ARYNews.tv | Urdu – Har Lamha Bakhabar

Tag: غزہ

  • خان یونس: اسرائیلی فوج نے صحافیوں پر براہ راست گولیاں بر سا دیں

    خان یونس: اسرائیلی فوج نے صحافیوں پر براہ راست گولیاں بر سا دیں

    غزہ: خان یونس میں اسرائیل مظالم کی کوریج کرنے والے صحافیوں پر صہیونی فوج نے براہِ راست گولیاں برسا دیں۔

    ترک نیوز ایجنسی انادولو کے مطابق اسرائیلی فورسز نے جنوبی غزہ میں خان یونس پر وحشیانہ زمینی حملے کی کوریج کرنے والے صحافیوں پر براہ راست گولیاں برسا دیں، جس میں ایک فلسطینی خاتون صحافی پیٹھ میں گولی لگنے سے شدید زخمی ہو گئیں۔

    اسرائیل فوج نے غزہ میں صحافیوں کو نشانے پر رکھ لیا ہے، صحافیوں نے اسرائیلی فوج کی گولیوں سے بھاگ کر جانیں بچائیں، خاتون صحافی سلمیٰ القدومی کو پیٹھ میں گولی لگی، جس پر انھیں دیر البلح کے الاقصیٰ شہدا اسپتال لے جایا گیا ہے۔

    عینی شاہدین نے انادولو کو بتایا کہ اسرائیلی فوجیوں نے القدومی اور ساتھی صحافیوں پر براہ راست گولیاں چلائیں، جب اسرائیلی فوجی گاڑیاں خان یونس میں حماد رہائشی کمپلیکس کی طرف بڑھیں تو شدید گولہ باری کی آوازیں سنی گئیں۔

    دریں اثنا، مختلف علاقوں میں اسرائیلی بمباری کے نتیجے میں مزید 25 فلسطینی شہید ہو گئے ہیں، ادھر القسام بریگیڈ نے اسرائیلی قافلے پر ایک حملے کی ویڈیو جاری کی ہے، جس میں متعدد صہیونی فوج کے اہلکاروں کی ہلاکت کا دعویٰ کیا گیا ہے۔

    خیال رہے کہ گزشتہ برس 7 اکتوبر سے جاری اسرائیلی بربریت کے نتیجے میں اب تک 40 ہزار سے زائد فلسطینی شہید اور 92 ہزار 609 زخمی ہو چکے ہیں۔

  • اسرائیل کی وحشیانہ بمباری میں شہید فلسطینیوں کی تعداد 40 ہزار سے تجاوز کر گئی

    اسرائیل کی وحشیانہ بمباری میں شہید فلسطینیوں کی تعداد 40 ہزار سے تجاوز کر گئی

    غزہ: فلسطین کے محصور علاقے میں اسرائیل کی وحشیانہ بمباری میں شہید فلسطینیوں کی تعداد 40 ہزار سے تجاوز کر گئی ہے۔

    الجزیرہ کے مطابق غزہ کی پٹی میں گزشتہ دس ماہ سے جاری وحشیانہ اسرائیلی بمباری میں کم از کم 40,005 فلسطینی شہید اور 92,401 زخمی ہو چکے ہیں۔

    غزہ میں جنگ بندی کی امید پیدا ہونے کے باوجود اسرائیل کے جنگی جنون میں دن بہ دن اضافہ ہو رہا ہے، اسرائیلی فوج نے وسطی غزہ کے علاقے الزاویدہ میں گزشتہ روز رات بھر بے گھر لوگوں کے خیموں پر بم برسائے، جس میں 15 فلسطینی شہید ہو گئے۔

    اسرائیل نے شمالی اور جنوبی غزہ میں بڑے پیمانے پر انخلا کا پھر حکم جاری کر دیا ہے، جن میں جنوب کے وہ علاقے بھی شامل ہیں جنھیں اسرائیل نے ’’محفوظ زون‘‘ کے طور پر نشان زد کیا تھا۔

    غزہ جنگ بندی معاہدے کو کمزور نہ کریں، جو بائیڈن نے فریقین کو خبردار کر دیا

    الجزیرہ نے مقامی میڈیا رپورٹس کے حوالے سے بتایا کہ ایک اسرائیلی میزائل نے جنوبی غزہ کے شہر خان یونس میں گھوڑا گاڑی کو نشانہ بنایا، جس میں کم از کم 2 فلسطینی مارے گئے، جن کی لاشیں ناصر اسپتال منتقل کی گئیں۔ خان یونس کے مغرب میں حماد شہر میں ایک خیمے میں سوئے ہوئے 6 سالہ بچے کو بھی اسرائیلی کواڈ کاپٹر نے نشانہ بنایا، بچہ سر میں گولی لگنے سے شہید ہو گیا۔

  • اسرائیلی جارحیت صحت کے لیے بھی خطرہ، غزہ میں 25 سال بعد پولیو کا پہلا کیس سامنے آ گیا

    اسرائیلی جارحیت صحت کے لیے بھی خطرہ، غزہ میں 25 سال بعد پولیو کا پہلا کیس سامنے آ گیا

    غزہ میں اسرائیلی جارحیت شہریوں کی صحت کے لیے بھی خطرہ بن گئی ہے، غزہ میں 25 سال بعد پولیو کا پہلا کیس سامنے آ گیا ہے۔

    فلسطینی وزارت صحت کے حکام کے مطابق دیر البلح میں 10 ماہ کی بچی میں پولیو کی تصدیق ہو گئی ہے، 10 ماہ سے جاری جنگ کے باعث غزہ میں پولیو کی ویکسین نہیں لگائی گئی۔

    اقوام متحدہ کے سیکریٹری جنرل انتونیو گوتریس نے اپیل کی ہے کہ انسانی بنیادوں پر غزہ میں فوری جنگ بندی کی جائے تاکہ پولیو کی مہم شروع کی جا سکے، ساڑھے 6 لاکھ بچوں کو پولیو سے بچاؤ کے قطرے پلانے ضروری ہے۔ واضح رہے کہ ڈبللیو ایچ او پہلے ہی غزہ میں پولیو پھیلنے سے خبردار کر چکا ہے۔

    حماس نے اس حوالے سے ایک بیان میں کہا کہ بچوں کو پولیو سے بچاؤ کے قطرے پلانے کے لیے جنگ روکنے کی اقوام متحدہ کی درخواست کا خیر مقدم کرتے ہیں۔

    خیال رہے کہ غزہ میں اسرائیلی وحشیانہ بمباریوں میں اب تک کم از کم 40,005 فلسطینی شہید اور 92,401 زخمی ہو چکے ہیں۔

  • غزہ میں ظلم جاری، شہید فلسطینیوں کی تعداد 40 ہزار سے تجاوز کرگئی

    غزہ میں ظلم جاری، شہید فلسطینیوں کی تعداد 40 ہزار سے تجاوز کرگئی

    غزہ میں اسرائیلی فوج کی بربریت کا سلسلہ 7 اکتوبر 2023 سے جاری ہے، جس کے باعث شہید ہونے والے فلسطینیوں کی تعداد 40 ہزار سے تجاوز کرگئی۔

    بین الاقوامی خبر رساں ادارے کی رپورٹ کے مطابق غزہ کی وزارت دفاع کی جانب سے جاری اعداد و شمار سے پتہ چلتا ہے کہ غزہ میں جنگ کے آغاز سے اب تک 40 ہزار 5 افراد اسرائیلی حملوں کے نتیجے میں جام شہادت نوش کرچکے ہیں۔

    فلسطینیوں پر ظلم و بربریت کے باعث 92 ہزار 401 افراد سرائیلی حملوں کی زد میں آکر زخمی ہوچکے ہیں، وزارت صحت کا کہنا ہے کہ شہدا میں سے 33 فیصد بچے اور 18.4 فیصد خواتین شامل ہیں۔

    غزہ میں رواں ماہ کے آغاز میں اسرائیلی جارحیت کے 300 روز مکمل ہونے پر جاری کئے گئے اعدادو شمار کے مطابق غزہ کے انفرااسٹرکچر کو اسرائیلی حملوں کے نتیجے میں بھی شدید ترین نقصان پہنچا ہے اور اس مد میں 33 ارب ڈالر کے براہ راست نقصانات ہوئے ہیں۔

    سرکاری اعداد و شمار بتاتے ہیں کہ اسرائیلی حملوں میں غزہ کے 34 اسپتالوں اور 68 مراکز صحت کو بھی نشانہ بنایا گیا جس کے نتیجے میں وہ غیر فعال ہوچکے ہیں۔

    تائیوان میں زلزلہ، عمارتیں لرز گئیں

    اس کے علاوہ 610 مساجد، 3 گرجا گھر، ایک لاکھ 50 ہزار رہائشی یونٹ، 198 سرکاری عمارتیں، 117 تعلیمی ادارے، 206 آثار قدیمہ، 34 کھیلوں کے مراکز، 3 ہزار کلومیٹر سے زائد بجلی کی ترسیل کا نظام اور 700 پانی کے کنویں تباہ ہوچکے ہیں۔

  • غزہ میں اسکول پر وحشیانہ اسرائیلی حملے نے دنیا کو پھر ’نیند‘ سے جگا دیا

    غزہ میں اسکول پر وحشیانہ اسرائیلی حملے نے دنیا کو پھر ’نیند‘ سے جگا دیا

    فلسطین کے محصور علاقے غزہ میں ایک اسکول پر وحشیانہ اسرائیلی حملے نے دنیا کو ایک بار پھر ’نیند‘ سے جگا دیا ہے، اسرائیل نے بربریت کا بدترین مظاہرہ کرتے ہوئے غزہ پر جارحیت میں اب تک 39,790 فلسطینیوں کو موت کی نیند سلایا ہے، تاہم پوری دنیا اسرائیل کی درندگی کو روکنے کے لیے کوئی اقدام نہیں کر سکی ہے۔

    الجزیرہ کے مطابق ایک طرف جب کہ غزہ شہر کے اسکول پر، جو پناہ گزینوں کی رہائش گاہ تھی، اسرائیل کے تازہ ترین حملے کے بعد طبی عملہ اور زندہ بچ جانے والے متاثرین کے جسم کے اعضا اکٹھے کر رہے اور لاپتا افراد کو ڈھونڈ رہے ہیں، وہاں دوسری طرف عالمی رہنما اس بمباری کے خلاف حسب معمول مذمتی بیانات جاری کر رہے ہیں۔

    اسکول پر اسرائیلی حملے کے بعد الجیریا نے منگل کو سیکیورٹی کونسل کا ہنگامی اجلاس بلانے کی درخواست دے دی ہے۔ اقوام متحدہ میں فلسطینی مندوب نے کہا کہ اسکول پر اسرائیلی حملے سے ظاہر ہوتا ہے کہ اسرائیل جنگ بندی نہیں چاہتا۔

    کینیڈا، ترکیہ، سعودی عرب سمیت دیگر عرب ممالک نے بھی اسرائیلی وحشیانہ حملے کی شدید الفاظ میں مذمت کی۔ قطر نے پناہ گزین اسکول پر حملے کی عالمی سطح پر تحقیقات کا مطالبہ کیا ہے۔ ترکیہ کا کہنا ہے کہ غزہ کے التابعین اسکول پر حملہ اسرائیل کا انسانیت کے خلاف ایک اور نیا جرم ہے۔

    امریکی نائب صدر کملا ہیرس نے بھی حملے پر تشویش کا اظہار کیا، کملا ہیرس نے کہا حملے میں بڑی تعداد میں لوگ جان سے گئے، فریقین جنگ بندی کے لیے مذاکرات پر زور دیں۔

    روسی وزارت خارجہ کا کہنا ہے کہ اسرائیل غزہ میں شہریوں کو منظم طریقے سے نشانہ بنا رہا ہے، اسرائیلی حملے غزہ جنگ بندی کی بین الاقوامی کوششوں کو سبوتاژ کر رہے ہیں، روس نے مطالبہ کیا کہ اسرائیل شہریوں پر حملے فوری روکے۔

  • غزہ میں اسرائیلی فوج کی اسکول پر بمباری، 100 فلسطینی شہید

    غزہ میں اسرائیلی فوج کی اسکول پر بمباری، 100 فلسطینی شہید

    غزہ: اسرائیلی فوج نے غزہ میں ایک اسکول پر وحشیانہ بمباری کرتے ہوئے 100 سے زائد فلسطینیوں کو شہید کر دیا۔

    الجزیرہ عربی کی رپورٹ کے مطابق غزہ شہر کے علاقے الدرج میں التبین اسکول پر اسرائیلی حملے کے نتیجے میں 100 سے زائد فلسطینی شہید ہو گئے ہیں۔

    صہیونی فورسز نے حملہ صبح فجر کے وقت کیا، جب لوگ نماز پڑھ رہے تھے، بمباری کے باعث اسکول کے مختلف حصوں میں آگ لگ گئی، رپورٹس کے مطابق اسکول میں بے گھر افراد نے پناہ لے رکھی تھی۔

    ایران نے بحری بیڑے میں ہزاروں جدید کروز میزائل نصب کر دیے

    دیر البلح سے الجزیرہ کے رپورٹر نے بتایا کہ اس حملے ویڈیو سے واضح ہو جاتا ہے کہ لوگ نماز پڑھ رہے تھے، اور یہ ایک جان بوجھ کر کیا گیا حملہ تھا، نہ صرف عام شہریوں کے خلاف بلکہ مذہبی حقوق کی بھی خلاف ورزی تھی، اس سے یہ اشارہ ملتا ہے کہ ایسی کوئی چیز نہیں ہے جو اسرائیلی فوج کو اپنے حملے جاری رکھنے سے روک سکے۔

    دوسری طرف طبی ذرائع نے الجزیرہ عربی کو بتایا کہ غزہ کی پٹی پر بھی متعدد تباہ کن حملے کیے گئے ہیں، جس میں کم از کم 35 فلسطینی شہید ہوئے، جن میں خان یونس میں 19 شہید شامل ہیں۔ شمالی غزہ کے علاقے جبالیہ میں ابو خلیفہ خاندان کے گھر پر اسرائیلی لڑاکا طیاروں کی بمباری کے نتیجے میں کم از کم 6 فلسطینی شہید اور 15 زخمی ہوئے۔

    وسطی غزہ میں دیر البلح کے مشرق میں المزرعہ اسکول کے قریب ایک خیمے پر اسرائیلی فوج کی بمباری میں 3 بچوں سمیت 4 فلسطینی شہید ہوئے۔ وسطی غزہ میں نصیرات پناہ گزین کیمپ میں حمدا خاندان کے گھر پر اسرائیلی حملے کے نتیجے میں کم از کم 4 فلسطینی شہید ہوئے۔

  • اسرائیلی فوج نے غزہ کے پناہ گزینوں پر بم برسا دیئے، 40 فلسطینی شہید

    اسرائیلی فوج نے غزہ کے پناہ گزینوں پر بم برسا دیئے، 40 فلسطینی شہید

    اسرائیلی فوج کی غزہ میں بربریت کا سلسلہ تھمنے کا نام نہیں لے رہا، غزہ میں اسکولوں میں پناہ گزینوں پر شدید بمباری کے باعث 40 فلسطینی شہید ہوگئے۔

    بین الاقوامی خبر رساں ا دارے کی رپورٹ کے مطابق اسرائیلی فوج نے غزہ میں بے گھر فلسطینیوں کی پناہ گاہ بنے ہوئے اسکولوں پر بم برسا ئے، جس کے باعث بڑے پیمانے پر جانی نقصان ہوا۔

    اسرائیلی فوج کی وحشیانہ بمباری سے صبح سے اب تک 40 سے زیادہ فلسطینی جام شہادت نوش کرچکے ہیں، ڈرون حملے سے الاقصٰی شہدا اسپتال کے صحن میں بے گھر افراد کے خیموں میں آگ بھڑک اُٹھی۔

    دوسری جانب ایرانی صدر مسعود پزشکیان نے اسرائیل پر حملے کے سلسلے میں دو ٹوک پیغام دے دیا ہے۔

    ایرانی میڈیا کے مطابق ایران کے نئے منتخب ہونے والے صدر مسعود پزشکیان نے کہا ہے کہ اسرائیل کے خلاف جوابی کارروائی کے لیے وہ سنجیدہ ہیں، اسرائیل کے جرم پر اس کا احتساب ضرور کیا جائے گا۔

    ایرانی صدر نے حماس کے پولیٹیکل بیورو کے سربراہ اسماعیل ہنیہ کے قتل کو اسرائیل کی بڑی غلطی قرار دے دیا، اور کہا کہ یہ بہیمانہ قتل عالمی قوانین کی خلاف ورزی ہے، اور اسرائیل کو اس کا جواب دینا ہوگا۔

    بنگلہ دیش میں حالات قابو سے باہر، ہلاکتیں 300 ہوگئیں، کرفیو دوبارہ نافذ

    قائم مقام ایرانی وزیر خارجہ علی باقری نے کہا کہ اسرائیل کی خطرناک مہم جوئی سے خطے کی سلامتی کو خطرہ لاحق ہو گیا ہے، اس لیے مسلم ممالک اس سلسلے میں ایک متفقہ اور فیصلہ کُن مؤقف اپنائیں۔

  • غزہ پر اسرائیلی فوج کا ظلم جاری، مزید 11فلسطینی شہید

    غزہ پر اسرائیلی فوج کا ظلم جاری، مزید 11فلسطینی شہید

    غزہ کے مظلوم فلسطینیوں پر اسرائیلی مظالم کا سلسلہ تاحال جاری ہے، تازہ حملوں میں مزید 11فلسطینی جام شہادت نوش گئے۔

    بین الاقوامی خبر رساں ادارے کی رپورٹ کے مطابق مغازی کیمپ میں اسرائیلی فوجی جارحیت سے 8 اور نصیرات پناہ گزین کیمپ میں گھر پر حملے میں 3 فلسطینی شہید ہوئے۔

    غیرملکی میڈیا کا کہنا ہے کہ 7 اکتوبر سے جاری اسرائیلی حملوں میں شہید فلسطینیوں کی تعداد 39 ہزار 400 سے زائد ہوگئی ہے۔

    دوسری جانب فلسطین کی آزادی کی داعی تنظیم حماس کے سربراہ شہید اسماعیل ہنیہ کی نماز جنازہ ایران کے دارالحکومت تہران میں ادا کر دی گئی۔

    گزشتہ روز ایران میں میزائل حملے میں شہید کیے جانے والے حماس کے سربراہ اسماعیل ہنیہ کی نماز جنازہ تہران یونیورسٹی میں ادا کر دی گئی۔

    ایران کے رہبر اعلیٰ آیت اللہ علی خامنہ ای نے اسماعیل ہنیہ کی نماز جنازہ پڑھائی۔ جس میں خواتین سمیت مختلف مکاتب فکر کے لوگوں کی بڑی تعداد نے شرکت کی۔

    نماز جنازہ کے بعد اسماعیل ہنیہ کا جسد خاکی قطر کے دارالحکومت دوحہ منتقل کیا جائے گا جہاں ان کی نماز جنازہ کل نماز جمعہ کے بعد امام محمد بن عبدالوہاب مسجد میں ادا کی جائے گی۔

    ایران میں انتقام کی علامت ’سرخ پرچم‘ لہرا دیا گیا

    یاد رہے کہ گزشتہ روز ایران میں حماس کے سربراہ اسماعیل ہنیہ کو میزائل حملے میں شہید کر دیا گیا تھا۔ وہ ایرانی صدر کی تقریب حلف برداری میں شرکت کیلیے تہران گئے تھے، حملے میں اسماعیل ہنیہ کا ایک محافظ بھی شہید ہوا۔

  • اسرائیلی ٹینکوں کی جنوبی خان یونس میں بھی پیش قدمی، 36 فلسطینی شہید، 120 زخمی

    اسرائیلی ٹینکوں کی جنوبی خان یونس میں بھی پیش قدمی، 36 فلسطینی شہید، 120 زخمی

    غزہ میں رہائشی علاقوں میں اسرائیلی فورسز کے وحشیانہ حملے جاری ہیں، خان یونس صہیونی فوج کی تازہ کارروائی میں 36 فلسطینی شہید اور 120 زخمی ہو گئے۔

    الجزیرہ کے مطابق اسرائیل کی فوج نے غزہ کی پٹی پر اپنی بے دریغ بمباری جاری رکھی ہے، اسرائیلی ٹینکوں نے جنوبی خان یونس میں بھی پیش قدمی شروع کر دی، جہاں بہت سے فلسطینی خاندان 6 دن سے اسرائیلی زمینی حملے کے بعد سے خوراک، پانی اور ادویات کے بغیر پھنسے ہوئے ہیں۔

    رپورٹس کے مطابق المواصی کے پناہ گزین کیمپ پر اسرائیلی فورسز نے بم برسا دیے، جس میں بچوں سمیت تین فلسطینی جان سے گئے، گزشتہ چوبیس گھنٹوں میں 66 فلسطینی شہید اور 241 زخمی ہو چکے ہیں۔

    وسطی بوریج اور نصیرات کے پناہ گزین کیمپوں پر بھی حملہ کرنے کے چند گھنٹوں بعد وہاں پناہ لینے والے دسیوں ہزار فلسطینیوں کو علاقوں سے فرار ہونے کا حکم دیا گیا۔ صہیونی فوج نے مشرقی خان یونس کے بعد وسطی خان یونس سے بھی بے گھر فلسطینیوں کو جبری علاقہ خالی کرنے کے احکامات صادر کر دیے ہیں۔

    گولان ہائٹس حملہ، اسرائیل کے بعد امریکا نے بھی الزام حزب اللہ پر دھر دیا

    اقوام متحدہ کے ادارے (یو این آر ڈبلیو اے) نے کہا ہے کہ غزہ کی پٹی کا 86 فی صد حصہ اس وقت انخلا کے احکامات کی زد میں ہے۔ بوریج کیمپ خالی کرنے کے احکامات کے بعد کیمپ کی ایک خاتون نے کہا کہ وہ 10 بار بے گھر ہو چکی ہے، ایک فلسطینی نے کہا ہمارے لیے کوئی حل تلاش کریں، بہت ہو گیا، ہم کہاں جائیں؟

    اسرائیلی ٹینکوں نے جنوبی غزہ میں بھی پیش قدمی بڑھا دی ہے، جہاں اسرائیلی فورسز کو فلسطینی گروپس کی جانب سے سخت مزاحمت کا سامنا ہے، جانبازوں نے کئی اسرائیلی ٹینک تباہ کیے اور ایک اسرائیلی فوجی بھی مارا گیا۔ فلسطینی میڈیا کے مطابق اسرائیلی توپ خانے نے غزہ کے جنوبی شہر خان یونس کے مرکز میں شیخ ناصر محلے پر بمباری کی، مشرق میں واقع خزاعہ اور اباسن الکبیرہ کے قصبوں پر بھی بمباری کی گئی، الجزیرہ عربی کے مطابق اسرائیلی فورسز نے خان یونس کے شمال میں واقع قصبے القرارا میں رہائشی عمارتوں کو دھماکے سے اڑا دیا۔

    گزشتہ برس 7 اکتوبر سے صہیونی فورسز کے حملوں میں شہدا کی مجموعی تعداد 39,324 ہو چکی ہے، جب کہ 90,830 زخمی ہوئے۔

  • اسرائیل نے بچوں اور مریضوں کا قتل عام بند نہ کیا، بچوں سمیت 50 سے زائد فلسطینی شہید

    اسرائیل نے بچوں اور مریضوں کا قتل عام بند نہ کیا، بچوں سمیت 50 سے زائد فلسطینی شہید

    اسرائیل نے بچوں اور مریضوں کا قتل عام بند نہ کیا، اسپتال اور اسکول پر بمباری میں بچوں سمیت 50 سے زائد فلسطینی شہید ہو گئے۔

    اسرائیلی طیاروں نے غزہ کے علاقے دیر البلح میں اسکول کو نشانہ بنایا، جسے فیلڈ اسپتال اور پناہ گاہ کے طور پر استعمال کیا جا رہا تھا، اور اس میں بے گھر خاندان مقیم تھے۔

    اسکول پر بمباری میں 15 بچوں سمیت ہلاکتوں کی تعداد 32 ہو چکی ہے، خان یونس میں گھر پر اسرائیلی حملے میں 15 فلسطینی شہید ہو گئے، بنی صالح میں بھی بمباری سے ایک بچے سمیت 2 شہری شہید ہوئے۔

    غزہ میں شہادتوں کی مجموعی تعداد 39 ہزار 258 تک پہنچ چکی ہے جس میں ہزاروں کی تعداد میں بچے شامل ہیں۔

    غزہ کے خان یونس کے ایک اسپتال میں کام کرنے والے ٹراما سرجن فیروز سدھوا نے کہا ہے کہ اسرائیل پر جان بوجھ کر بچوں کو نشانہ بنا رہا ہے، انھوں نے کہا ’’ہم روزانہ کی بنیاد پر دیکھ رہے ہیں کہ بچوں کو سر اور سینے میں گولیاں ماری گئی ہیں۔‘‘