وزیراعظم شہباز شریف اور صدر آصف زرداری نے اپنے پیغام میں عید الفطر کے موقع پر پاکستانی قوم اور امت مسلمہ کو مبارکباد پیش کی ہے۔

تفصلات کے مطابق وزیراعظم کا کہنا تھا کہ رمضان المبارک کے بعد عید اللہ تعالی کا اپنے مومنین کیلئے تحفہ ہے، عید معاشرے میں خوشحالی کیلئے رنجشیں بھلا کر اکٹھا ہونے کا نام ہے۔ عید اپنے کمزور بہن بھائیوں کی خوشیاں دوبالا کرنے میں مدد کرنے کا نام ہے۔

انھوں نے کہا کہ مہنگائی کے پیش نظر معاشی طور پر کمزور لوگوں کو اپنی خوشیوں میں شامل کریں، ملکی سلامتی کے لیے قربانیاں دینے والوں کو خراج عقیدت پیش کرتے ہیں۔

شہباز شریف نے کہا کہ سرحدوں کی حفاظت پر ماموربہادر سپوتوں کو سلام کرتے ہیں۔ دنیا بھر میں مسلمان فلسطینیوں اور کشمیریوں کو اپنی دعاؤں میں یاد رکھیں۔

دریں اثنا صدر مملکت آصف زرداری کا عید کے موقع پر اپنے پیغام میں کہنا تھا کہ عیدالفطر پر قوم اور امت مسلمہ کیلئے نیک خواہشات پیش کرتا ہوں۔

آصف زرداری نے کہا کہ دعا گو ہوں کہ یہ دن ڈھیروں برکتیں، خوشیاں، امن اور سلامتی لائے۔ اللہ کا شکر ہے کہ ہمیں رمضان کی سعادتیں اور خوشیاں نصیب ہوئیں۔ عید خوشیاں بانٹنے، معاشرے کے محروم طبقات کیلئے ایثار و قربانی کا دن ہے،

صدر نے کہا کہ غریبوں، یتیموں اور محتاجوں کی مدد کریں، عید کی خوشیوں میں انھیں شریک کریں۔ بحیثیت قوم رکاوٹیں دورکرنے اور ضرورت مندوں کی مدد کرنے کی ضرورت ہے۔ اخوت اور باہمی اتحاد و یکجہتی سے سرشار ہوکر مضبوط قوم بننے کی کوشش کریں۔

صدر نے کہا کہ پاکستانی قوم غزہ و فلسطین کے مظلوم عوام کے ساتھ یکجہتی کا اظہارکرتی ہے۔ عالمی برادری غزہ میں فوری جنگ بندی اور امداد کی فراہمی یقینی بنائے۔ اسرائیل کا ظلم، بربریت اور نسل کشی انسانی حقوق کی سنگین خلاف ورزی ہے۔

انھوں نے کہا کہ خوشی کے اس موقع پر مقبوضہ جموں و کشمیر کے عوام کو نہیں بھولنا چاہیے۔ پوری پاکستانی قوم اپنے کشمیری بھائیوں اور بہنوں کے ساتھ کھڑی ہے۔

آصف زرداری نے کہا کہ پاکستان کشمیری عوام کیلئے اپنی اخلاقی، سفارتی اور سیاسی حمایت جاری رکھے گا، ہر پاکستانی اور پوری امت مسلمہ کی بھلائی اور خوشحالی کے لیے دعا گو ہوں۔ اللہ تعالیٰ ہماری قوم پر رحمتیں نازل فرمائے، نیکی کی راہ پر گامزن فرمائے۔

کراچی : پاکستان اور عرب ممالک سمیت کئی ملکوں میں ایک ہی روز عید الفطر منائے جانے کا امکان ہے، پاکستان میں آج چاند نظر آنے کے قومی امکانات ہیں۔

تفصیلات کے مطابق پاکستان اور عرب ممالک سمیت کئی ملکوں میں ایک ہی روز عید الفطر منائے جانے کاامکان بڑھ گیا۔

آج پاکستان میں شوال کا چاند نظر آنے کا قومی امکان ہے، ماہرین کے مطابق چاند کی عمر آج شام انسانی آنکھ سے دیکھائی دینے کے لیے پوری ہوگی، غروبِ آفتاب کے بعد افق پر پچاس سے ساتھ منٹ تک چاند چمکتا دمکتا ہے گا۔

محکمہ موسمیات نے بھی عید کا چاند آج نظر آنے کی پیش گوئی کر دی ہے اور کہا ملک کے اکثر حصوں میں مطلاع صاف رہے گا تاہم چاند کی رویت کا حتمی اعلان مرکزی رویتِ ہلال کمیٹی کرے گی۔

ملک میں بوہری برادری آج عید منا رہی ہے، سعودی عرب، متحدہ عرب امارات،قطر اور آسٹریلیا سمیت کئی ممالک میں بھی عید الفطر کل منائی جائے گی جبکہ امریکہ اور برطانیہ میں بھی ایک ہی روز عید کا امکان بڑھ گیا۔

پاکستان میں رویت ہلال کمیٹی آج بیٹھے گی، چیئرمین رویت ہلال کمیٹی مولانا عبدالخبیرآزاد کی زیرصدارت اجلاس اسلام آباد میں ہوگا، صوبائی دارالحکومتوں میں زونل کمیٹیوں کے اجلاس ہوں گے۔