Tag: غزہ کی ناکہ بندی

صنعا : یمن کے حوثیوں نے اسرائیل کو وارننگ دیتے ہوئے غزہ کی ناکہ بندی ختم کرنے کیلیے چار دن کی مہلت دے دی۔

تفصیلات کے مطابق یمن کے حوثی رہنما عبدالملک الحوثی نے اسرائیل کو خبردار کردیا اور کہا اگر چار دن کے اندر غزہ میں امدادی سامان کی ترسیل پر عائد پابندی ختم نہ کی گئی تو اسرائیل کے خلاف اپنی بحری کارروائیاں دوبارہ شروع کریں گے۔

یاد رہے غزہ جنگ بندی کے پہلے مرحلے کا اختتام گزشتہ ہفتےکو ہوا تھا، جس کے بعد اسرائیل نے جنگ بندی میں عارضی توسیع کا یکطرفہ اعلان اس شرط پر کیا تھا کہ حماس جنگ بندی کا دوسرا مرحلہ شروع کیے بغیر مزید یرغمالی رہا کرے۔

تاہم حماس کی جانب سے انکار پر اسرائیل نے غزہ میں کھانے پینے سمیت ہر قسم کے سامان کا داخلہ روک دیا۔

واضح رہے کہ حوثی، جو مغربی یمن کے بیشتر حصے بشمول دارالحکومت صنعا پر قابض ہیں، انھوں نے غزہ جنگ کے دوران فلسطینیوں کے ساتھ یکجہتی کے اظہار کے طور پر کئی حملے کیے تھے۔

حوثیوں نے نومبر دوہزار تئیس سے رواں سال جنوری تک اس گروپ نے بحیرہ احمر میں سو سے زائد حملے کیے، جن میں تجارتی اور فوجی جہازوں کو نشانہ بنایا گیا، اور اسرائیل کی طرف میزائل اور ڈرون داغے گئے، جس سے عالمی بحری تجارت بُری طرح متاثر ہوئی۔

غزہ کی مکمل ناکہ بندی کردی گئی، اسرائیل نے فلسطینیوں کے لیے خوراک اور پانی بند کردیا ہے۔

غزہ میں موجود صحافی نے گفتگو کرتے ہوئے بتایا کہ غزہ میں صورتحال انتہائی خطرناک ہوتی جارہی ہے۔ اسرائیل کی جانب سے غزہ کی مکمل ناکہ بندی کردی گئی، غزہ کے شہریوں کے لیے خوراک اور پانی بند کردیا گیا ہے۔

غیرملکی صحافی کا کہنا تھا کہ یواین اسکولوں میں ہزاروں فلسطینی پناہ گزین موجود ہیں۔ فلسطینی پناہ گزینوں کو بجلی، پانی اور خوراک کے بغیر دیکھا ہے۔

انھوں نے بتایا کہ اسرائیلی فوج کی جانب سے باقاعدہ پیغامات دیے گئے ہیں کہ اپنے گھروں کو چھوڑ دیں۔ فلسطینی پناہ گزینوں کیلئے یواین اسکول بھی محفوظ نہیں ہیں۔

واضح رہے کہ روم میں موجود اقوام متحدہ کے ورلڈ فوڈ پروگرام (ڈبلیو ایف پی) نے اتوار کے روز غزہ تک خوراک پہنچانے کے لیے انسان دوست راہداریوں کے قیام کا مطالبہ کیا ہے۔

حماس کے مہلک حملوں کے بعد اسرائیلی فضائیہ نے غزہ کو حملوں کا نشانہ بنایا ہے، فوڈ پروگرام کا کہنا ہے کہ جیسے جیسے تنازع شدت اختیار کرتا جا رہا ہے، بچوں اور خاندانوں سمیت عام شہریوں کو خوراک تک رسائی مشکل ہوتی جا رہی ہے۔