اسلام آباد(27 اگست 2025): پاکستان نے غزہ کے علاقے خان یونس میں الناصر اسپتال پر حالیہ اسرائیلی فضائی حملے کی شدید مذمت کی ہے۔
تفصیلات کے مطابق پاکستان کی وزارت خارجہ نے ایک بیان کہا گیا کہ پاکستان خان یونس، غزہ کے ناصر اسپتال پر فضائی حملے کی شدید مذمت کرتا ہے، اسرائیلی حملوں میں 4 صحافیوں، ریسکیو ورکر سمیت کم از کم 21 افراد جاں بحق ہوئے ہیں۔
دفتر خارجہ نے بیان میں کہا کہ ’ایک طبی سہولت پر یہ غیرذمہ دارانہ اور گھناؤنا حملہ، شہریوں اور صحافیوں کو مسلسل نشانہ بنانا، بین الاقوامی انسانی حقوق اور انسانی قانون کے علاوہ آزادی صحافت کی سنگین خلاف ورزی ہے۔‘
پاکستان نے مطالبہ کیا کہ عالمی برادری اسرائیل کو سنگین جرائم پر جواب دہ قرار دے، اسرائیل کی مسلسل جارحیت کو ختم کرنے کیلئے عملی اقدامات کیے جائیں۔
ترجمان دفتر خارجہ نے جاری بیان میں کہا کہ پاکستان شام کی خودمختاری، آزادی، علاقائی سالمیت کی مکمل حمایت کرتا ہے، عالمی برادری اسرائیل کو پورے خطے کے امن کو نقصان پہنچانے سے روکے۔
واضح رہے کہ فلسطینی محکمہ صحت کے حکام نے پیر کو بتایا تھا کہ غزہ کے جنوبی علاقے خان یونس میں الناصر میڈیکل کمپلیکس پر حالیہ اسرائیلی فضائی حملے میں کم از کم 20 افراد جان سے گئے تھے، جن میں صحافی اور امدادی کارکن بھی شامل تھے۔
https://urdu.arynews.tv/hamas-challenge-israel-nasser-hospital-27-aug-2025/
