Tag: عید الاضحیٰ

کراچی: ہر سال عید پر پاکستانی فلموں کے ساتھ بالی ووڈ فلمیں بھی پاکستان میں ریلیز کی جاتی ہیں لیکن رواں برس عید الاضحیٰ پر کوئی بالی ووڈ فلم ریلیز نہیں ہور ہی جس سے پاکستانی فلمسازوں نے سکھ کا سانس لیا ہے۔

رواں برس عید الاضحیٰ پر 3 پاکستانی فلمیں ’جاناں‘، ’زندگی کتنی حسین ہے‘ اور ’ایکٹر ان لا‘ ریلیز کی جائیں گی۔

اس سے قبل کئی پاکستانی فلم ساز اور ہدایت کار بھارتی فلمیں پاکستان میں ریلیز کرنے کی مخالفت اور مطالبہ کر چکے ہیں کہ پاکستان میں بالی ووڈ فلموں پر پابندی عائد کی جائے۔ ان کا کہنا ہے کہ بالی ووڈ فلموں کی ریلیز پاکستانی فلموں کے بزنس پر منفی اثر ڈالتی ہیں تاہم اس سلسلہ میں متعلقہ حکام کی جانب سے کوئی قدم نہیں اٹھایا گیا۔

خوش قسمتی سے اس بار عید پر پاکستانی فلمسازوں کی دعائیں قبول ہوگئیں اور رواں برس عید پر صرف پاکستانی فلمیں سینما گھروں کی زینت بننے جارہی ہیں۔

فلم ’جاناں‘ آئی آر کے فلمز، ایم ایچ پروڈکشنز اور اے آر وائی فلمز کی مشترکہ پیشکش ہے۔ ریحام خان، حریم فاروق، منیر حسین اور عمران کاظمی کی پروڈکشن میں بننے والی اس فلم کی ہدایات اظفر جعفری نے دی ہیں۔

فلم کی کاسٹ میں ارمینہ رانا خان، بلال اشرف اور علی رحمٰن مرکزی کردار ادا کر رہے ہیں جبکہ فلم کی دیگر کاسٹ میں مشی خان، عجب گل اور نیئر اعجاز شامل ہیں۔

فلم ’ایکٹر ان لا‘ کے مرکزی کرداروں میں فہد مصطفیٰ، مہوش حیات اوربھارت کے نامور اداکار اوم پوری شامل ہیں۔ فلم کی پرڈیوسر فضا علی ہیں جبکہ ہدایت کاری کے فرائض نبیل قریشی نے انجام دیے ہیں۔

فلم ’زندگی کتنی حسین ہے‘ میں مرکزی کرداروں میں معروف ڈرامہ اداکار سجل علی اور پاکستانی اداکارہ عمائمہ ملک کے بھائی فیروز خان شامل ہیں۔ یہ ان دونوں کی پہلی فلم ہے۔

فلم کے ڈائریکٹر انجم شہزاد ہیں جن کی ایک اور فلم ’ماہ میر‘ بھی رواں برس سینما گھروں کی زینت بن چکی ہے۔

تجزیہ نگاروں کا کہنا ہے کہ بالی ووڈ فلمیں ریلیز نہ ہونے کے باوجود بھی یہ اگر فلمیں شائقین کی توجہ حاصل کرنے میں ناکام رہیں تو یہ اس بات کا ثبوت ہوگا کہ ہماری فلم انڈسٹری کو مزید ترقی دینے کی ضرورت ہے۔

کراچی: اے آر وائی فلمز کی پیش کش ’دوبارہ پھر سے‘ کا پوسٹر جاری کر دیا گیا ہے۔ فلم 25 نومبر کو ریلیز کی جائے گی۔

فلم ’دوبارہ پھر سے‘ معروف ہدایت کار مہرین جبار کی ہدایت کاری میں بن رہی ہے اور فلم کے پروڈیوسر اے آر وائی کے سی ای او سلمان اقبال ہیں۔ فلم اے آر وائی فلم کے بینر تلے ریلیز کی جائے گی۔

فلم کی کاسٹ میں عدیل حسین، علی کاظمی، حریم فاروق، صنم سعید، طوبیٰ صدیقی، شاذ خان اور عتیقہ اوڈھو شامل ہیں۔

فلم کی کہانی شہری زندگی، اس زندگی سے جڑی دلچسپیوں اوردلچسپیوں میں پوشیدہ دلچسپ کہانیوں پر مبنی ہے۔

فلم کی ہدایت کار مہرین جبار کا کہنا ہے کہ ’دوبارہ پھر سے‘ ایک رومانوی فلم ہے لیکن میرا وعدہ ہے کہ یہ کہانی عام ٹین ایجر رومانس پر مبنی نہیں ہوگی۔ ان کا کہنا تھا کہ یہ فلم نہ تو بالی وڈ کی رومانوی فلموں کی طرح ہوگی اور نہ ہی پاکستانی ٹی وی سیریلز کا فلمی ورژن ہوگا بلکہ اس فلم کی آمد سے رومانوی فلم میکنگ میں ایک نئی جہت کا آغاز ہوگا۔

مہرین جبار اس سے قبل ’رام چند پاکستانی‘ اور ’جیکسن ہائیٹس‘ جیسے منفرد پراجیکٹس پیش کرچکی ہیں اور اب ان کا ماننا ہے کہ ’دوبارہ پھر سے‘ ان کے پچھلے سارے کام سے منفرد اوردلوں کو موہ لینے والی ثابت ہوگی۔

یہ فلم کراچی اور نیویارک میں فلمائی گئی ہے اور ناقدین کا کہنا ہے کہ یہ فلم پاکستان کی تاریخ میں ریکارڈ مرتب کرنے والی تمام فلموں کے ریکارڈز توڑ دے گی۔

فلم ’دوبارہ پھر سے‘ رواں سال 25 نومبر کو سینما گھروں میں نمائش کے لیے پیش کردی جائے گی۔