مظفر گڑھ: ڈگری کے بعد بس کا نمبر بھی جعلی نکل آیا، سابق ایم این اے جمشید دستی کی بس کا نمبر رجسٹرڈ نہیں تھا، بس کو قبضے میں لے لیا گیا۔
تفصیلات کے مطابق مظفر گڑھ سے تعلق رکھنے والے سابق رکن قومی اسمبلی جمشید دستی کی جعلی ڈگریوں کی طرح ان کی بس کا نمبر این اے 178 بھی جعلی نکلا، پولیس کا کہنا ہے کہ بس کی رجسٹریشن نہیں کرائی گئی ہے۔
خیال رہے کہ عوامی راج پارٹی کے چیئرمین جمشید دستی نے اپنے حلقے میں فری بس سروس شروع کر رکھی تھی، تاہم پچھلے سال اگست میں انتخابات ہارنے کے بعد یہ سروس بند کر دی تھی۔
یہ بھی پڑھیں: جمشید دستی کا مہنگائی کے خلاف انوکھا احتجاج، سر منڈوا لیا
جعلی نمبر پلیٹ کے باعث مظفر گڑھ پولیس نے جمشید دستی کی بس پکڑ کر بند کر دی ہے، پولیس کا کہنا ہے کہ شاہ جمال کے قریب چیکنگ کے لیے بس کو روکا گیا تھا، نمبر پلیٹ جعلی نکلنے پر بس کو قبضے میں لے لیا گیا۔
عوامی راج پارٹی کے چیئرمین جمشید دستی نے کہا ہے کہ بس عوام کے لیے مفت چلتی تھی، دھرنے میں شرکت کے اعلان کے بعد بس بند کرائی گئی، تاہم پولیس کا کہنا ہے کہ بس کی نمبر پلیٹ کا کوئی ریکارڈ نہیں ملا ہے، جس پر کارروائی کی گئی، قانون سب کے لیے برابر ہے۔
یاد رہے چند دن قبل جمشید دستی کی ایک اور جعلی ڈگری بھی پکڑی گئی تھی، اسلامیہ یونی ورسٹی بہاولپور نے سال 2017 میں بی اے کی حاصل کردہ ڈگری انٹر میڈیٹ کی سند کی تصدیق نہ ہونے کے سبب منسوخ کی۔
