Tag: غزہ

غزہ: اسرائیلی فورسز نے ایک بار پھر غزہ میں امدادی گاڑی پر بمباری کر دی، جس میں 4 فلسطینیوں کی قیمتی جانیں تلف ہو گئیں۔

صہیونی فورسز نے غزہ میں امداد لانے والے قافلے کو بھی نہ بخشا، الجزیرہ کے مطابق انیرا امدادی گروپ کے صدر اور سی ای او شان کیرول نے بتایا کہ اسرائیلی فورسز نے فضائی حملے کا انتباہ دیے بغیر بمباری شروع کر دی، جس میں غزہ میں امدادی قافلے کو لے کر جانے والے چار فلسطینی مارے گئے۔

اقوام متحدہ کے مطابق فلسطینی اماراتی ہلال احمر کے اسپتال جانے والے امدادی قافلے کی گاڑی میں سوار تھے، اقوام متحدہ کا کہنا ہے کہ اگست میں اسرائیلی فورسز کے امدادی کارکنوں پر حملوں میں دگنا اضافہ ہوا۔ امدادی قافلوں کو نشانہ بنانے سے غزہ میں خوراک، ادویات اور امدادی سامان کی ترسیل مشکل ہو گئی ہے۔

الجزیرہ کے نمائندے نے رپورٹ کیا کہ مقبوضہ مغربی کنارے کے علاقے جنین میں ایک فلسطینی پیرامیڈیکس کو بھی اس وقت گولی ماری گئی، جب اس نے ایک 82 سالہ شخص کی گولیوں سے چھلنی لاش نکال کر لے جانے کی کوشش کی۔

غزہ کے شہری دفاع اور فلسطینی پناہ گزینوں کے لیے اقوام متحدہ کی ایجنسی UNRWA کے مطابق شمال میں جبالیہ اور جنوب میں خان یونس سمیت پورے غزہ میں حالیہ اسرائیلی حملوں میں کم از کم 12 فلسطینی مارے گئے ہیں، جن میں ایک معذور شخص اور کئی بچے بھی شامل ہیں، جب کہ گزشتہ ایک ہفتے کے دوران اسرائیلی بمباری میں 167 فلسطینی شہید اور 300 افراد زخمی ہوئے۔

اسرائیلی فورسز نے جنین شہر کا محاصرہ کر لیا ہے، جس کی وجہ سے فلسطینی باشندے خوراک، پانی، بجلی اور انٹرنیٹ تک رسائی سے محروم ہو گئے ہیں۔

واضح رہے کہ غزہ میں اتوار کو پولیو کے قطرے پلانے کی مہم شروع ہونے والی ہے، جب کہ امدادی گروپوں نے خدشات ظاہر کے ہیں کہ اسرائیل کے جاری حملوں کی وجہ سے ان کی کارروائیوں میں رکاوٹیں پیدا ہو گئی ہیں۔

غزہ: اسرائیل ایک طرف غزہ میں جنگ بندی مذاکرات کا ڈھونگ رچا رہا ہے، دوسری طرف وحشیانہ بمباری کا سلسلہ مسلسل جاری رکھے ہوئے ہے۔

غیر ملکی میڈیا رپورٹس کے مطابق دہشت گرد اسرائیل کی جانب سے جنگی جرائم اور فلسطینیوں کی نسل کشی جاری ہے، اسرائیلی فوج نے غزہ میں اسکول، بازار، مکانات اور فون چارجنگ پوائنٹ پر بمباری کی ہے۔

غزہ کی پٹی میں گزشتہ چوبیس گھنٹوں میں اسرائیلی حملوں میں کم از کم 52 فلسطینی شہید ہو گئے ہیں، جن میں 12 غزہ سٹی کے ایک اسکول اور 9 دیر البلح کے ایک پرہجوم بازار والے علاقے میں مارے گئے۔

اسرائیلی بربریت اور دہشت گردی میں شہید فلسطینیوں کی تعداد 40 ہزار 173 ہو گئی ہے، اسرائیلی حملوں میں زخمی فلسطینیوں کی تعداد 92 ہزار 857 ہو گئی، جب کہ متعدد لاپتا ہیں۔

شہادتیں جبالیہ، دیر البلح، رفح اور خان یونس پر اسرائیلی فورسز کے حملے میں ہوئی ہیں، الجزیرہ کے مطابق شمالی غزہ میں جبالیہ پناہ گزین کیمپ کے علاقے تل عز الزاطر میں اسرائیلی فورسز کی ایک رہائشی عمارت پر بمباری میں متعدد فلسطینی شہید اور زخمی ہوئے۔ اسرائیلی فورسز نے جنوبی شہر رفح اور قریبی علاقے خان یونس میں بھی حماد محلے میں عمارتوں کو دھماکے سے اڑایا۔ وسطی دیر البلح کے مشرقی حصوں پر بھی وحشیانہ گولہ باری کی گئی۔

غزہ جنگ بندی مذاکرات، قطر کے تجزیہ کار نے امریکی چال بازیاں بے نقاب کر دیں

ادھر مذاکرات کے سلسلے میں اسرائیل اور مصر کا دورہ کر کے امریکی وزیر خارجہ انٹونی بلنکن دوحہ پہنچے اور قطری وزیر اعظم سے ملاقات کی، انٹونی بلنکن کا کہنا تھا کہ اسرائیلی وزیر اعظم نے ملاقات کے دوران انھیں امریکا کے تجویز کردہ جنگ بندی معاہدے پر رضامندی سے متعلق آگاہ کیا، جنگ بندی معاہدے پر عمل درآمد تین مراحل میں ہوگا، جس کے لیے تمام اسٹیک ہولڈرز کو مل کر کام کرنا ہوگا۔

تاہم حماس نے معاہدے کی شرائط مسترد کر دی ہیں اور کہا ہے کہ امریکا نے نیتن یاہو کی خواہش کے مطابق نئی شرائط رکھ دی ہیں، جب کہ انھیں پرانی امریکی تجاویز پر عمل درآمد کرانا چاہیے۔ فلسطینی حکام نے بھی امریکا کو غزہ میں قتل عام کا ذمے دار ٹھہرایا ہے۔