ARYNews.tv | Urdu – Har Lamha Bakhabar

Tag: عید الفطر

  • سعودی عرب: عید الفطر کی تعطیلات کا اعلان

    سعودی عرب: عید الفطر کی تعطیلات کا اعلان

    سعودی عرب میں پرائیوٹ سیکٹر کے لیے عید الفطر کی تعطیلات کا اعلان کردیا گیا، 4 دن کی تعطیلات یکم مئی سے شروع ہوں گی۔

    سعودی ویب سائٹ کے مطابق سعودی وزارت افرادی قوت و سماجی بہبود نے پرائیوٹ سیکٹر اور بغیر منافع والے سیکٹر کے ملازمین کے لیے عید الفطر کی تعطیلات کے حوالے سے بیان جاری کیا ہے۔

    وزارت افرادی قوت و سماجی بہبود نے ٹویٹر پر بیان میں کہا کہ پرائیوٹ سیکٹر میں عید الفطر کی تعطیلات 29 رمضان سنیچر 30 اپریل 2022 کی ڈیوٹی مکمل کرنے پر شروع ہوں گی، تعطیلات 4 دن کی ہوں گی۔

    تمام آجروں کو قانون محنت کے لائحہ عمل کی دفعہ 24 کی شق دو کے مطابق اس کی پابندی کرنا ہوگی۔

    قانون محنت کے لائحہ عمل کی دفعہ 24 کی دوسری شق میں کہا گیا ہے کہ اگر تہوار یا کسی قومی پروگرام کی چھٹیاں ہفتہ وارچھٹی کے ساتھ ٹکرا رہی ہوں تو ایسی صورت میں ملازم کو عید کی چھٹیاں شروع ہونے سے قبل یا آخر میں اس کے بدلے چھٹی دینا ہوگی۔

    سالانہ چھٹی میں توسیع تہوار کی چھٹیوں کے حساب سے ہوگی جہاں تک بیماری کی چھٹی کا تعلق ہے تو ملازم کو عید کی چھٹیوں کے محنتانے کا استحقاق حاصل ہوگا، اس حوالے سے بیماری کی چھٹیوں کے محنتانے کا اعتبار نہیں ہوگا۔

  • پاکستان میں عید الفطر کس دن ہوگی ؟ فواد چوہدری کے بعد محکمہ موسمیات کی بڑی پیشگوئی

    پاکستان میں عید الفطر کس دن ہوگی ؟ فواد چوہدری کے بعد محکمہ موسمیات کی بڑی پیشگوئی

    کراچی : محکمہ موسمیات نے پیشگوئی کرتے ہوئے کہا اس بار29 کی بجائے 30روزوں کا امکان زیادہ ہے، عیدالفطر 14مئی بروزجمعہ کو ہوسکتی ہے، تاہم حتمی فیصلہ رویت ہلال کمیٹی کرے گی۔

    تفصیلات کے مطابق محکمہ موسمیات نے شوال کے چاند کے حوالے سے اپنے بیان میں کہا ہے کہ بدھ 12مئی کوشوال کاچاندنظرآنےکاامکان نہ ہونےکےبرابرہے، شوال کےچاندکی پیدائش 12 مئی کی رات 12 بجکر01 منٹ پرہوگی۔

    محکمہ موسمیات کا کہنا تھا کہ 29 رمضان کو نئے چاند کے نظرآنےکاامکان نہ ہونےکےبرابرہے، 12مئی کوملک کےبیشترحصوں میں مطلع صاف ہوگا،اس بار29کی بجائے30روزوں کاامکان زیادہ ہے، عیدالفطر14مئی بروزجمعہ کو ہوسکتی ہے تاہم حتمی فیصلہ رویت ہلال کمیٹی کرے گی۔

    یاد رہے وفاقی وزیر اطلاعات و نشریات فواد چوہدری نےکا کہنا تھا کہ عید کا حتمی اعلان رویت ہلال کمیٹی نے ہی کرنا ہے تاہم وزارت سائنس و ٹیکنالوجی کے کیلنڈر اور رویت ایپ کے مطابق چاند 13 مئی کو نظر آئے گا اور عید الفطر 14 مئی کو ہوگی۔

    خیال رہے سعودی عرب میں جدہ فلکیاتی انجمن نے کہا تھا کہ منگل گیارہ مئی 29 رمضان کو کہیں بھی چاند نظر نہیں آئے گا، اس مرتبہ رمضان کے 30 روزے ہوں گے، عید کا چاند بارہ مئی بدھ کو نظر آئے گا اور عید الفطر جمعرات تیرہ مئی کو ہونے کا امکان ہے۔

  • عیدالفطر کی تعطیلات پر رش، ریلوے پشاور کا اہم فیصلہ

    عیدالفطر کی تعطیلات پر رش، ریلوے پشاور کا اہم فیصلہ

    پشاور: عیدالفطر کی تعطیلات پر رش کے سبب محکمہ ریلوے پشاور نے خصوصی ٹرینیں چلانے کا فیصلہ کر لیا۔

    تفصیلات کے مطابق محکمہ ریلوے پشاور نے عیدالفطر کی تعطیلات میں بڑھتے ہوئے رش کے پیش نظر پشاور تا راولپنڈی اور راولپنڈی تا پشاور عید اسپیشل ٹرینیں چلانے کا فیصلہ کیا ہے۔

    پہلی عید اسپیشل ٹرین 10 مئی کو پشاور کینٹ سے صبح 9 بجے راونہ ہوگی، جو نوشہرہ، جہانگیرہ، اٹک سٹی، حسن ابدال، ٹیکسلا، گولڑہ شریف اسٹاپ کرتی ہوئی 12.30 پر راولپنڈی پہنچے گی۔

    یہی اسپیشل ٹرین اسی تاریخ میں دن 2 بجے راولپنڈی سے پشاور کے لیے راونہ ہوگی اور بالترتیب گولڑہ شریف، ٹیکسلا، حسن ابدال، اٹک سٹی، جہانگیرہ، اور نوشہرہ اسٹاپ کرتی ہوئی شام 5.30 پر پشاور کینٹ پہنچے گی۔

    عید اسپیشل ٹرینیں 10 مئی تا 16 مئی انھی مقررہ اوقات کے ساتھ چلا کریں گی۔

    بین الصوبائی پبلک ٹرانسپورٹ پر پابندی، محکمہ ریلوے کا بڑا فیصلہ

    واضح رہے کہ محکمہ ریلوے نے بین الصوبائی ٹرانسپورٹ پر عائد ہونے والی پابندی کے باعث شہریوں کی سہولت کے لیے مزید ٹرینیں چلانے کا فیصلہ کیا ہے، اس سلسلے میں مختلف شہروں سے مزید 66 ٹرینیں چلائی جائیں گی، یہ تمام عید اسپیشل ٹرینیں کرونا ایس او پیز کے تحت چلائی جائیں گی۔

  • کویت میں عید الفطر کے لیے عام تعطیلات کا اعلان

    کویت میں عید الفطر کے لیے عام تعطیلات کا اعلان

    کویت سٹی: کویت میں عید الفطر کے لیے 4 دن کی عام تعطیلات دیے جانے کا انکشاف ہوا ہے۔

    تفصیلات کے مطابق کویت میں  عید الفطر کے لیے چار دن کی چھٹیاں دی گئی ہیں، جب کہ تنخواہوں کی ادائیگی وقت پر پوری ہوگی۔

    عید کی چھٹیوں کے بارے میں ایک سوال کے جواب میں ذرائع نے مقامی میڈیا کو بتایا کہ اگر عید کا پہلا دن جمعرات کو اس مہینے کی 13 تاریخ کو پڑتا ہے تو چھٹی جمعہ کی بجائے جمعرات، جمعہ ، ہفتہ اور اتوار سمیت 4 دن ہوگی جو 13 ، 14 ، 15 اور 16 مئی سے مطابقت رکھتے ہیں، جب کہ 17 مئی کو باضابطہ طور پر ڈیوٹی پر واپس آنا ہوگا۔

    انھوں نے مزید کہا اگر عید کا پہلا دن رواں ماہ کی 12 تاریخ کو آجاتا ہے تو تعطیلات 4 دن ہوں گی جو بالترتیب یہ ہیں: 12 ، 13 ، 14، 15 (بدھ، جمعرات، جمعہ اور ہفتہ) جب کہ کام کے اوقات معمول کے مطابق 16 مئی بروز اتوار سے شروع ہوں گے۔

    ملازمین کی تنخواہوں سے متعلق بتایا گیا کہ سرکاری اداروں کو واجب الادا قسطوں کے لیے صارفین کے کسی بھی پریمیم کی کٹوتی کے بغیر بینکوں سے ملازمین کو مئی کی تنخواہیں بر وقت اور مکمل تقسیم کی جائیں گی، جب کہ ریٹائرڈ افراد کی تنخواہ عید سے قبل ان کے کھاتوں میں جمع کی جائے گی۔

    واضح رہے کہ قانون کے مطابق کویتی شہریوں کی جانب سے لیے گئے قرضوں کی قسطوں میں کٹوتی اگلے اکتوبر تک ملتوی کی گئی ہے۔

  • عید الفطر کی تعطیلات پر خصوصی سفری پیکجز متعارف

    عید الفطر کی تعطیلات پر خصوصی سفری پیکجز متعارف

    ابوظبی: یو اے ای میں ایئر لائنز اور ٹریولنگ ایجنسیوں نے عید الفطر کی تعطیلات پر بین الاقوامی پروازوں کے لیے خصوصی پیکجز کا اعلان کر دیا۔

    تفصیلات کے مطابق متحدہ عرب امارات میں فضائی کمپنیوں نے عید پر فضائی سفر کے لیے خصوصی پیکجز متعارف کرا دیے، پیکجز کا آغاز 1200 درہم سے کیا گیا ہے۔

    ان پیکجز میں ٹکٹ، ہوٹل میں رہائش، بکنگ کی فیس اور مفت انشورنس کی سہولتیں شامل ہیں، ٹریولنگ ایجنسیوں کا کہنا ہے کہ عید الفطر کی تعطیلات پر آفرز کا مقصد لوگوں کو سفر پر آمادہ کرنا ہے، قیمتیں ایسی ہیں کہ زیادہ سے زیادہ لوگ سفر کا پروگرام بنا سکتے ہیں۔

    پیکجز کے مطابق جارجیا کے شہر تبلیسی کے لیے 1300 درہم ٹکٹ مع تین رات ہوٹل میں قیام، جب کہ بریفان کے لیے 1600 درہم کا ٹکٹ رکھا گیا ہے، جس میں 4 راتیں ہوٹل میں رہائش بھی شامل ہے۔

    قاہرہ کے لیے 1900 درہم کا پیکج متعارف کرایا گیا ہے جس میں فائیو اسٹار ہوٹل میں قیام بھی شامل ہے، بلغراد کے لیے 2228 درہم کا پیکج ہے، زنجبار کے لیے 3 رات قیام اور سفر کا پیکج 2149 درہم پر مشتمل ہے، جب کہ مالدیپ کے لیے 3700 درہم کا پیکج متعارف کرایا گیا ہے۔

    ٹریول کمپنیوں کا کہنا ہے کہ سفری پابندیوں میں کمی پر نئے پیکجز دراصل لوگوں کو سفر کے لیے آمادہ کرنے کے لیے پیش کیے جا رہے ہیں۔

  • مسلح افواج کے سربراہان کا عید الفطر پر قوم کے نام پیغام

    مسلح افواج کے سربراہان کا عید الفطر پر قوم کے نام پیغام

    راولپنڈی: عید الفطر کے موقع پر مسلح افواج کے سربراہان نے قوم کو عید کی مبارکباد دیتے ہوئے کہا کہ ہمارے دل طیارے کے المناک حادثے پر افسردہ ہیں۔

    تفصیلات کے مطابق سماجی رابطے کی ویب سائٹ ٹویٹر پر آئی ایس پی آر کی جانب سے پیغام جاری کیا گیا جس میں آرمی چیف جنرل قمر جاوید باجوہ نے قوم کو عیدالفطر کی مبارکباد دیتے ہوئے کہا کہ ہم آج کے چیلنجوں پر قابو پانے کے لیے اللہ تعالیٰ کی مدد اور رہنمائی کے لیے دعا کرتے ہیں۔

    پاک بحریہ کے سربراہ ایڈمرل ظفر محمود عباسی نے عید پر اپنے پیغام میں کہا کہ اللہ تمام دنیا، عالم اسلام اور پاکستان پر خصوصی رحمتیں نازل فرمائے،یہ وقت باہمی ایثار،اخوت کے جذبے کا پہلے سے بڑھ کر متقاضی ہے۔

    نیول چیف نے کرونا اور طیارہ حادثے کے شکار لواحقین سے اظہاریکجہتی کرتے ہوئے کہا کہ اللہ مرحومین کی مغفرت اور لواحقین کو صبر عطا فرمائے۔پاک بحریہ کے سربراہ نے پاک افواج کے شہدا کو بھی خراج تحسین پیش کیا۔

    پاک فضائیہ کے سربراہ ایئر چیف مارشل مجاہد انور خان نے قوم کو عید کے پرمسرت موقع پر مبارکباد دیتے ہوئے کہا کہ یہ عید انتہائی غیرمعمولی حالات میں آئی ہے،قوم بڑی بہادری سے کرونا جیسے وبائی مرض کا مقابلہ کر رہی ہے۔

    ایئر چیف نے طیارہ حادثے،کرونا سے جاں بحق افراد کے لواحقین سے اظہار تعزیت کرتے ہوئے کہا کہ ہمارے دل طیارے کے المناک حادثے پر افسردہ ہیں۔

    ایئر چیف مارشل مجاہد انور خان نے اپنے پیغام میں کشمیری بہنوں اور بھائیوں کو بھی خراج تحسین کرتے ہوئے کہا کہ کشمیری بھارتی جارحیت اور مظالم کا سامنا کر رہے ہیں۔

  • پاکستان کا عید پر افغان حکومت، طالبان کی جانب سے جنگ بندی اعلان کا خیر مقدم

    پاکستان کا عید پر افغان حکومت، طالبان کی جانب سے جنگ بندی اعلان کا خیر مقدم

    اسلام آباد: حکومت پاکستان نے عید الفطر کے موقع پر افغان حکومت، طالبان کی جانب سے جنگ بندی کے اعلان کا خیر مقدم کیا ہے۔

    تفصیلات کے مطابق ترجمان دفتر خارجہ عائشہ فاروقی نے سماجی رابطے کی ویب سائٹ ٹویٹر پر پیغام میں کہا کہ پاکستان نے عید پر افغان حکومت، طالبان کی جانب سے جنگ بندی کے اعلان کا خیر مقدم کیا ہے۔

    عائشہ فاروقی کا کہنا تھا کہ افغان بھائیوں کو عید کی مبارکباد دیتے ہیں،ہم ایک پرامن،مستحکم،خوشحال افغانستان کے لیے دعاگو ہیں۔

    خیال رہے کہ ہفتے کو افغانستان میں طالبان حکومت نے افغان حکومت کے ساتھ تین دنوں کی جنگ بندی کا اعلان کیا تھا۔افغان صدر اشرف غنی نے بھی اس اعلان کا خیرمقدم کرتے ہوئے کہا کہ افغان فوج بھی اس جنگ بندی کا احترام کرے گی۔

    افغان صدر کا کہنا تھا کہ میں فوج کو ہدایت کی ہے کہ وہ تین دنوں تک جاری رہنے والی جنگ بندی کی تعمیل کریں اور صرف حملے کی صورت میں دفاع کیا جائے۔

  • ملک بھر میں عید الفطر آج منائی جا رہی ہے

    ملک بھر میں عید الفطر آج منائی جا رہی ہے

    ملک بھر میں عیدالفطر آج سادگی سے منائی جا رہی ہے اس موقع پر ملکی سلامتی اور استحکام کے لیے خصوصی دعائیں مانگی گئیں۔

    تفصیلات کےمطابق ملک کے تمام چھوٹے بڑے شہروں، قصبوں اور دیہات میں عید الفطر کی نماز کے اجتماعات منعقد کیے گئے،جس میں ملک کی سلامتی، ترقی، خوشحالی، پی آئی اے طیارہ حادثہ اور کرونا سے جاں بحق افراد کے لیے مغفرت اور بلندی درجات کی دعائیں مانگی گئیں۔

    وفاقی دارالحکومت اسلام آباد میں فیصل مسجد میں سعودی سفیر سمیت دیگر سفرا نے نماز عید ادا کی۔نماز سے قبل سیکورٹی کے سخت انتظامات کیے گئے۔

    گورنر سندھ عمران اسماعیل نے عید الفطر کی نمازگورنر ہاؤس کے لان میں ادا کی۔اراکین صوبائی اسمبلی،چیف سی پی ایل سی نے بھی نماز عید ادا کی۔

    اس موقع پر گورنر سندھ کا کہنا تھا کہ طیارہ حادثے کو یاد کرتے ہوئے عید نہایت سادگی سے منائیں،ضرورت مندوں کو اس عید پر یاد رکھیں۔

    گورنر پنجاب چوہدری محمد سرور نے گورنر ہاؤس لاہور میں نماز عید ادا کی۔اس موقع پر چوہدری محمد سرور کا کہنا تھا کہ اللہ پاکستان سے کرونا جیسی وبا کاجلدخاتمہ کرے،کرونا سے بچاؤ کے لیے عوام احتیاطی تدابیر پرعمل کریں۔

    گورنر پنجاب کا کہنا تھا کہ اللہ تعالیٰ پاکستان کو ترقی وخوشحالی،دشمنوں کے شر سے محفوظ رکھے۔

    مختلف زبانوں میں عید الفطر کا کیا نام ہے؟

    وزیراعلیٰ خیبرپختونخوا محمود خان،چیف سیکرٹری اور دیگر شخصیات نے گورنر ہاؤس پشاور میں نماز عید ادا کی۔وزیراعلیٰ بلوچستان جام کمال خان نے عیدکی نماز وزیراعلیٰ سیکریٹریٹ میں ادا کی۔

    عید الفطر کی سنتیں جانیں اوراس عید کو یادگاربنائیں

    وفاقی وزیر ریلوے نے نماز عید سے قبل والدہ کی قبر پر حاضری دی۔شیخ رشید نے اپنی والدہ کی قبر پر پھول چڑھائے اور فاتحہ خوانی کی۔انہوں نے لیاقت باغ میں نماز عید ادا کی۔

  • پاکستان میں عید الفطر کب ہوگی ؟ بڑی پیش گوئی سامنے آگئی

    پاکستان میں عید الفطر کب ہوگی ؟ بڑی پیش گوئی سامنے آگئی

    کراچی : محکمہ موسمیات نے شوال کا چاند 23مئی کو نظر نہ آنے کی پیشگوئی کرتے ہوئے کہا ہے کہ عید الفطر 25 مئی پیرکو ہونے کا امکان ہے۔

    تفصیلات کے مطابق محکمہ موسمیات نے پیش گوئی کی ہے کہ شوال کا چاند 23 مئی بروز ہفتہ کو نظر آنے کا امکان نہیں ، نئے چاند کی پیدائش 22 مئی28رمضان کو ہوگی ، پاکستان میں رات 10بجکر 39منٹ پر چاند کی پیدائش ہوگی۔

    محکمہ موسمیات کے مطابق عید الفطر25مئی پیرکوہونےکاامکان ہے، فیصلہ23مئی کوہونیوالےرویت ہلال کمیٹی کےاجلاس میں ہوگا۔

    یاد رہے رمضان المبارک کا چاند دیکھنے کیلئے پاکستان کی تاریخ میں پہلی باروزارت سائنس کورویت ہلال کمیٹی میں شامل کیا گیا تھا ، وزارت سائنس وٹیکنالوجی کے جوائنٹ سیکریٹری ڈاکٹرطارق مسعود بطورٹیکنیکل ایکسپرٹ رویت ہلال کمیٹی کا حصہ تھے۔

    وزارت سائنس نے رمضان کا چاند نظر آنے سے متعلق تصاویر جاری کی تھیں ، تصاویر میں 23 اپریل کو پشاور میں مغربی افق پر چاند کے مقام کی نشاندہی دی گئی تھی۔

    خیال رہے کہ متحدہ عرب امارات کی حکومت نے 2 ماہ قبل ہی رمضان المبارک اور عید الفطر کی تاریخوں کا اعلان کیا جس کے مطابق امارات سمیت تمام خلیجی ممالک میں رمضان المبارک کا آغاز 24 اپریل جبکہ عید الفطر 24 مئی کو ہوگی۔

  • عید تک کتنے دن مارکیٹیں کھلیں گی؟ تفصیلات جاری

    عید تک کتنے دن مارکیٹیں کھلیں گی؟ تفصیلات جاری

    کراچی: شہر قائد میں عید تک کتنے دن مارکیٹیں کھلی رہیں گی، اس سلسلے میں سندھ حکومت نے تفصیلات جاری کر دیں۔

    اے آر وائی نیوز کے مطابق کراچی میں لاک ڈاؤن میں نرمی کے بعد عید سے قبل صرف 7 دن مارکیٹیں کھلی رہیں گی، رواں ہفتے پیر سے جمعرات 4 دن مارکیٹیں کھلی رہیں گی۔

    آیندہ ہفتے پیر منگل اور بدھ (24، 25 اور 26 رمضان) کو 3 دن مارکیٹیں کھلی رہیں گی، جمعرات کو شبِ قدر کی وجہ سے مارکیٹیں بند رہیں گی، 27 رمضان کو تاجر برادری شب قدر کی وجہ سے مارکیٹیں بند رکھتے ہیں۔

    سندھ حکومت کے نوٹیفیکیشن کے مطابق جمعہ ہفتہ اور اتوار کو لاک ڈاون کی وجہ سے مارکیٹیں بند رکھی جائیں گی، کراچی میں رواں رمضان المبارک میں تاجروں کا عید سیزن صرف 7 دن کو ہوگا۔

    سندھ حکومت نے لاک ڈاؤن میں مزید31 مئی تک توسیع کر دی

    رمضان مبارک میں لاک ڈاؤن کی وجہ سے چاند رات کو خریداری ممکن نہ ہو سکے گی، 28، 29 اور 30 رمضان یعنی جمعہ، ہفتہ اور اتوار کو لاک ڈاؤن کی وجہ سے مارکیٹیں بند ہوں گی۔

    30 رمضان کو اتوار ہوگا اور پیر سے عید کی تعطیلات ہوں گی، عید کے بعد کا پہلا دن لاک ڈاؤن کا ہوگا، عید الفطر کی تعطیلات کے بعد جمعہ، ہفتہ اور اتوار یعنی 29، 30 اور 31 مئی کو لاک ڈاؤن ہوگا۔

    یاد رہے کہ سندھ حکومت نے کراچی سمیت صوبے بھر میں 31 مئی تک لاک ڈاؤن میں توسیع کی ہوئی ہے۔