ARYNews.tv | Urdu – Har Lamha Bakhabar

Tag: غزہ

  • غزہ: سرنگ میں دھماکا، 2 اسرائیلی فوجی واصل جہنم، 2 زخمی

    غزہ: سرنگ میں دھماکا، 2 اسرائیلی فوجی واصل جہنم، 2 زخمی

    اسرائیلی فوج کی جانب سے گزشتہ روز غزہ میں 2 فوجیوں کے ہلاک ہونے کی تصدیق کردی گئی ہے۔

    غیر ملکی میڈیا رپورٹس کے مطابق غزہ کے جنوبی علاقے رفح میں ہفتے کے روز ایک سرنگ کے دہانے پر زور دار دھماکا ہوا تھا، جس کے باعث ایک کیپٹن سمیت دو اسرائیلی فوجی ہلاک اور دو زخمی ہوگئے۔

    اسرائیلی فوج کا اس حوالے سے کہنا ہے کہ مرنے والے اہلکار فوج کے ایلیٹ ’یہالوم‘ انجینیئرنگ یونٹ سے تعلق رکھتے تھے اور گولانی بریگیڈ کے ماتحت ڈیوٹی انجام دے رہے تھے۔

    اسرائیلی فوج کا بتایا ہے کہ اہلکار ایک عمارت کے اندر سرنگ کے داخلی راستے کو چیک کررہے تھے کہ دھماکا ہوگیا، جس کے باعث دو فوجی موقع پر ہی ہلاک ہوگئے۔

    اسرائیلی میڈیا کے مطابق غزہ میں زمینی کارروائی کے دوران مرنے والے اسرائیلی فوجیوں کی تعداد اب بڑھ کر 416 ہو گئی ہے۔

    دوسری جانب اسرائیل نے غزہ پر جنگ کو وسعت دینے کے لیے دسیوں ہزار ریزرو اہلکاروں کو بلایا ہے۔

    آرمی چیف ایال ضمیر کا کہنا ہے کہ اسرائیلی فوج محصور غزہ کی پٹی پر ملک کے حملے کو بڑھانے کے لیے دسیوں ہزار محافظوں کو بلائے گی۔

    انہوں نے اتوار کے روز یہ اعلان اسرائیلی وزیر اعظم بنجمن نیتن یاہو کی جانب سے اسرائیل کے اندر سے ایک معاہدے کے لیے بڑھتی ہوئی کالوں کے باوجود جنگ جاری رکھنے کے وعدہ کے طور پر کیا ہے۔

    شدید لڑائی جاری ہے، بدقسمتی سے مزید فوجی کھو دیے ہیں، نیتن یاہو

    ایال ضمیر نے کہا کہ اس ہفتے، ہم اپنے ریزرو اہلکاروں کو غزہ میں اپنی کارروائی کو تیز کرنے اور وسعت دینے کے لیے دسیوں ہزار ڈرافٹ آرڈر بھیج رہے ہیں ہم اپنے لوگوں کو واپس کرنے اور حماس کو شکست دینے کے لیے دباؤ بڑھا رہے ہیں۔

  • بھوک اور پیاس سےغزہ والے دم توڑنے لگے، 57 فلسطینی جاں بحق

    بھوک اور پیاس سےغزہ والے دم توڑنے لگے، 57 فلسطینی جاں بحق

    غزہ: بھوک اور پیاس سےغزہ والے دم توڑنے لگے ہیں، 57 فلسطینی جاں بحق ہو گئے۔

    الجزیرہ کے مطابق بین الاقوامی برادری غزہ میں امداد بحال نہ کرا سکی، 2 ماہ سے اسرائیل نے محصور علاقے میں امداد نہیں آنے دی، جس کی وجہ سے لاکھوں لوگوں کی زندگیاں داؤ پر لگی ہیں۔

    فلسطینی حکام کا کہنا ہے کہ غذا کی قلت کے سبب اب تک ستاون افراد زندگی ہار چکے ہیں۔ غزہ کے سرکاری میڈیا آفس نے ہفتے کے روز کہا کہ جاں بحق افراد میں بچوں کے ساتھ ساتھ بیمار اور بوڑھے بھی شامل ہیں، اسرائیل جنگ کے ہتھیار کے طور پر بھوک کو استعمال کر رہا ہے، بین الاقوامی برادری اسرائیل پر سرحدیں دوبارہ کھولنے اور امداد کی اجازت دینے کے لیے دباؤ ڈالے۔

    بین الاقوامی تنظیموں کا کہنا ہے کہ غزہ کی سرحد پر کھانے اور پانی کے ہزاروں ٹرک کھڑے ہیں، لیکن اسرائیل داخلے کی اجازت نہیں دے رہا۔ اقوام متحدہ کی امدادی ایجنسی انروا کا کہنا ہے کہ علاقے میں آٹے کا ذخیرہ ختم ہو چکا ہے، 75 فی صد افراد کو پانی تک میسر نہیں ہے۔

    قومی سلامتی کے برطرف مشیر والٹز نے ٹرمپ سے ملاقات سے قبل کس سے رابطہ کیا تھا؟ امریکی اخبار کا انکشاف

    یونیسف کا کہنا ہے کہ 4 ماہ میں 9000 بچے خوارک کی کمی سے دو چار ہوئے ہیں، جنھیں طبی امداد دی گئی۔

    واضح رہے کہ اسرائیلی جارحیت برقرار ہے، گزشتہ چوبیس گھنٹوں کے دوران اسرائیلی بمباری میں 3 بچوں سمیت 45 فلسطینی شہید ہوئے، رفح میں رہائشی عمارت پر بم برسائے گئے، خان یونس میں اسرائیلی حملے میں 11 فلسطینی شہید ہوئے۔ دوسری طرف اسرائیل فورسز نے غزہ میں جنگ کا دائرہ وسیع کرنے کا عندیہ دے دیا ہے، جس کے لیے مزید نفری طلب کر لی گئی ہے۔

  • ترک دلہن نے کروڑوں مالیت کا سونا اہل غزہ کیلئے عطیہ کردیا

    ترک دلہن نے کروڑوں مالیت کا سونا اہل غزہ کیلئے عطیہ کردیا

    ترک دلہن جس کا تعلق ترکی کے صوبے باتمان سے بتایا جارہا ہے، دوسروں کے لیے مثال قائم کرتے ہوئے اپنے ولیمے پر ملنے والا کروڑوں مالیت کا سونا غزہ کے مظلوم عوام کی مدد کے لیے عطیہ کر دیا۔

    رپورٹس کے مطابق ترک دلہن کی جانب سے اہل غزہ کے لئے عطیہ کئے گئے سونے کی مالیت تقریباً 40 ہزار ڈالر یعنی ایک کروڑ 12 لاکھ روپے کے قریب ہے۔

    دلہن نے اپنا نام ظاہر نہ کرنے کی درخواست کرتے ہوئے کہا ہے کہ وہ اپنی شادی کو ایک نیک مقصد کی شروعات بنانا چاہتی ہیں تاکہ غزہ کے مظلوم عوام کی زیادہ سے زیادہ مدد ہوسکے۔

    دلہن نے اُمید ظاہر کرتے کہا کہ ان کا یہ اقدام دوسروں کے لیے بھی جذبہ ہمدردی اور یکجہتی کی تحریک بنے گا، خصوصاً ان حالات میں جب ”اسرائیلی” جارحیت کی وجہ سے فلسطینی عوام شدید مشکلات سے دوچار ہیں۔

    دوسری جانب اشتعال انگیز بیانات دینے والے انتہا پسند اسرائیلی وزیر خزانہ نے کہا ہے کہ فلسطینیوں کے غزہ سے نکلنے کے بعد ہی اسرائیل جنگ بند کرے گا۔

    اسرائیلی وزیر خزانہ Bezalel Smotrich کا کہنا ہے کہ اسرائیل جنگ صرف اس وقت روکے گا جب ملک شام کو ”منتشر”کر دیا جائے گا، حزب اللہ کو ”بدترین0 شکست”دی جائے گی، ایران سے اس کا جوہری پروگرام چھین لیا جائے گا اور غزہ کے لاکھوں فلسطینی پٹی سے نکل جائیں گے اور اسرائیلی قیدیوں کو واپس کر دیا جائے گا۔

    ٹائمز آف اسرائیل نے اسموٹریچ کے حوالے سے رپورٹ کیا کہ پالیسی منصوبوں کے بارے میں ہم آپس میں بحث کرتے رہیں گے، بھرتی کے مسائل کے بارے میں، شناخت کے مسائل کے بارے میں اور اقتصادی مسائل کے بارے میں اور دشمن کی تباہی کے بارے میں۔۔۔۔ اس پر کوئی تنازعہ نہیں ہو سکتا۔

    اسرائیلی فوج کا غزہ میں ظلم جاری، مزید 60 سے زائد فلسطینی شہید

    انہوں نے کہا کہ نیتن یاہو کے پاس اس موقع پر کھلنے والی کھڑکی سے محروم ہونے کا اختیار نہیں ہے۔

  • اسرائیلی فوج کا غزہ میں ظلم جاری، مزید 60 سے زائد فلسطینی شہید

    اسرائیلی فوج کا غزہ میں ظلم جاری، مزید 60 سے زائد فلسطینی شہید

    اسرائیلی فوج کی جانب سے غزہ میں ظلم و بربریت کا سلسلہ جاری ہے، جس کے نتیجے میں مزید 60 سے زائد فلسطینی جام شہادت نوش کرگئے۔

    بین الاقوامی خبر رساں ادارے کی رپورٹ کے مطابق اسرائیلی فوج نے تازہ حملوں میں گھروں سے محروم کیمپوں میں پناہ لئے ہوئے معصوم فلسطینیوں کو نشانہ بنایا۔ جس کے نتیجے میں گزشتہ 24 گھنٹوں میں مزید 60 سے زیادہ فلسطینی شہید ہوگئے۔

    واضح رہے کہ غزہ میں امداد کی بندش پر عالمی عدالت انصاف میں اسرائیل کے خلاف سماعت جاری ہے، جنوبی افریقا کے نمائندے کا کہنا ہے کہ امداد بند کرکے اسرائیل پوری دنیا کے سامنے غزہ میں نسل کشی کر رہا ہے۔

    اس کے علاوہ ایمنسٹی انٹرنیشنل نے سالانہ رپورٹ میں فلسطینیوں کی جبری بے دخلی کو نسل کشی قرار دے دیا۔

    دوسری جانب اسرائیل کی حکومت نے خفیہ ادارے شن بیٹ کے سربراہ کی برطرفی کے سلسلے میں اپنے نئے فیصلے سے عدالت کو آگاہ کر دیا ہے۔

    اسرائیلی حکومت نے منگل کو سیکیورٹی چیف رونن بار کی برطرفی کا فیصلہ واپس لے لیا ہے، نیتن یاہو حکومت نے رونن بار کی برطرفی کا فیصلہ معطل کرنے سے عدالت کو آگاہ کر دیا۔

    نیتن یاہو نے شن بیٹ کے سربراہ رونن بار کو مارچ میں برطرف کر دیا تھا، تاہم اسرائیلی سپریم کورٹ نے نیتن یاہو حکومت کے فیصلے کو روک دیا تھا، اسرائیلی حکومت کے فیصلے نے بڑے پیمانے پر مظاہروں کو بھی جنم دیا تھا۔

    امریکی وزیر خارجہ کا پاکستانی اور بھارتی وزرائے خارجہ سے رابطے کا فیصلہ

    اے ایف پی کے مطابق سپریم کورٹ میں جمع کرائی گئی دستاویز میں کہا گیا ہے کہ ”حکومت نے رونن بار کو برطرف کرنے کے لیے 20 مارچ 2025 کے اپنے فیصلے کو منسوخ کرنے کا فیصلہ کیا ہے۔“

  • اسرائیلی فوج کی غزہ میں بربریت، 5 بچوں سمیت 44 فلسطینی شہید

    اسرائیلی فوج کی غزہ میں بربریت، 5 بچوں سمیت 44 فلسطینی شہید

    غزہ میں اسرائیلی فوج کی جانب سے ظلم و بربریت کا سلسلہ جاری ہے، ڈرون حملے کے نتیجے میں 5 بچوں سمیت 44 فلسطینی جام شہادت نوش کرگئے۔

    عرب خبر رساں ادارے کی رپورٹ کے مطابق غزہ میں صبح سے جاری اسرائیلی فوج کے حملوں میں 44 فلسطینی شہید ہوگئے جبکہ اسرائیلی ڈرون حملے کے نتیجے میں 5 معصوم بچے بھی جام شہادت نوش کرگئے۔

    دوسری جانب انسانی حقوق کی عالمی تنظیم ایمنسٹی انٹرنیشنل کا کہنا ہے کہ اسرائیل غزہ میں نسل کشی کو براہ راست نشر کر رہا ہے جبکہ فلسطینیوں کا صفایا کرنے کے مخصوص ارادے کے ساتھ غیر قانونی اقدامات کر رہا ہے۔

    قطری نشریاتی ادارے الجزیرہ کی رپورٹ کے مطابق ایمنسٹی انٹرنیشنل نے اپنی سالانہ رپورٹ میں کہا کہ غزہ میں اسرائیلی فورسز نے اقوام متحدہ کے نسل کشی کنونشن کی خلاف ورزی کی، بین الاقوامی برادری اور بین الاقوامی عدالت انصاف کی وارننگ کے باوجود اسرائیل نے غزہ تک انسانی امداد کی رسائی کو روکا اور جنوبی شہر رفح پر حملہ کیا۔

    انسانی حقوق کی تنظیم نے کہا کہ اسرائیلی فضائی حملوں میں عام شہریوں کو بھی نشانہ بنایا گیا جو انخلا کے احکامات پر عمل کر رہے تھے، اسرائیلی فورسز نے فلسطینیوں کو زبردستی حراست میں لینا اور ان کو غائب کرنے کا عمل جاری رکھا۔

    ایمنسٹی انٹرنیشنل کے سیکریٹری جنرل اگنیس کالمارڈ نے رپورٹ میں کہا کہ 7 اکتوبر 2023 کو فلسطینی مزاحمتی تنظیم حماس کے حملے کے بعد سے اسرائیل نے دنیا کو غزہ میں براہ راست نشر ہونے والی نسل کشی کا سامعین بنایا ہے۔

    ’اسرائیل نے ہزاروں فلسطینیوں کو مار ڈالا، کئی خاندانوں کو صفحہ ہستی سے مٹا دیا، گھروں، اسپتالوں اور اسکولوں کو تباہ کر دیا۔ ایسے میں دیگر ممالک کمزور دکھائی دیتے ہیں۔‘

    اگنیس کالمارڈ نے کہا کہ اسرائیل اور اس کے طاقتور اتحادیوں بشمول امریکا نے ایسا ظاہر کیا جیسے ان پر بین الاقوامی قانون کا نفاذ نہیں ہوتا۔

    امریکی لڑاکا طیارہ ایف 18 سمندر میں گر کر تباہ

    ایمنسٹی انٹرنیشنل نے امریکی صدر ڈونلڈ ٹرمپ سمیت دیگر قوتوں کے بارے میں بھی خطرے کی گھنٹی بجاتے ہوئے کہا کہ یہ عالمی سطح پر انسانی حقوق کیلیے خطرہ ہیں۔

  • آل سٹی تاجر اتحاد نے آج ہونے والی ہڑتال سے لاتعلقی کا اعلان کر دیا

    آل سٹی تاجر اتحاد نے آج ہونے والی ہڑتال سے لاتعلقی کا اعلان کر دیا

    کراچی: آل سٹی تاجر اتحاد نے آج غزہ کے ساتھ اظہار یکجہتی کے لیے کیے جانے والی ہڑتال سے لاتعلقی کا اعلان کر دیا ہے۔

    تفصیلات کے مطابق آل سٹی تاجر اتحاد کے رہنما شرجیل گوپلانی نے ایک بیان میں آج جماعت اسلامی کی جانب سے اعلان شدہ ہڑتال سے لاتعلقی کا اظہار کرتے ہوئے کہا ہے کہ کراچی ٹمبر مارکیٹ مکمل طور پر کھلی رہے گی۔

    شرجیل گوپلانی نے کہا ہمارا کسی ہڑتال سے کوئی تعلق نہیں ہے، ہم 7 اپریل کو کر چکے ہیں۔ دوسری طرف صدر آل پاکستان انجمن تاجران اجمل بلوچ نے کہا ہے کہ ملک بھر میں آج غزہ بچاؤ ہڑتال ہوگی، ملک بھر کے ایک کروڑ سے زائد تاجر اپنا کاروبار بند رکھیں گے۔

    ’اب 26 اپریل کی ہڑتال اسرائیل امریکا اور بھارت کیخلاف ہو گی‘

    اجمل بلوچ نے کہا اسلام آباد کے تاجر شام 5 بجے آبپارہ چوک میں احتجاج کریں گے، ہمارا مطالبہ ہے کہ غزہ پر اسرائیلی حملے روکنے میں ناکامی پر اقوام متحدہ کے سیکریٹری جنرل اپنے عہدے سے مستعفی ہوں۔

    واضح رہے کہ جماعت اسلامی پاکستان کی جانب سے آج ملک بھر میں غزہ کے ساتھ یکجہتی کے لیے ہڑتال کی جا رہی ہے، امیر جماعت اسلامی پاکستان حافظ نعیم الرحمان نے کہا ہے کہ 26 اپریل کی ہڑتال اسرائیل، بھارت اور امریکا کے خلاف ہے، یہ شیطانی ٹرائی اینگل پوری دنیا میں بدامنی کا سبب ہے، جس کے خلاف قوم متحد ہو کر پیغام دے کہ وہ اہل غزہ سے پیار کرتی ہے۔

    ادھر راولپنڈی میں آل پاکستان پرائیویٹ اسکول ایسوسی ایشن نے بھی آج ملک گیر ہڑتال کا اعلان کیا ہے، صدر ابرار خان نے کہا تمام تعلیمی ادارے بند رہیں گے، ہڑتال کا اعلان فلسطینیوں سے اظہار یکجہتی کے لیے کیا گیا ہے۔

  • اسرائیلی فوج کی غزہ میں بمباری، مزید 55 فلسطینی شہید

    اسرائیلی فوج کی غزہ میں بمباری، مزید 55 فلسطینی شہید

    اسرائیلی فوج کی جانب سے غزہ میں خون کی ہولی کھیلنے کا سلسلہ جاری ہے، 24 گھنٹوں کے دوران مزید 55 فلسطینیوں کو شہید کردیا۔

    بین الاقوامی خبر رساں ادارے کی رپورٹ کے مطابق اسرائیلی فوج نے پناہ گزین کیمپوں، اسکولوں، اسپتالوں اور مارکیٹوں پر بمباری کی جس کے نتیجے میں ایک روز میں مزید 55 فلسطینی جام شہادت نوش کرگئے۔

    اسرائیلی قابض فوج نے شمالی غزہ سے ایک بار پھر بے گھر فلسطینیوں کو انخلا کا حکم جاری کردیا ہے۔

    دوسری جانب بین الاقوامی ادارہ برائے مہاجرین آئی او ایم نے غزہ سے متعلق انکشاف کرتے ہوئے کہا ہے کہ غزہ میں 90 فیصد سے زائد مکانات مکمل یا جزوی طور پر ملبے کا ڈھیر بن چکے ہیں، جس سے لاکھوں افراد کھلے آسمان تلے زندگی گزارنے پر مجبور ہو گئے ہیں۔

    رپورٹ کے مطابق (IOM) نے اسرائیل سے مطالبہ کیا ہے کہ وہ انسانی بنیادوں پر غزہ میں داخلے کے راستے فوری طور پر کھولے تاکہ متاثرہ افراد کو امداد پہنچائی جاسکے۔

    آئی او ایم (IOM) نے اقوام متحدہ کے انسانی امور کی رابطہ ایجنسی (OCHA) کے ڈیٹا کا حوالہ دیتے ہوئے کہا کہ اسرائیل کی جاری کارروائیوں کے باعث غزہ کے شہری شدید انسانی بحران کا سامنا کررہے ہیں۔

    گزشتہ روز ایک بیان میں آئی او ایم کا کہنا تھا کہ محفوظ جگہ نہ ہونے کے باعث خاندان کھنڈرات میں پناہ لینے پر مجبور ہیں۔

    ادارے کا کہنا ہے کہ امدادی سامان اور پناہ گاہی سہولیات موجود ہیں لیکن داخلی راستوں کی بندش کے باعث غزہ میں انسانی امداد کی فراہمی ممکن نہیں ہو رہی۔ آئی او ایم نے واضح کیا کہ اگر راستے کھول دیے جائیں تو فوری طور پر متاثرین کو ضروری امداد فراہم کی جا سکتی ہے۔

    پہلگام حملہ: قابض بھارتی فوج نے ایک اور کشمیری نوجوان کو شہید کر دیا

    واضح رہے کہ اسرائیل نے 2 مارچ سے غزہ کے داخلی راستوں کو مکمل طور پر بند کر رکھا ہے، جس کے باعث نہ صرف امدادی سامان کی فراہمی معطل ہو چکی ہے بلکہ قحط کے خدشات بھی بڑھ گئے ہیں۔

  • اقوام متحدہ کا غزہ سے متعلق ہولناک انکشاف

    اقوام متحدہ کا غزہ سے متعلق ہولناک انکشاف

    بین الاقوامی ادارہ برائے مہاجرین آئی او ایم نے غزہ سے متعلق انکشاف کرتے ہوئے کہا ہے کہ غزہ میں 90 فیصد سے زائد مکانات مکمل یا جزوی طور پر ملبے کا ڈھیر بن چکے ہیں، جس سے لاکھوں افراد کھلے آسمان تلے زندگی گزارنے پر مجبور ہو گئے ہیں۔

    بین الاقوامی خبر رساں ادارے کی رپورٹ کے مطابق (IOM) نے اسرائیل سے مطالبہ کیا ہے کہ وہ انسانی بنیادوں پر غزہ میں داخلے کے راستے فوری طور پر کھولے تاکہ متاثرہ افراد کو امداد پہنچائی جاسکے۔

    آئی او ایم (IOM) نے اقوام متحدہ کے انسانی امور کی رابطہ ایجنسی (OCHA) کے ڈیٹا کا حوالہ دیتے ہوئے کہا کہ اسرائیل کی جاری کارروائیوں کے باعث غزہ کے شہری شدید انسانی بحران کا سامنا کررہے ہیں۔

    گزشتہ روز ایک بیان میں آئی او ایم کا کہنا تھا کہ محفوظ جگہ نہ ہونے کے باعث خاندان کھنڈرات میں پناہ لینے پر مجبور ہیں۔

    ادارے کا کہنا ہے کہ امدادی سامان اور پناہ گاہی سہولیات موجود ہیں لیکن داخلی راستوں کی بندش کے باعث غزہ میں انسانی امداد کی فراہمی ممکن نہیں ہو رہی۔ آئی او ایم نے واضح کیا کہ اگر راستے کھول دیے جائیں تو فوری طور پر متاثرین کو ضروری امداد فراہم کی جا سکتی ہے۔

    واضح رہے کہ اسرائیل نے 2 مارچ سے غزہ کے داخلی راستوں کو مکمل طور پر بند کر رکھا ہے، جس کے باعث نہ صرف امدادی سامان کی فراہمی معطل ہو چکی ہے بلکہ قحط کے خدشات بھی بڑھ گئے ہیں۔

    غزہ کے بیشتر علاقے صیہونی افواج کی کارروائیوں کے نتیجے میں تباہ ہوچکے ہیں، اور تقریباً پوری آبادی بے گھر ہو چکی ہے۔

    دوسری جانب اسرائیلی پبلک براڈ کاسٹر نے غزہ جنگ بندی توڑنے کیلیے اسرائیلی فوج کا دعویٰ جھوٹا اور من گھڑت قرار دے دیا۔

    اسرائیلی پبلک براڈ کاسٹر نے اسرائیلی فوج کی جانب سے سرنگ کے دعوے پر رپورٹ جاری کردی۔جسمیں کہا گیا ہے کہ اسرائیلی فوج کی جانب سے غزہ مصر کی سرحد کے ساتھ فلاڈیلفی کوریڈور میں سرنگ کا دعویٰ کیا گیا تھا، فوج نے جنگ بندی معاہدہ توڑنے کیلئے سرنگ کا جعلی دعویٰ کیا۔،

    رپورٹ کے مطابق اگست میں اسرائیلی فوج نے سرحد کے ساتھ سرنگ کی جعلی تصاویر جاری کی تھیں، اسرائیلی پبلک براڈ کاسٹر کے مطابق یہ سرنگ کبھی نہیں تھی بلکہ یہ گندگی سے ڈھکی ایک نہر تھی۔

    نیتن یاہو کی ایران کو ایک بار پھر دھمکی

    اسرائیلی فوج کے دعوے کا مقصد فلاڈیلفی کوریڈور کو بڑھا چڑھا کر پیش کرنا تھا، سابق اسرائیلی وزیر دفاع یووگیلنٹ نے اسرائیلی پبلک براڈ کاسٹر رپورٹ کی تصدیق کردی۔

  • غزہ میں پناہ گزینوں کے خیموں پر بمباری، مزید 45 فلسطینی شہید

    غزہ میں پناہ گزینوں کے خیموں پر بمباری، مزید 45 فلسطینی شہید

    غزہ میں اسرائیلی جارحیت کا نہ رکنے والا سلسلہ تاحال جاری ہے، چوبیس گھنٹے کے دوران 45 فلسطینی شہید ہوگئے۔

    غیر ملکی ذرائع ابلاغ کے مطابق غزہ میں اسرائیلی فورسز نے پناہ گزینوں کے خیموں پر وحشیانہ بمباری کی، نصیرات کیمپ میں اسرائیلی بمباری میں تین بچوں سمیت 13 افراد شہید ہوئے۔

    شیخ رودان میں بمباری میں چار بچوں سمیت چھ فلسطینی جام شہادت نوش کرگئے، جبکہ مغربی کنارے پر قبضہ کرنے کیلئے اسرائیل کی غنڈہ گردی کا سلسلہ جاری ہے۔

    اسرائیلی فورسز نے تین ماہ سے جنین میں محاصرہ کر رکھا ہے، داخلے کے تمام راستے بند کردیئے ہیں، قابض فورسز نے لوہے کے دروازے لگا دئیے ہیں۔

    دوسری جانب یمن کے حوثی باغیوں نے شمالی اسرائیل کی جانب بیلسٹک میزائل سے حملہ کیا ہے، جسے اسرائیلی فوج نے ناکام بنانے دعویٰ کیا ہے۔

    قطری نشریاتی ادارے الجزیرہ کی رپورٹ کے مطابق اسرائیلی فوج نے تصدیق کی کہ یمن کے حوثیوں نے بیلسٹک میزائل سے حملہ کیا جسے مار گرایا۔

    اسرائیلی فوج کے مطابق بیلسٹک میزائل سے علی الصبح 4 بجے کے قریب حملہ کیا گیا جس کے فوراً بعد حیفہ، کریوٹ اور دیگر علاقوں میں فضائی حملے کے سائرن بجائے گئے۔

    یہ علاقہ حوثی باغیوں کیلیے ایک غیر معمولی ہدف ہے جہاں وہ امریکا کی شدید فضائی حملے کی مہم کا نشانہ بنے ہوئے ہیں۔

    اکتوبر 2023 میں غزہ میں جنگ شروع ہونے کے بعد سے حوثیوں نے کئی بار اسرائیل پر میزائل اور ڈرون فائر کیے جنہیں وہ فلسطینیوں کے ساتھ اظہار یکجہتی قرار دیتے ہیں۔

    اسرائیل کی غزہ میں شیلٹر اسکولوں پر وحشیانہ بمباری، متعدد فلسطینی شہید

    حوثی باغی یمن کے ایک بڑے علاقے پر قابض ہے اور اسرائیل نے دارالحکومت صنعا سمیت ملک کے اندر کئی بار حوثیوں کے ٹھکانوں کو نشانہ بنایا ہے۔

  • اسرائیل کی غزہ میں شیلٹر اسکولوں پر وحشیانہ بمباری، متعدد فلسطینی شہید

    اسرائیل کی غزہ میں شیلٹر اسکولوں پر وحشیانہ بمباری، متعدد فلسطینی شہید

    غزہ میں اسرائیلی افواج کی جانب سے خون کی ہولی کھیلنے کا سلسلہ جاری ہے، اسپتالوں اور شیلٹر اسکولوں پر ہونے والے تازہ ترین حملے میں 10 فلسطینی شہید ہوگئے۔

    بین الاقوامی خبر رساں ادارے کی رپورٹ کے مطابق اسرائیلی افواج نے شیلٹر اسکولوں پر بمباری کی، جس کے باعث شدید آگ بھڑک اُٹھی اور 10 فلسطینی شہید ہوگئے، جس میں 1 بچہ بھی شامل ہے۔

    رپورٹس کے مطابق کل سے اب تک ہونے والی اسرائیلی بمباری کے نتیجے میں 32 فلسطینی جام شہادت نوش کرچکے ہیں۔

    غزہ سول ڈیفنس کے مطابق اسرائیل نے غزہ سٹی کے علاقے کو خطرناک علاقہ قرار دیا ہوا ہے، بمباری کے سبب ملبے تلے موجود مزید متعدد فلسطینیوں تک پہنچنا ممکن نہیں ہے۔

    دوسری جانب اسرائیلی پبلک براڈ کاسٹر نے غزہ جنگ بندی توڑنے کیلیے اسرائیلی فوج کا دعویٰ جھوٹا اور من گھڑت قرار دے دیا۔اسرائیلی پبلک براڈ کاسٹر نے اسرائیلی فوج کی جانب سے سرنگ کے دعوے پر رپورٹ جاری کردی۔

    رپورٹ میں کہا گیا ہے کہ اسرائیلی فوج کی جانب سے غزہ مصر کی سرحد کے ساتھ فلاڈیلفی کوریڈور میں سرنگ کا دعویٰ کیا گیا تھا، فوج نے جنگ بندی معاہدہ توڑنے کیلئے سرنگ کا جعلی دعویٰ کیا۔،

    رپورٹ کے مطابق اگست میں اسرائیلی فوج نے سرحد کے ساتھ سرنگ کی جعلی تصاویر جاری کی تھیں، اسرائیلی پبلک براڈ کاسٹر کے مطابق یہ سرنگ کبھی نہیں تھی بلکہ یہ گندگی سے ڈھکی ایک نہر تھی۔

    اسرائیلی فوج کے دعوے کا مقصد فلاڈیلفی کوریڈور کو بڑھا چڑھا کر پیش کرنا تھا، سابق اسرائیلی وزیر دفاع یووگیلنٹ نے اسرائیلی پبلک براڈ کاسٹر رپورٹ کی تصدیق کردی۔

    غزہ پر اسرائیلی فوج کے وحشیانہ حملے، ایک دن میں 32 فلسطینی شہید

    سابق اسرائیلی وزیردفاع کے مطابق دعوے کا مقصد جنگ بندی معاہدے کو توڑنا تھا، یووگیلنٹ کے مطابق دعوے کا مقصد حماس کے ساتھ معاہدے تک پہنچنے سے روکنا تھا۔