تفتیش سب سچ بتادیا خواتین پہلے بھی کئی مرتبہ عمرے کے ویزے پر سعودیہ جاچکی ہیں، خواتین کا تعلق بھیک مانگنے والے گروہ سے ہے۔

حکام کا کہنا ہے کہ تمام مسافروں کو گرفتار کرکے قانونی کارروائی کیلئے انسداد انسانی سرکل منتقل کردیا گیا ہے۔

کراچی : عمرے کی آڑ میں گداگری میں ملوث خاتون کو پاکستان پہنچنے پر گرفتار کرلیا گیا، ملزمہ روزانہ کی بنیاد پر 100 ریال بھیک مانگ کر اکھٹا کرتی تھی۔

تفصیلات کے مطابق ایف آئی اے امیگریشن نے کراچی ائرپورٹ پر کارروائی کرتے ہوئے عمرے کی آڑ میں گداگری میں ملوث خاتون کوگرفتارکرلیا۔

ایف آئی اے نے بتایا کہ مسافر خاتون کی شناخت گل شانہ کے نام سے ہوئی مسافر خاتون کو سعودی عرب سے پاکستان پہنچنے پر گرفتار کیا گیا ملزمہ فلائٹ نمبر XY313 کے ذریعے کراچی ائرپورٹ پہنچی تھی۔

ترجمان کا کہنا تھا کہ گرفتار ملزمہ عمرہ ادا کرنے کی بنیادی طریقہ کار سے مکمل طور پر ناواقف تھی، ملزمہ نے سعودی عرب میں گداگری میں ملوث ہونے کا اعتراف کیا۔

ابتدائی تفتیش کے مطابق ملزمہ روزانہ کی بنیاد پر 100 سعودی رال بھیک مانگ کر اکھٹا کرتی تھی، ملزمہ نے بتایا کہ اس کے دیگر رشتے دار بھی سعودی عرب میں گداگری میں ملوث ہیں ملزمہ کا خاوند بھی گداگری میں ملوث ہے جسکی معلومات حاصل کی جا رہی ہیں۔

ایف آئی اے نے کہا کہ گرفتار مسافر خاتون کو مزید قانونی کاروائی کے لیے انسدادِ انسانی سمگلنگ سرکل کراچی منتقل کر دیا گیا ہے اور مزید تفتیش جاری ہے۔

کراچی : عمرے کی آڑ میں بھیک مانگنے کے غرض سے سعودی عرب جانے والی 2 مسافر خواتین کو گرفتار کرلیا گیا، ایک خاتون کا بیٹا بھی گداگری میں ملوث ہے۔

تفصیلات کے مطابق ایف آئی اے امیگریشن نے کراچی ایئر پورٹ پر بڑی کاروائی کرتے ہوئے عمرے کی آڑ میں گداگری میں ملوث 2 مسافر خواتین کوگرفتارکرلیا۔

ایف آئی اے حکام نے بتایا کہ مسافر خواتین کی شناخت پتل خاتون اور سبحانہ کے نام سے ہوئی، گرفتار خواتین کسی قسم کی ہوٹل بکنگ کے حوالے سے دستاویزات دینے میں ناکام رہی۔

حکام کا کہنا تھا کہ خواتین کے پاس کسی قسم کی سفری اخراجات کے حوالے سے رقم موجود نہ تھی ، ابتدائی تفتیش کے مطابق مسافر خاتون سبحانہ کا بیٹا غیر قانونی طور پر سعودی عرب میں مقیم ہے، گرفتار خاتون کا بیٹا عمرہ ویزا پر سال 2022 میں سعودی عرب گیا تھا۔

ایف آئی اے نے بتایا کہ خاتون کا بیٹا بھی گداگری میں ملوث ہے، جس کی معلومات حاصل کی جا رہی ہیں۔

حکام کا کہنا ہے کہ گرفتار مسافر خواتین کو مزید قانونی کاروائی کے لیے انسدادِ انسانی سمگلنگ سرکل کراچی منتقل کر دیا گیا ہے مزید تفتیش جاری ہے۔

یاد رہے ایف آئی اے امیگریشن نے کراچی ایئرپورٹ پر کارروائی کرتے ہوئے عمرے کی آڑ میں بھیک مانگنے کے غرض سے جانیوالے 11 مسافرون کو گرفتار کیا تھا۔

ایف آئی اے نے بتایا تھا کہ 8 خواتین سمیت 11 مسافروں کو آف لوڈ کر دیا گیا، ملزمان عمرے ویزے پر سعودی عرب جا رہے تھے، ملزمان کی جانب سے پیش کیے جانے والے ریٹرن ٹکٹ اور ہوٹل بکنگ بھی جعلی نکلے۔

لاہور : عمرے کی آڑ میں بھیک مانگنے کیلئے سعودی عرب جانیوالے چار مسافر گرفتار کرلئے گئے، ملزمان کوسعودی عرب پہنچنے پرپاکستانی ایجنٹوں نے وصول کرنا تھا۔

تفصیلات کے مطابق اینٹی ہیومن ٹریفکنگ سرکل لاہور نے کارروائی کرتے ہوئے عمرے کی آڑ میں بھیک مانگنے کیلئے سعودی عرب جانیوالے چار مسافروں کو گرفتار کرلیا۔

ترجمان ایف آئی اے نے بتایا کہ مسافروں میں دو خواتین اور دو مرد شامل ہیں، ملزمان بھیک مانگنے کیلئے متعدد بار سعودی عرب، ایران اور عراق جا چکے ہیں۔

ترجمان کا کہنا تھا کہ ملزمان کو سعودی عرب پہنچنے پر پاکستانی ایجنٹوں نے وصول کرنا تھا، ملزمان اور ایجنٹوں کےخلاف مقدمہ درج کرکے تفتیش کی جارہی ہے۔

ابتدائی تحقیقات میں ملزمان نے انکشاف کیا ہے کہ بھیک کے ذریعے کمائی رقم کا آدھا حصہ سب ایجنٹ کو دینا تھا۔