Tag: غزہ

غزہ : اسرائیلی حملوں میں شہید فلسطینیوں کی تعداد پچاس ہزار سے تجاوز کر گئی تاہم اموات کی اصل تعداد کہیں زیادہ ہوسکتی ہے۔

تفصیلات کے مطابق غزہ میں اسرائیلی جارحیت جاری ہے ، وزارت صحت نے کی تصدیق کی ہے سترہ ماہ سے مسلط جنگ میں شہید فلسطینیوں کی تعداد 50 ہزارسے بڑھ گئی، جن میں سترہ ہزار بچے شامل ہیں۔

گزشتہ چوبیس گھنٹے میں اسرائیلی وحشیانہ حملوں میں مزید اکتالیس فلسطینی شہید اور 61 زخمی ہوئے تھے، شہید فلسطینیوں میں زیادہ تعداد بچوں اورخواتین کی ہے۔

وزارت نے مزید کہا کہ جب سے غزہ کی پٹی میں لڑائی شروع ہوئی ہے، تقریباً 113,274 فلسطینی زخمی ہو چکے ہیں۔

یو این حکام کا کہنا ہے کہ غزہ میں اموات کی اصل تعداد رپورٹ کی گئی تعداد سے کہیں زیادہ ہوسکتی ہے کیونکہ تباہ شدہ عمارتوں کے ملبے میں ہزاروں فلسطینیوں کی لاشیں تاحال موجود ہونے کا خدشہ ہے۔

دوسری جانب قاہرہ میں عرب لیگ کا وزارتی اجلاس ہوا، اجلاس میں غزہ پرحملے فوری بند اور محاصرہ ختم کرنے کا مطالبہ کیا گیا۔

امریکی وزیرخارجہ مارکو روبیو نے اسرائیلی وزیراعظم کو ٹیلی فون کیا اور غزہ میں جنگ بندی اوریرغمالیوں کی رہائی سےمتعلق گفتگوکی۔

یاد رہے یہ جنگ 7 اکتوبر 2023 کو اسرائیل پر حماس کے حملے سے شروع ہوئی تھی، جس میں تقریباً 1,200 افراد، جن میں زیادہ تر عام شہری تھے، مارے گئے تھے اور 251 دیگر کو یرغمال بنایا گیا تھا۔

اسرائیل نے جنگ بندی کی خلاف ورزی کرتے ہوئے غزہ میں دوبارہ قتل وغارت گری شروع کر دی جس پر جمائما گولڈ اسمتھ بھی بول پڑیں۔

غاصب صہیونی ریاست اسرائیل نے ماہ رمضان میں جنگ بندی کی خلاف ورزی کرتے ہوئے غزہ پر زمینی اور فضائی حملے شروع کر دیے اور دو روز میں 470 سے زائد فلسطینیوں کو شہید کر دیا۔

ان حملوں میں 100 سے زائد بچے بھی شہید کیے گئے جس پر دنیا بھر سے آواز اٹھائی جا رہی ہے اور اب اس میں جمائما گولڈ اسمتھ کی آواز بھی شامل ہوگئی ہے۔

بانی پی ٹی آئی عمران خان کی سابق اہلیہ جمائما گولڈ اسمتھ نے اسرائیلی جارحیت پر بین الاقوامی رہنماؤں کی خاموشی پر سوال اٹھاتے ہوئے کہا ہے کہ غزہ میں 18 مارچ کو 130 بچوں کے قتل پر دنیا خاموش کیوں ہے۔

جمائما نے سوشل میڈیا پر جاری پیغام میں بین الاقوامی رہنماؤں کا ضمیر جھنجھورٹے ہوئے لکھا کہ 7 اکتوبر کو ایک شیر خوار سمیت 36 اسرائیلی بچوں کے قتل پر بین

الاقوامی رہنماؤں نے شدید مذمت کی تھی اور ان کی یاد مناتی ہے۔ لیکن 18 مارچ کو 130 فلسطینی بچوں کو سوتے میں قتل کیا تو تو اب دنیا خاموش ہے۔

انہوں نے کہا کہ یہ سب غزہ میں معمول بن چکا ہے، جس پر کوئی بات نہیں کر رہا۔ کسی اخبار کے صفحہ اول پر اس کی خبر نہیں ہے۔

 اسرائیلی فوج جنگ بندی کی خلاف ورزی کے بعد دو روز کے دوران اب تک 183 فلسطینی بچے شہید کر چکی ہے۔

واضح رہے کہ جمائما اسرائیل کے اکتوبر 2023 سے جاری غزہ پر وحشیانہ بمباری کی شدید الفاظ میں مذمت کرتی آئی ہیں۔ اس سے قبل بھی جمائما خان نے اسرائیل کی حمایت اور فلسطینوں کی مخالفت کرنے پر اپنے بھائیوں زیک گولڈ اسمتھ اور بین گولڈ اسمتھ کو بھی سوشل میڈیا پر آڑے ہاتھوں لیا تھا۔

https://urdu.arynews.tv/australian-cricket-also-raised-its-voice-over-the-martyrdom-of-palestinian-children/

اسرائیلی فوج کی جنگ بندی کی خلاف ورزی کے بعد بربریت کا سلسلہ جاری غزہ پر دوبارہ بمباری میں مزید 37 فلسطینی شہید کر دیے گئے۔

اسرائیلی فوج نے منگل سے جنگ بندی کی خلاف ورزی کرتے ہوئے غزہ پر فضائی حملوں کا سلسلہ شروع کیا تھا جو زمینی حملوں تک دراز ہو گیا ہے۔ صہیونی فوج نے وسطی اور جنوبی حصوں پر دوبارہ زمینی کارروائیاں شروع کر دی ہیں۔

عرب میڈیا کے مطابق اسرائیلی توپ خانے کی گولہ باری میں غزہ شہر کے الزیتون محلے اور شمالی غزہ میں مشرقی بیت حنون کو نشانہ بنایا۔ غزہ کی پٹی کے شمال میں بیت لاہیہ کے قصبے میں ایک مکان پر اسرائیلی فضائی حملے میں 14 فلسطینی شہید ہوگئے جن کا تعلق ایک ہی خاندان سے تھا جب کہ متعدد زخمی بھی ہوئے۔

گزشتہ روز بمباری میں 70 سے زیادہ فلسطینی شہید ہوئے تھے اور ان میں اقوام متحدہ کا کارکن بھی جان سے گیا تھا۔ جب کہ رات بھر جاری رہنے والے زمینی اور فضائی حملوں میں نومولود سمیت مزید 37 افراد شہید ہوئے۔

اسرائیلی حملوں میں دو دن میں 470 سے زائد فلسطینی شہید ہوچکے ہیں۔ ان میں خواتین اور بچوں کی بھی بڑی تعداد شامل ہے۔

حماس کے سیاسی بیورو کے سربراہ کے میڈیا ایڈوائزر طاہر النونو نے ثالث ممالک اور عالمی برادری سے مطالبہ کیا ہے کہ وہ اسرائیل کو اپنی جارحیت روکنے، جنگ بندی کے معاہدے پر عمل درآمد کرنے اور جنگ بندی کے دوسرے مرحلے کا آغاز کرنے پر مجبور کریں جو 19 جنوری کو نافذ ہوا تھا۔

انہوں نے مزید کہا ہے کہ تحریک نے مذاکرات کے دروازے بند نہیں کیے ہیں اور تمام فریقین کے دستخط شدہ موجودہ معاہدے کی روشنی میں نئے معاہدوں کی ضرورت نہیں ہے۔

ایک اسرائیلی اہلکار نے تصدیق کی ہے کہ اگر حماس مزید یرغمالیوں کے حوالے کرنے پر راضی ہوتی ہے تو تل ابیب نے مذاکرات کا دروازہ بند نہیں کیا ہے تاہم غزہ کی پٹی میں حماس کے خلاف اسرائیل کی نئی حملوں کی مہم اس وقت تک جاری رہے گی جب تک کہ باقی تمام مغویوں کو رہا نہیں کیا جاتا۔

اسرائیلی وزیر دفاع نے دھمکی دی ہے کہ یہ غزہ والوں کیلیے آخری وارننگ ہے کہ وہ قیدی واپس کریں اور حماس کو اقتدار سے ہٹائیں۔

دوسری جانب اسرائیلی وزیراعظم نیتن یاہو نے غزہ کے بعد مغربی کنارے میں بھی حملے کی دھمکی دیدی ہے۔

https://urdu.arynews.tv/israels-worst-bombing-in-ramadan-174-children-martyred/

ریاض : سعودی کابینہ نے اسرائیلی قابض افواج کی جانب سے غزہ پر دوبارہ جارحیت کی شدید مذمت کی اور عالمی برادری سے مطالبہ کیا وہ فلسطینی عوام پر جاری مظالم کو رکوانے کے لیے فوری مداخلت کرے۔

تفصیلات کے مطابق سعودی ولی عہد اور وزیرِ اعظم شہزادہ محمد بن سلمان کی زیرِ صدارت سعودی کابینہ کے اجلاس یوا ، جس میں اسرائیلی قابض افواج کی جانب سے غزہ پر دوبارہ جارحیت کی شدید مذمت کی گئی۔

اجلاس میں اسرائیل کی جنگ بندی کی خلاف ورزی پر تشویش کااظہار کرتے ہوئے عالمی برادری سے فوری مداخلت اور اسرائیلی جنگی جرائم روکنے کا مطالبہ کردیا۔

سعودی کابینہ کے اجلاس میں اہم بین الاقوامی اور اقتصادی امور پر غور کیا گیا، کابینہ نے سعودی عرب اور پاکستان کے درمیان کسٹمز تعاون اور باہمی مدد کے معاہدے کی منظوری دی۔

اس کے علاوہ سعودی عرب اور پاکستان کے درمیان تکنیکی اور پیشہ ورانہ تربیت کے شعبے میں تعاون کے لیے مفاہمتی یادداشت کی بھی توثیق کی گئی۔

مزید پڑھیں : غزہ کی قیادت اور القدس کے ترجمان سمیت 400 سے زائد شہید

واضح رہے کہ اسرائیلی فوج نے جنگ بندی کے باوجود ایک بار پھر غزہ پر بمباری کی ہے جس کے نتیجے میں اب تک 400 سے زیادہ فلسطینی شہید ہو چکے ہیں۔

اسرائیلی بمباری میں غزہ کے وزیراعظم ، نائب وزیرداخلہ ، نائب وزیر انصاف ، داخلی سیکیورٹی کے ڈائریکٹر اور حماس کے سیاسی بیورو کے رکن بھی شہید ہوگئے۔