ARYNews.tv | Urdu – Har Lamha Bakhabar

Tag: غزہ

  • ایلون مسک کا غزہ کے لیے بڑا اعلان

    ایلون مسک کا غزہ کے لیے بڑا اعلان

    ایلون مسک نے ’ایکس‘ کی کمائی غزہ اور اسرائیل کے اسپتالوں کو دینے کا اعلان کر دیا ہے۔

    سماجی رابطوں کی ویب سائٹ ایکس کے مالک اور ارب پتی ایلون مسک نے اعلان کیا ہے کہ ایکس جنگ زدہ غزہ کی پٹی اور اسرائیل کے اسپتالوں میں اشتہارات اور سبسکرپشن سے حاصل ہونے والی آمدنی عطیہ کرے گا۔

    مسک نے ایکس پوسٹ میں لکھا ’’ایکس کارپوریشن غزہ میں جنگ سے متعلق اشتہارات اور سبسکرپشن سے حاصل ہونے والی تمام آمدنی اسرائیل کے اسپتالوں اور غزہ میں ریڈ کراس کو عطیہ کرے گی۔‘‘

    ایک صارف نے مسک کے عطیات دینے کے فیصلے کی تعریف کی لیکن ان سے یہ بھی پوچھا کہ وہ اس بات کو کیسے یقینی بنائیں گے کہ یہ رقم حماس تک نہ پہنچے۔

    کوئی بھی اسرائیلی شہری حماس اسرائیل معاہدے کے خلاف اپیل کر سکتا ہے

    مسک نے جواب دیتے ہوئے کہا ہم اس بات کو یقینی بنائیں گے، یہ فنڈز ریڈ کراس کے ذریعے جائیں گے اور ہم اس کو ٹریک کریں گے، ہمیں نسل، مذہب یا کسی اور چیز سے قطع نظر بے گناہوں کا خیال رکھنا چاہیے۔

  • امریکا جنگ کو ہوا دے رہا ہے، ایرانی وزیر خارجہ

    امریکا جنگ کو ہوا دے رہا ہے، ایرانی وزیر خارجہ

    ایرانی وزیرِ خارجہ حسین امیر عبداللہیان نے اپنے جاری کردہ بیان میں کہا ہے کہ امریکا جان بوجھ کر جنگ کو ہوا دے رہا ہے۔

    غیر ملکی ذرائع ابلاغ کے مطابق اپنے بیان میں ایرانی وزیرِ خارجہ نے جنگ بندی، متاثرہ شہری آبادی کو فوری امداد کی ضرورت پر بھی زور دیا ہے۔

    دوسری جانب انڈونیشین اسپتال سے نکلنے کی کوشش کرنے والوں پر شمالی غزہ میں اسرائیلی فوج نے شدید فائرنگ کی، جس کے باعث 8 افراد شہید ہو گئے۔

    رپورٹ کے مطابق اسرائیلی فوج کی فائرنگ کے نتیجے میں 2 ڈاکٹر زخمی بھی ہوئے ہیں، انڈونیشین اسپتال کے آرتھو پیڈک چیف ڈاکٹر عدنان البرش بھی زخمی ہونے والوں میں شامل ہیں۔

    گورنمنٹ انفارمیشن آفس کا اس حوالے سے کہنا ہے کہ شہید ہونے والے سول ڈیفنس اہلکاروں اور ڈاکٹروں کی تعداد 201 تک پہنچ گئی ہے۔

    اسرائیل کی حمایت پر صدر بائیڈن کی مقبولیت نئی کم ترین سطح پر

    عرب میڈیا کی رپورٹ میں انکشاف کیا گیا ہے کہ غزہ کی پٹی کے جنوب میں رفح کے مشرق میں 2 گھروں پر اسرائیلی فوج نے بمباری کر کے 11 افراد کو موت کی نیند سلا دیا ہے، جبکہ متعدد افراد زخمی بھی ہوئے ہیں۔

  • غزہ میں جنگ بندی کا مشن، اسلامی ممالک کے وزرائے خارجہ چین پہنچ گئے، بڑا بیان جاری

    غزہ میں جنگ بندی کا مشن، اسلامی ممالک کے وزرائے خارجہ چین پہنچ گئے، بڑا بیان جاری

    بیجنگ: غزہ میں جنگ بندی کے مشن پر اسلامی ممالک (او آئی سی) کے وزرائے خارجہ نے عالمی دارالحکومتوں کا دورہ شروع کر دیا ہے، اور اس سلسلے میں سب سے پہلے چین کے دارالحکومت بیجنگ پہنچ گئے ہیں۔

    غیر ملکی میڈیا رپورٹس کے مطابق چین کے وزیر خارجہ وانگ یی نے پیر کے روز 4 عرب اور ایک انڈونیشیائی وزیر خارجہ کا بیجنگ میں خیر مقدم کیا، انھوں نے فلسطین، سعودی عرب، مصر، اردن اور انڈونیشیا کے وزرائے خارجہ سے بیجنگ میں ملاقات کی اور غزہ کی صورت حال پر تبادلہ خیال کیا۔

    سعودی عرب، مصر، اردن، فلسطینی اتھارٹی اور انڈونیشیا کے وزرا نے عالمی دارالحکومتوں کا دورہ شروع کرنے کے لیے سب سے پہلے بیجنگ کا انتخاب کیا، جس سے چین کے بڑھتے ہوئے جغرافیائی سیاسی اثر و رسوخ اور فلسطینیوں کے لیے اس کی دیرینہ حمایت کا پتا چلتا ہے۔

    بیجنگ میں اسلامی ممالک کے وزرائے خارجہ کی اہم بیٹھک ہوئی، جس میں غزہ میں اسرائیلی جارحیت رکوانے اور علاقے میں انسانی امداد کی بحالی اور غزہ میں فوری طور پر جنگ بندی کا مطالبہ کیا گیا۔

    او آئی سی کے سیکریٹری جنرل حسین براہیم طحہ سمیت وزرا کے وفد کی اقوام متحدہ کی سلامتی کونسل کی مستقل رکنیت رکھنے والے ممالک کے عہدیداروں سے بھی ملاقات ہوگی، جس میں مغرب پر یہ زور دیا جائے گا کہ وہ اسرائیل کے اس مؤقف کو مسترد کرے کہ وہ غزہ میں اپنے حق دفاع میں حملے کر رہا ہے۔

    چینی وزیر خارجہ وانگ یی نے کہا کہ ان کا ملک عرب اور اسلامی دنیا میں ’’ہمارے بھائیوں اور بہنوں‘‘ کے ساتھ مل کر غزہ کی جنگ کو جلد از جلد ختم کرنے کی کوشش کرے گا۔ انھوں نے بیجنگ سے دورے کے آغاز کو چینی قوم پر اعتماد کا مظہر قرار دیا۔ واضح رہے کہ او آئی سی کے اعلیٰ سفارت کاروں کا یہ گروپ غزہ میں فوری جنگ بندی کے لیے دوسرے دارالحکومتوں کا دورہ بھی کرنے والا ہے۔

    چینی وزیر خارجہ نے محصور غزہ سے فلسطینیوں کی جبری نقل مکانی کی مخالفت کرتے ہوئے اس بات پر زور دیا کہ ترجیحی بنیاد پر فوری طور پر جنگ بندی کی جائے، کیوں کہ جنگ بندی اب سفارتی بیان بازی نہیں ہے، بلکہ غزہ کے لوگوں کے لیے زندگی اور موت کا معاملہ ہے۔

  • امریکی صدر نے فلسطین میں امن کے لیے نئی فلسطینی اتھارٹی کے قیام کا مطالبہ کر دیا

    امریکی صدر نے فلسطین میں امن کے لیے نئی فلسطینی اتھارٹی کے قیام کا مطالبہ کر دیا

    واشنگٹن: امریکی صدر جو بائیڈن نے فلسطین میں امن کے لیے نئی فلسطینی اتھارٹی کے قیام کا مطالبہ کر دیا ہے۔

    تفصیلات کے مطابق واشنگٹن پوسٹ میں شائع مضمون میں صدر بائیڈن نے لکھا کہ غزہ اور مغربی کنارے کو نئی فلسطینی اتھارٹی کے تحت ہی ایک ہونا چاہیے۔

    انھوں نے لکھا جیسا کہ ہم امن کے لیے کوشش کر رہے ہیں، غزہ اور مغربی کنارے کو ایک واحد انتظامی ڈھانچے کے تحت ہی از سر نو فلسطینی اتھارٹی کے تحت جوڑ دیا جانا چاہیے، کیوں کہ ہم سب دو ریاستی حل کے لیے کام کر رہے ہیں، جو اسرائیلی اور فلسطینی عوام کی طویل مدتی سلامتی کو یقینی بنانے کا واحد راستہ ہے۔

    جو بائیڈن نے واضح کیا کہ نہ تو غزہ کو دوبارہ دہشت گردی کے پلیٹ فارم کے طور پر استعمال ہونا چاہیے، نہ ہی غزہ سے فلسطینیوں کی زبردستی نقل مکانی ہونی چاہیے، اس پر اسرائیل کی جانب سے دوبارہ قبضہ بھی نہیں ہونا چاہیے، نہ محاصرہ یا ناکہ بندی، اور علاقے میں کوئی کمی نہیں ہونی چاہیے۔

    فلسطینی صدر محمود عباس کا امریکی صدر جو بائیڈن سے مطالبہ

    واضح رہے کہ گزشتہ ہفتے سی این این کو انٹرویو میں اسرائیلی وزیر اعظم نیتن یاہو پہلے ہی کہہ چکے ہیں کہ فلسطینی اتھارٹی غزہ کی ذمے داری اٹھانے کے قابل نہیں، امریکی صدر کے مؤقف کے بعد فلسطین اتھارٹی کے سربراہ محمود عباس کا سیاسی مستقبل بھی داؤ پر لگنے کا خدشہ ہے۔

  • غزہ : الشفا اسپتال کے ڈاکٹرز مریضوں کو مرنے کے لیے چھوڑنے پر مجبور

    غزہ : الشفا اسپتال کے ڈاکٹرز مریضوں کو مرنے کے لیے چھوڑنے پر مجبور

    غزہ : الشفا اسپتال کے مسیحا بے بس ہوگئے، ڈائریکٹرمحمدابوسلمیہ کا کہنا ہے کہ مریض مرنے کے لیے چھوڑنے پر مجبور ہیں، صرف پین کلردے سکتے ہیں تاکہ وہ پرسکون انداز میں مرسکیں۔

    تفصیلات کے مطابق اسرائیل نےغزہ کےشفاخانوں کومردہ خانوں میں تبدیل کردیا ہے ، اسرائیلی فورسز نے مسلسل چوتھے روز بھی الشفا اسپتال پرقبضہ کررکھا ہے اور تفتیش کےنام پر مریضوں اور ڈاکٹروں کومارا پیٹاجارہا ہے۔

    الشفا اسپتال میں مریضوں سمیت سات ہزار پناہ گزین محصور ہوکر رہ گئے ہیں، الشفا اسپتال کے مسیحا بے بس ہوگئے۔
    .
    ڈائریکٹرمحمدابوسلمیہ نے کہا مریضوں کو مرنے کے لیے چھوڑنے پر مجبور ہیں، ہم آپریشن نہیں کرسکتے، صرف زخمیوں کوپین کلردےسکتے ہیں، تاکہ پرسکون انداز میں مرسکیں۔

    انہوں نے کہا اسرائیل کانوزائیدہ بچوں کے لیے انکیوبیٹر فراہم کرنے کا دعویٰ جھوٹا ہے، بچوں کو فوری توجہ کی ضرورت ہے لیکن ہمارے پاس طبی سامان کی کمی ہے۔

    ڈائریکٹر محمد ابو سلمیہ نے کہا مریض مرنے کے لیے چھوڑنے پر مجبور ہیں، آپریشن نہیں کرسکتے،زخمیوں کوپین کلردےسکتے ہیں۔۔تاکہ پرسکون انداز میں مرسکیں۔

    محمد ابو سلمیہ کا کہنا تھا کہ اسرائیل کا نوزائیدہ بچوں کے لیے انکیوبیٹر فراہم کرنےکا دعویٰ جھوٹا ہے، بچوں کو فوری توجہ کی ضرورت ہے لیکن ان کے پاس طبی سامان کی کمی ہے۔

    گذشتہ روز ڈائریکٹر الشفا اسپتال کا کہنا تھا کہ آئی سی یو میں موجود تمام مریض دم توڑ گئے ہیں اور قابض فوج نے الشفا اسپتال کے مختلف حصوں کو مکمل تباہ کردیا ہے۔

    اسرائیلی فوجی شہید فلسطینیوں کی لاشیں بھی اٹھا کر اپنے ساتھ لے گئے ہیں جبکہ افواج کی جانب سے اسپتال کے احاطے میں گاڑیوں کو بھی تباہ کردیا گیا ہے۔

  • غزہ: نیویارک ٹائمز کی شاعری کی ایڈیٹر این بوئیر نے احتجاجاً استعفیٰ دے دیا

    غزہ: نیویارک ٹائمز کی شاعری کی ایڈیٹر این بوئیر نے احتجاجاً استعفیٰ دے دیا

    نیویارک ٹائمز کی شاعری کی ایڈیٹر این بوئیر نے غزہ میں صہیونی فورسز کی وحشیانہ کارروائیوں پر احتجاجاً استعفیٰ دے دیا۔

    مرزا غالب کا ایک زبان زد عام شعر ہے: ’لکھتے رہے جنوں کی حکایات خوں چکاں، ہر چند اس میں ہاتھ ہمارے قلم ہوئے‘ اس شعر کے مصداق امریکی اخبار نیویارک ٹائمز کی مدیرِ شاعری این بوئیر نے غزہ خوں ریزی پر بطور احتجاج استعفیٰ دے دیا ہے۔

    اخبار کی انتظامیہ کے نام خط میں انھوں نے لکھا کہ اہلِ غزہ کے خلاف امریکی حمایت یافتہ اسرائیلی جنگ کسی کی جنگ نہیں ہے، نہ اس سے کسی کو کوئی تحفظ ملے گا، یہ نہ اسرائیل کے مفاد میں ہے نہ امریکا و یورپ یا یہودیوں کے، اس سے یہودیوں کو محض بدنامی حاصل ہوگی جن کے نام پر یہ کچھ ہو رہا ہے۔

    بوئیر صاحبہ نے کہا کہ اس جنگ کا واحد مقصد تیل کمپنیوں اور اسلحہ ساز اداروں کے مہلک نفع میں اضافہ ہے، فلسطینیوں نے دہائیوں کے قبضے، جبری نقل مکانی، محرومی، تحقیر آمیز نگرانی، محاصرے، قید اور تشدد کی مزاحمت کی ہے۔

    7 اکتوبر سے جاری اسرائیلی حملوں میں فلسطینی شہدا کی تعداد 12 ہزار ہو گئی

    واضح رہے کہ اس سے پہلے اسی اخبار کی جیزمین ہیوز اور جیمی لارن کائلز بھی مستعفی ہو چکی ہیں۔ اخبار کی ان دونوں میگزین مدیرات نے انتظامیہ کے نام ایک کھلے خط میں اسرائیل کو نسلی امتیاز اور نسل کشی کا مجرم قرار دیا۔

    خط کی اشاعتِ عام پر ان خواتین کو نیویارک ٹائمز کی جانب سے انتباہی مراسلے لکھے گئے جس پر دونوں مستعفی ہو گئیں، جیزمین، این اور جیمی محض تین جرات مند و باضمیر صحافی نہیں بلکہ قلم کی عصمت اور صحافت کی آبرو ہیں۔

  • الشفاء اسپتال کا ڈاکٹر حمام اللّٰہ اسرائیلی بمباری میں اہلِ خانہ سمیت شہید

    الشفاء اسپتال کا ڈاکٹر حمام اللّٰہ اسرائیلی بمباری میں اہلِ خانہ سمیت شہید

    غزہ : الشفاء اسپتال سے وابستہ ڈاکٹر حمام اللّٰہ اسرائیلی بمباری میں اہلِ خانہ سمیت شہید ہوگئے، اپنے آخری انٹرویو میں شہید ڈاکٹر نے کہا تھا کہ مریضوں کو چھوڑکر نہیں جاوں گا،انہیں میری ضرورت ہے۔

    تفصیلات کے مطابق غزہ میں صورتحال بد سے بدتر ہورہی ہے اور مریضوں کو تنہا نہ چھوڑنے والے ڈاکٹر بھی شہید ہورہے ہیں۔

    الشفاء اسپتال سے وابستہ ڈاکٹر حمام اللّٰہ اسرائیلی بمباری میں اہلِ خانہ سمیت شہید ہوگئے، چھتیس سالہ ڈاکٹر حمام اللّٰہ نے اسرائیلی دھمکیوں کی پرواہ کیے بغیر زخمی فلسطینیوں کے علاج کو ترجیح دی۔

    اپنے آخری انٹرویو میں شہید ڈاکٹر نے کہا تھاکہ مریضوں کو چھوڑکر نہیں جاؤں گا،انہیں میری ضرورت ہے۔

    خیال رہے الشفااسپتال میں اسرائیلی فورسز کا دھاوا برقرارہے، اسرائیلی فورسز نےمسلسل چوتھے روز بھی الشفا اسپتال پرقبضہ کررکھا ہے۔

    اقوام متحدہ کےمطابق ایک ہفتے میں بجلی نہ ہونے سےالشفا اسپتال میں چار بچوں سمیت چالیس مریض جان سے گئے، الشفا اسپتال کے منیجر کا کہنا ہےکہ ہم تباہ ہورہے ہیں، جنگ روکی جائے۔

    واضح رہے عالمی برادری غزہ میں تینتالیسویں روز بھی اسرائیلی بمباری روکنے میں ناکام ہے، رات بھراسرائیلی فورسزغزہ کی پٹی پر بم برساتی رہیں۔

    خان یونس میں بمباری سےمزیدچھبیس فلسطینی شہید ہوگئے، جس میں اکثریت بچوں کی تھی جبکہ النصرت میں رہائشی عمارت پر بمباری کی گئی ، جس میں بیس فلسطینی شہیدہوئے اور ہزاروں افراد ملبے تلےدب گئے۔

    غزہ پر اسرائیل کی بمباری اور زمینی حملوں میں اب تک کم از کم 12,000 فلسطینی جانیں کھو چکے ہیں، جن میں 5,000 بچے اور 3,300 خواتین شامل ہیں، جب کہ 30 ہزار زخمی ہوئے اور 3750 لا پتا ہیں۔

  • اسرائیل غزہ میں ایندھن کے ٹینکر بھیجنے پر رضا مند

    اسرائیل غزہ میں ایندھن کے ٹینکر بھیجنے پر رضا مند

    اسرائیل کی جانب سے غزہ میں ایندھن کے ٹینکر بھیجنے پر رضا مندی ظاہر کی گئی ہے، اسرائیلی مشیرِ قومی سلامتی کا اس حوالے سے کہنا ہے کہ غزہ میں ایندھن کے ٹینکر بھیجنے کا فیصلہ امریکا کی درخواست پر کیا جارہا ہے۔

    بین الاقوامی خبر رساں ادارے کی رپورٹ کے مطابق اسرائیلی مشیرِ قومی سلامتی نے کہا کہ غزہ کے لیے ایندھن کے ٹینکر کی فراہمی کی منظوری اقوامِ متحدہ کے اداروں کی ضرورت کے پیشِ نظر دی گئی ہے۔

    اُن کا مزید کہنا تھا کہ غزہ کے لیے یومیہ ایندھن کے 2 ٹینکر بھیجے جانے کی منظوری دی گئی ہے، جبکہ یرغمالیوں کی بڑی تعداد کی رہائی تک عارضی جنگ بندی پر رضامند نہیں ہوں گے۔

    دوسری جانب مزید پانچ ممالک نے فلسطین کی صورتحال پر بین الاقوامی فوجداری عدالت سے رجوع کر لیا ہے۔

    آئی سی سی کے پراسیکیوٹر کریم خان نے کہا ہے کہ ریفرل جنوبی افریقہ، بنگلہ دیش، بولیویا، کوموروس اور جبوتی سے آیا ہے۔

    خان نے بیان میں کہا کہ آئی سی سی کے پاس جون 2014 سے مبینہ جنگی جرائم کے لیے ”ریاست فلسطین کی صورت حال”کی تحقیقات جاری ہیں۔

    فلسطینی حکام روم کے قانون کے دستخط کنندہ ہیں، جو آئی سی سی کے دائرہ اختیار کو قائم کرتا ہے جب کہ اسرائیل نہیں ہے۔

    آئی سی سی کے پراسیکیوٹر کریم خان نے کہا کہ جاری تحقیقات 7 اکتوبر 2023 کو ہونے والے حملوں کے بعد سے دشمنی اور تشدد میں اضافے تک پھیلی ہوئی ہیں۔

  • غزہ میں اسرائیلی مظالم جاری، شہدا کی تعداد 11 ہزار 500 سے تجاوز کرگئی

    غزہ میں اسرائیلی مظالم جاری، شہدا کی تعداد 11 ہزار 500 سے تجاوز کرگئی

    غزہ میں اسرائیلی فوج کے مظالم کا سلسلہ 40 ویں روز بھی جاری رہا، اسرائیلی فوج کی خان یونس اور وسطی غزہ میں گھروں پر بمباری سے مزید 14 فلسطینی جام شہادت نوش کرگئے، جس کے بعد شہدا کی تعداد 11 ہزار 500 سے تجاوز کرگئی ہے۔

    بین الاقوامی خبر رساں ادارے کی رپورٹ کے مطابق اسرائیلی فوج نے کئی دن کے محاصرے کے بعد آج غزہ کے سب سے بڑے اسپتال الشفا کو بھی نہ بخشا۔

    الشفا اسپتال میں داخل ہوکر اسرائیلی فوجیوں نے ایمرجنسی اور سرجیکل وارڈز کی تلاشی لی اور طبی عملے کو اسپتال سے نکل جانے کا کہا تاہم ڈاکٹروں نے مریضوں کو چھوڑ کر اسپتال سے باہر جانے سے صاف کردیا۔

    عالمی ادارہ صحت نے بھی الشفا اسپتال میں طبی عملے سے رابطے منقطع ہونے کی تصدیق کردی۔

    غزہ کے سب سے بڑے اسپتال پر اسرائیلی چڑھائی کے باعث نومولود بچوں کو دوسرے وارڈز میں شفٹ کرنا پڑ گیا، جبکہ مریض، طبی عملہ اور بے گھر افراد اسپتال میں محصور ہو کر رہ گئے۔

    اسرائیلی ریڈیو کے مطابق اسپتال سے کوئی یرغمالی نہیں ملا تاہم اسرائیلی فوج کی جانب سے اسپتال سے اسلحہ ملنے کا دعویٰ سامنے آیا تھا، الشفا اسپتال پر چڑھائی کے دوران اسرائیلی فوج نے 200 فلسطینیوں کو گرفتار کرلیا۔

    ڈاکٹروں اور حماس نے اسرائیلی فوج کی جانب سے الشفا اسپتال سے اسلحہ ملنے کے دعوؤں کوجھوٹا قرار دے دیا۔

    امریکی صدر بائیڈن پر حماس نے الشفا اسپتال پر حملے کی ذمہ داری ڈالتے ہوئے کہا کہ امریکا کا غلط مؤقف اسرائیلی فوج کو حملوں کی ترغیب دے رہا ہے۔

    اسرائیلی فوج کی جارحیت کے خلاف مزاحمت کرتے ہوئے ادھر القدس بریگیڈز نے غزہ میں اسرائیل کا ڈرون مار گرایا جبکہ جنوبی لبنان سے بھی مزاحمت کاروں کی جانب سے اسرائیلی علاقوں پر راکٹوں سے حملے کیے گئے۔

  • غزہ میں یرغمالی جلد رہا ہو جائیں گے، تفصیل نہیں بتا سکتا: امریکی صدر

    غزہ میں یرغمالی جلد رہا ہو جائیں گے، تفصیل نہیں بتا سکتا: امریکی صدر

    واشنگٹن: امریکی صدر جو بائیڈن نے امید ظاہر کی ہے کہ غزہ میں حماس کے ہاتھوں یرغمالی جلد رہا ہو جائیں گے۔

    غیر ملکی میڈیا رپورٹس کے مطابق امریکی صدر جو بائیڈن نے منگل کو کہا کہ انھیں یقین ہے کہ غزہ میں حماس کے ہاتھوں یرغمال ہونے والے افراد کی رہائی کے لیے ایک معاہدہ طے پا سکتا ہے۔

    سی این این کے مطابق بائیڈن نے امید ظاہر کی کہ یرغمالیوں کی رہائی کے لیے طویل مذاکرات اب ایک معاہدے کے قریب پہنچ گئے ہیں، یقین ہے یرغمالیوں کی رہائی ہونے والی ہے۔ تاہم انھوں نے کہا کہ میں اس حوالے سے تفصیل نہیں بتا سکتا۔

    اسرائیلی مظالم پر خاموشی: درجنوں امریکی اہلکاروں کا بائیڈن کو احتجاجی خط

    بائیڈن نے وائٹ ہاؤس میں صحافیوں سے گفتگو میں کہا کہ وہ روزانہ متعلقہ افراد سے بات چیت کر رہے ہیں، لیکن وہ تفصیل میں نہیں جانا چاہتے، وائٹ ہاؤس نے منگل کی رات کہا کہ بائیڈن نے دن کے اوائل میں اسرائیلی وزیر اعظم بنجمن نیتن یاہو کے ساتھ یرغمالیوں کی رہائی کی کوششوں پر طویل بات چیت کی۔

    اسرائیلی فوجی ٹینکوں سمیت غزہ کے اسپتال الشفا میں داخل

    سی این این کے مطابق اسرائیل اور حماس ایک معاہدے کے قریب پہنچ رہے ہیں جس میں لڑائی میں کئی دنوں کا وقفہ کیا جائے گا اور اس کے بدلے یرغمالی رہا ہوں گے۔