Tag: عید میلاد النبی

اسلام آباد: ملک بھر میں عید میلاد النبیﷺ انتہائی عقیدت اور مذہبی جوش وجذبے سے منایا جارہا ہے، اسپورٹس کمپلیکس اسلام آباد میں 31توپوں کی سلامی سے دن کا آغاز ہوا۔

تفصیلات کے مطابق دنیا بھر میں اللہ کے نبیﷺ کی ولادت پر جشن کا سماں ہے، عاشقان رسول اپنی محبت اور عقیدت کا اظہار کررہے ہیں، لاہور میں بھی صبح بہاراں پر پاک فوج کے چاق وچوبند دستے نے اکیس توپوں کی سلامی دی، فضائیں اللہ اکبر کے فلک شگاف نعروں سے گونج اٹھیں، ملک بھر کی مساجد میں نماز فجر کے بعد پاکستان میں امن و سلامتی کے لیے خصوصی دعائیں کی گئیں۔

محفوظ شہید گریژن میں پاک فوج کے جوانوں نے اللہ اکبر اور پاکستان زندہ باد کے نعرے بلند کیے، توپوں کی سلامی کے بعد ملکی سلامتی کے لیے خصوصی دعائیں کی گئیں، آج ملک بھر میں درود و سلام اور نعت خوانی کی محافل منعقد کی جائیں گی۔

اےآروائی ڈیجیٹل پر بارہ ربیع الاول کی خصوصی نشریات

اےآروائی ڈیجیٹل پر بارہ ربیع الاول کی خصوصی نشریات "شان مصطفیٰ” سب کو بھا گئی۔ وسیم بادامی کی میزبانی میں بحریہ ٹاؤن کراچی کارنیوال ایریا میں روح پرور اجتماع ہوا۔ اس موقع پر ہزاروں افراد نے شرکت کی اور آقائے دوجہاں کی شان میں عقیدت کے پھول نچھاور کیے۔ علمائے اکرام نے سیرت طیبہﷺپر روشنی ڈالی۔

عیدمیلاد النبیﷺ کی مناسبت سے جلوس ومجالس

کراچی میں 12ربیع الاول کے موقع پر نکالے جانے والے جلوسوں کا روٹ پلان تیار کرلیا گیا، پہلا جلوس شہید مسجد کھارادر سے برآمد ہوچکا ہے جو مسجدگلزار حبیب پر پہنچ کر اختتام پذیر ہوگا، جبکہ دوسرا جلوس میمن مسجد کھارادر سے برآمد ہوکر آرام باغ مسجد پر پہنچ کر اختتام پذیر ہوگا۔

کراچی میں تیسرا جلوس میمن مسجد کھارادر سے برآمد ہوکر نشترپارک پر اختتام پذیر ہوگا، جلوسوں کے برآمد ہونے کے باعث ایم اے جناح روڈ بند کردیا گیا، عیدمیلادالنبیﷺکے سلسلے میں کورنگی روڈ پر جلوس رواں دواں ہے، جلوس کے راستوں پر سبیلیں اور لنگر کا خصوصی انتظام کیا گیا ہے، جلوس کورنگی نمبر4 رضا مسجد پہنچ کر اختتام پذیر ہوگا۔

جبکہ 12ربیع الاول پر جامعہ نعیمیہ ملیر سے نکالی گئی ریلی گھانچی مارکیٹ پہنچ گئی، ضلع کورنگی کے مختلف علاقوں میں لنگر کا اہتمام اور سبیلیں بھی لگائی گئی ہیں۔

دوسری جانب عاشقان رسول صلی اللہ علیہ وآلہ وسلم کی جانب سے جشن عید میلاد النبی صلی اللہ علیہ وآلہ وسلم کے موقع پر دریائے سندھ کشتی ریلی کا کشتی ریلی کا انعقاد کیا گیا، کشتی ریلی میں شریک سیکڑوں عاشقان رسول نے دریائے سندھ میں مرحبا یا مصطفیٰ کی صدائیں بلند کیں۔

تمام چھوٹے بڑے قصبوں، شہروں میں جلوس اور ریلیاں نکالی جارہی ہیں۔ گھروں، مساجد، مارکیٹوں اور شاہراہوں کو برقی قمقموں سے سجا دیا گیا۔ جشن عید میلاد النبی کی مناسبت سے سرکاری و نجی عمارتوں پر چراغاں کیا گیا ہے۔

آپﷺ کے حالات و کمالات اور فضائل معجزات کو بیان کرنے کا نام عید میلاد النبی ہے۔ رسول کریم ﷺ سے محبت کا تقاضا ہے کہ مسلمان متحد ہو کر امن و آشتی کا درس دیں، آپ ﷺ نے امن و محبت، بھائی چارگی اور احترام انسانیت کا درس دیا اور یہ پیغام رہتی دنیا تک قائم رہے گا۔

اس حوالے سے مختلف مقامات پر منعقدہ اجتماعات سے خطاب میں علمائے کرام کا کہنا ہے کہ عصر حاضر میں نبی کریم ﷺ کی تعلیمات پر عمل کرنا راہ نجات ہے۔