اسلام آباد: حکومت پاکستان نے عیدالفطر کے موقع پر چار روز کی سرکاری تعطیلات کا اعلان کردیا۔
تفصیلات کے مطابق حکومت کی جانب سے نوٹی فکیشن جاری کیا گیا جس کے مطابق عید الفطر کی تعطیلات 15 سے 18 جون یعنی جمعہ، ہفتہ، اتوار اور پیر تک ہوں گی۔
دوسری جانب محکمہ موسمیات نے رمضان المبارک کے 30 روزے پورے ہونے کی نوید سنائی ہے، ڈائریکٹر محکمہ موسمیات کا کہنا ہے کہ 29 رمضان المبارک کو چاند نظر آنے کے امکانات بہت کم ہیں۔
محکمہ موسمیات کے مطابق چاند کی پیدائش 14 جون کو رات 12 بجے کے قریب ہوگی اور شام تک اس کی عمر 19 گھنٹے تین منٹ تک ہوگی، غروب آفتاب کے بعد 39 منٹ تک چاند نظر آسکتا ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
ملک بھر میں عیدالفطرآج مذہبی جوش وجذبے کے ساتھ منائی جا رہی ہےاس موقع پر ملکی سلامتی اور استحکام کےلیے خصوصی دعائیں مانگی جارہی ہیں۔
تفصیلات کےمطابق ملک کے تمام چھوٹے بڑے شہروں، قصبوں اور دیہات میں عید الفطر کی نماز کے اجتماعات ہوں گےجس میں ملک کی سلامتی، ترقی، خوشحالی اوردہشت گردی کے خاتمے کے لئے خصوصی دعائیں مانگی جائیں گی۔
کراچی میں عید الفطر کے موقع پر شہر کی بڑی مساجد، عید گاہوں اور امام بارگاہوں کے باہر پولیس کی بھاری نفری تعینات کی جائے گی جبکہ پولیس کے علاوہ رینجرز اہلکار نے بھی ڈیوٹی انجام دیں گےاہم عیدگاہوں پر نمازیوں کو واک تھرو گیٹ سے اندر جانے کی اجازت دی جائے گی۔
عیدالفطر کے موقع پر شہر کے اہم عوامی مقامات، تفریحی گاہوں اور پارکوں کے باہر بھی پولیس کی اضافی نفری بھی تعینات کی گئی ہے۔
پنجاب کے دارالحکومت لاہور میں نماز عید الفطر کا سب سے بڑا اجتماع بادشاہی مسجد میں ہوگا۔عیدالفطر کے موقع پر پنجاب میں سیکیورٹی خدشات کی بنا پر سخت سکیورٹی پلان تشکیل دیا گیا ہے اور سیکیورٹی کے سخت انتظامات کیے گئے ہیں۔
اسلام آباد میں نماز عید کا سب سے بڑا اجتماع فیصل مسجد میں ہوگا جبکہ اس موقع پر سکیورٹی کے انتہائی سخت انتظامات کیے گئے ہیں۔
عیدالفطر کے موقع پر کوئٹہ اور پشاور میں بھی سکیورٹی کے سخت انتظامات کیے گئے ہیں، دونوں صوبائی دارالحکومتوں میں پولیس، رینجرز اور ایف سی کے اہلکار سیکیورٹی کے فرائض انجام دیں گے۔
واضح رہےکہ صدر ممنون حسین اور وزیر اعظم نوازشریف نے عید الفطر کے موقع پر عالم اسلام اور اہل پاکستان کو دل کی گہرائی سے مبارکباد پیش کرتے ہوئے کہا کہ عید پر دہشت گردی کے شکار پاکستانیوں کو یاد رکھا جائے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
اسلام آباد : پاکستان اسٹیٹ آئل (پی ایس او) نے ملک بھر کے عوام کو عیدالفطر کا تحفہ دینے کا اعلان کیا ہے، جس کے مطابق آج سے عید الفطر کے تین دن پیٹرول کی قیمت میں کمی کر دی گئی ہے۔
تفصیلات کے مطابق پاکستان اسٹیٹ آئل نے ملک بھر کے عوام کیلئے اپنے تمام پیٹرول پمپس پر آج بروز ہفتہ سے عید کے تین دن تک پیٹرول کی فی لیٹر قیمت میں ایک روپیہ کمی کااعلان کیا ہے۔
یہ آفرملک بھر میں پی ایس او کے تمام پیٹرول پمپوں کیلئے ہے جس کے بعد پیٹرول اب 72.80 کے بجائے 71.80 فی لیٹر میں فروخت ہوگا۔
مسلمانوں کا تہوار عید الفطر دنیا بھر میں نہایت ذوق و شوق سے منایا جاتا ہے۔ دنیا بھر میں جہاں جہاں مسلمان رہتے ہیں وہ نہ صرف خود یہ تہوار مناتے ہیں بلکہ اپنے ساتھ غیر مسلموں کو بھی اپنی خوشیوں میں شریک کرتے ہیں۔
بھارتی فلم انڈسٹری بالی ووڈ بھی ہندو اور مسلمان تہذیب و روایات کو پیش کرتی ہے۔ نہ صرف ہندو اور سکھ تہواروں کو فلموں میں دکھایا جاتا ہے بلکہ مسلمان تہواروں کو بھی مناتے ہوئے دکھایا جاتا ہے۔
چونکہ عید کا موقع ہے تو ہم نے آپ کے لیے بالی ووڈ کے کچھ ایسے ہی گانوں کا انتخاب کیا ہے جو آپ کی عید کی خوشیوں کو دوبالا کردیں گے۔
واللہ رے واللہ
فلم ’تیس مار خان‘ کا گانا ’واللہ رے واللہ‘ اکشے کمار، کترینہ کیف پر فلمایا گیا ہے جبکہ سلمان خان بھی اس میں بطور مہمان اداکار جلوہ گر ہوئے ہیں۔
عرضیاں
فلم ’دہلی 6‘ کا گانا ’عرضیاں‘ میں عید کے تہوار کو دکھایا گیا ہے جس میں لوگ ایک دوسرے سے عید مل رہے ہیں اور چاروں جانب عید کی خوشیاں ہیں۔ گانے کی موسیقی اے آر رحمٰن کی جانب سے دی گئی ہے جبکہ اسے ابھیشک بچن پر فلمایا گیا ہے۔ اسے سن کر آپ بھی خود کو پرانی دلی کے اسی ماحول کا حصہ محسوس کریں گے جس نے اردو شعر و ادب کو پروان چڑھایا۔
یوں شبنمی
سونم اور رنبیر کپور کی پہلی فلم ’سانوریا‘ میں شامل گانا ’یوں شبنمی‘ میں یہ دونوں اداکار سب کو عید کی خوشیوں کی مبارکباد دیتے نظر آرہے ہیں۔
مبارک عید مبارک
سن 2002 میں آنے والی فلم ’تم کو نہ بھول پائیں گے‘ کے گانے ’مبارک عید مبارک‘ میں سلمان خان دل سے سب کو عید کی مبارکباد دیتے نظر آرہے ہیں۔ فلم میں سلمان خان کے ساتھ دیا مرزا اور سشمیتا سین بھی شامل تھیں۔
چاند سامنے ہے
یہ گانا فلم ’یہ محبت ہے‘ میں شامل ہے جو 2002 میں آئی۔ گانا راہول بٹ پر فلمایا گیا جبکہ فلم میں ارباز خان نے بھی اداکاری کے جوہر دکھائے۔
چاند نظر آگیا
فلم ’ہیرو ہندوستانی‘ 1998 میں آئی جس میں ارشد وارثی اور نمرتا شرودکر نے مرکزی کردار ادا کیا۔ اس میں شامل گانا ’چاند نظر آگیا‘ چاند رات کی رونقیں یاد دلاتا ہے۔
عید کا دن
گانا ’عید کا دن‘ 1982 میں آنے والی فلم ’دیدار یار‘ میں شامل ہے۔ گانے میں قمر بدایونی کا مشہور مصرعہ ’رسم دنیا بھی ہے، موقع بھی ہے، دستور بھی ہے‘ بھی شامل ہے۔ فلم میں جیتندر، ریکھا اور رشی کپور نے مرکزی کردار ادا کیا تھا۔
کراچی : متحدہ قومی موومنٹ کی رابطہ کمیٹی کے سینئر ڈپٹی کنوینر ڈاکٹر فاروق ستار نے عید الفطر کے پہلے دن ملکی و بین الاقوامی شہرت یافتہ قوال امجد صابری شہید کی رہائش گاہ جاکر سوگوار لواحقین سے ملاقات کی اور ان کی دلجوئی کی۔
ڈاکٹر فاروق ستار نے امجد صابری شہید کے بلند درجات ، شہید کے سفاک قاتلوں کی گرفتاری اور لواحقین کیلئے صبر جمیل کی دعا بھی کی ۔
اس موقع پر ڈاکٹر فاروق ستار نے شہید امجد صابری کے بیٹوں کے سروں پر ہاتھ رکھا اور انہیں صبر کی تلقین کی۔ ڈاکٹر فاورق ستار نے کہاکہ امجد صابری شہید کو ملک و قوم سے چھیننے والے سفاک دہشت گرد اپنے عبرتناک انجام کو ضرور پہنچیں گے۔
انہوں نے کہا کہ امجد صابری شہید کے قاتلوں کا اب تک قانون کی گرفت سے محفوظ رہنا ہر امن پسند شہری کیلئے لمحہ فکریہ ہے۔
انہوں نے کہا کہ امجد صابری شہید کو قوالی اور نعتیہ کلام میں ملکہ حاصل تھا اور شہید کی بدولت دنیا بھر میں پاکستان اور پاکستانی قوم کا نام روشن ہورہا تھا لیکن سفاک دہشت گردوں نے ہم سے بے ضرر، خوش باش اور ملنسار شخصیت کو بھی چھین لیا ہے اور پاکستان اور پاکستانی قوم کو ایک اور بڑے اثاثہ سے محروم کردیا ہے۔
انہوں نے مطالبہ کیا کہ امجد صابری شہید کے قاتلوں کو فی الفور گرفتار کیاجائے اور شہید کے قتل کے پس پردہ حقائق سے ملک و قوم کو آگاہ کیاجائے۔
اسلام آباد : صدرمملکت ممنون حسین نے عیدالفطر کے پُرمسرت موقع پر قوم کو دلی مبارک باد پیش کرتے ہوئے دونوں رہنماؤں نے اپنے پیغامات میں کہا ہے کہ عید الفطر مسلمانوں کے لیے خوشی اور تشکر کا دن ہے.
عیدالفطر کے پُرمسرت موقع پر صدر ممنون حسین نے قوم کو عید کی مبارک باد دیتے ہوئے کہا کہ عید کا دن صرف ایک تہوار ہی نہیں بلکہ اس دن کی اہمیت اور اس کا تعلق رواداری،برداشت، ہم آہنگی اور پُرامن بقائے باہمی سے ہے.
صدرمملکت نے عید الفطر کے موقع پر اپنے پیغام میں کہا کہ اہلِ اسلام رمضان المبارک کے دوران ضبط نفس کا مظاہرہ کر کے خود کو ان بڑے مقاصد کےلیے تیار کرتے ہیں جس کا مقصد یہ ہے کہ اس ماہِ مبارک میں تزکیہ نفس کے ذریعے جو اچھے اطوار ہم سیکھتے ہیں انہیں اپنی زندگی کا مستقل حصہ بنا کر معاشرے،ملک اور بالآخر پوری دنیا میں امن و سلامتی اور محبت و یگانگت کے فروغ کا ذریعہ بن جائیں.
عیدالفطر کےموقع پر وزیراعظم نوازشریف نے اپنے پیغام میں کہا کہ اللہ تعالیٰ کے فضل وکرم سے ہم رمضان کریم کی برکات سے مستفید ہوئے عیدالفطرکے پُرمسرت موقع پراُمت مسلمہ اور پوری قوم کومبارک باد پیش کرتا ہوں،عیدالفطر مسلمانوں کے لیے خوشی اور تشکرکا دن ہے.
وزیراعظم نوازشریف نے سیکیورٹی اداروں کو بھی خراج تحسین پیش کرتے ہوئے کہا کہ سیکیورٹی اداروں کے جوان شب وروز دفاع وطن میں مصروف ہیں،پوری قوم ان کے جذبے کو سلام کرتی ہے،میں اپنی عید ان جوانوں کے نام کرتا ہوں.
آج پاکستان سمیت کئی ممالک میں عید الفطر مذہبی جوش و جذبے اور نہائیت مذہبی عقیدت و احترام کے ساتھ منائی جا رہی ہے،نماز عید کے بڑے بڑے اجتماعات منعقد ہوئے اور پاکستان کی سلامتی بقا اور خوشحالی کے لیے دعائیں مانگی گئیں.
ملک بھر میں نماز عید کے روح پرور اجتماعات منعقد ہوئے،جن میں علما اور خطیبوں نے امت مسلمہ کے اتحاد و یکجہتی پر زور دیا اور کہا کہ دہشت گردی،شدت پسندی اور انتہا پسندی کی اسلام میں کوئی گنجائش نہیں ہے کیونکہ اسلام تو امن و محبت اور اخوت کا درس دیتا ہے،نماز عید کے اجتماعات میں اہم شخصیات کے علاوہ بڑی تعداد میں بزرگوں،جوانوں اور بچوں نے شرکت کی.
وفاقی دارالحکومت اسلام آباد میں نماز عید کا سب سے بڑا اجتماع شاہ فیصل مسجد میں منعقدہوا،ملک بھر میں عید کے موقع پر سیکیورٹی کے انتہائی سخت انتظامات کیے گئے .
کراچی میں سرکاری شخصیات کا نماز عید کا سب سے بڑا اجتماع باغ جناح پولو گرائونڈمیں منعقد ہوا،جس میں گورنر سندھ ڈاکٹر عشرت العباد خان،مختلف اسلامی ممالک کے سفارتکاروں سمیت دیگر سرکاری شخصیات نے نماز عیدالفطر ادا کی.
کولمبو: پاکستان کرکٹ ٹیم کے کھلاڑیوں نے کولمبو کی مسجد میں نماز عید ادا کی، نماز عید کے بعدکھلاڑیوں نے سیلفیز بھی بنوائی۔
عید کی خوشیوں کا مزہ تو سب کے ساتھ آتا ہے لیکن عیدالفطر پر قومی ہیروزوطن سے دور دیار غیر میں عید منارہے ہیں۔
ہرانسان کی خواہش ہوتی ہے کہ وہ عید اہل خانہ کے ساتھ منائے اور عید کا اصل مزہ ہی اپنوں کے سنگ آتا ہے لیکن سری لنکا سے سیریز کے سبب قومی کرکٹرز اس سال عید پردیس میں منارہے ہیں۔
گھر سے دور قومی کھلاڑیوں نے عیدالفطر کی نماز کولمبو کی مسجد میں ادا کی, نماز کی ادائیگی کے بعد کھلاڑیوں نے دعائیں بھی مانگی۔
عید کے موقع پر پاکستانی کھلاڑیوں کی اکثریت نے کرتا شلوارزیب تن کیا تھا۔
اس کے بعد بعض کرکٹرزنے سیلفیزکا شوق پورا کیا اور سوشل میڈیا پر شیئر پر شیئر کیا۔
پاکستان میں گزشتہ چند برسوں میں عید کارڈوں کی فروخت میں کمی واقع ہوئی ہے۔ جس کی بڑی وجہ انٹرنیٹ بتایا جاتا ہے۔
کسی زمانے میں دل کی بات کہنے کےلیے عید کارڈز سے اچھا ذریعہ اور کوئی نہیں تھا، لیکن جب لوگوں کے ہاتھوں میں موبائل فون اور انٹرنیٹ آیا تو ساری مشکل ہی آسان ہوگئی، اِدھر سے میسج گیا اور اُدھر سے جواب آیا۔ نہ ڈاک کا خرچ نہ ڈاکیے کا انتظار۔ مگر اب بھی کچھ لوگ ایسے ہیں جو عید کارڈ کی روایت سے جڑے ہوئے ہیں۔
لوگوں نے مبارک باد کے لیے ،سوشل میڈیا،ای کارڈ، انٹرنیٹ اور ایس ایم ایس کا سہارا لے لیا۔ عید کارڈ کے ذریعے مبارک باد کی روایت معدوم ہونے لگی، 11 برس قبل تک عید کے موقع پر عید کارڈ ہی اپنے پیاروں کو عید کی مبارک باد دینے کا اہم ذریعہ ہوتا تھا ۔
ایک زمانہ تھا جب شہر کے مرکزی بازاروں کے علاوہ مصروف چوراہوں اور سٹرکوں پر بھی عید کارڈز کے درجنوں عارضی اسٹالز لگائے جاتے تھے جہاں سے بچے بڑے اپنی پسند کے عید کارڈز خرید کر اپنے دوستوں ،عزیز واقارب اور اہل خانہ کو ڈاک کے ذریعے ارسال کیا کرتے تھے ۔
سوشل میڈیا،انٹرنیٹ اور موبائل فون عام ہونے سے عید کارڈز کی فروخت سال بہ سال کم ہو رہی ہے ۔فیس بک ،وائبر،ٹوئٹراور واٹس اپ سمیت سماجی رابطے کی دیگر ویب سائٹس نے اس روایت کو تقریباً ختم ہی کر دیا ہے۔
عید کارڈ پر ایک مختلف انداز میں شعر لکھے جاتے تھے جن میں سے چند یہ ہیں۔
سویاں پکی ہیں سب نے چکھی ہیں
آپ کیوں رو رہے ہیں آپ کے لئے بھی رکھی ہیں
****
چاول چُنتے چُنتے نیند آ گئی صبح اٹھ کر دیکھا تو عید آ گئی
****
عید آئی ہے زمانے میں بھیا گر پڑے غسل خانے میں
****
چاول چنتے چنتے نیند آ گئی صبح اٹھ کر دیکھا تو عید آ گئی
کراچی: سعودی عرب اور دیگر خلیجی ریاستوں میں میں کل بروز جمعہ عید الفطر منائی جا رہی ہے۔
مشرق بعید کے ملکوں آسٹریلیا، ملائشیا، فلپائین، نیوزی لینڈ ، جاپان اور انڈو نیشیا میں جمعے کو عید الفطر منائی جائے گی ، ان ملکوں کے شہروں سڈنی ، منیلا،جکارتا اور کوالہ لمپور میں نماز عید کے اجتماعات منعقد ہوں گے۔
مغربی ممالک میں جرمنی میں بھی کل عید منائی جائے گی، بھارت کی ریاستوں کرناٹک اور کیرالہ میں بھی کل عید منائی جائے گی۔
پاکستان میں شوال کا چاند دیکھنے کے لیے مرکزی رویت ہلال کمیٹی کا اجلاس کل چیرمین مفتی منیب الرحمان کی زیرصدارت اسلام آباد میں ہوگا۔
