خوش رہنا آج کل کے دور میں ایک مشکل عمل بن چکا ہے لیکن ماہرین کا کہنا ہے کہ خوشی کو حاصل کرنا کوئی مشکل کام نہیں۔
یہ بات یاد رکھنے کی ہے کہ خوشی بلند و بالا گھروں، لمبی لمبی گاڑیوں اور برانڈڈ جوتوں اور ملبوسات میں نہیں بلکہ چھوٹی چھوٹی چیزوں میں ہے۔ اپنی پسند کی کوئی کتاب پڑھنا، کوئی نئی ڈش کھانا، کسی ایسی جگہ جانا جہاں آپ پہلے نہ گئے ہوں، کسی کی معمولی سی مدد کردینا، گھر والوں اور دوستوں کے ساتھ وقت گزارنا، یہ وہ تمام کام ہیں جن سے خوشی حاصل کی جاتی ہے۔
مزید پڑھیں: خوش و خرم افراد کی 9 عادات
جس طرح کچھ عادات اپنا کر خوشی حاصل کی جاسکتی ہے اسی طرح کچھ عادات ایسی بھی ہیں جو خوشی کو ہم سے دور کردیتی ہیں۔ جن لوگوں میں یہ عادات ہوتی ہیں وہ چاہ کر بھی خوش نہیں ہو پاتے۔
کہیں آپ میں تو یہ عادات نہیں پائی جاتیں؟
:جذبات کو دبانا
غصہ، ناراضگی، غم، خوشی یا جوش۔ یہ وہ جذبات ہیں جنہیں وقت پر ظاہر نہ کیا جائے تو یہ انسان کو غیر مطمئن کر سکتے ہیں۔ خوش رہنے والے افراد اپنے جذبات کا کھل کر اظہار کرتے ہیں۔
ان کے خوش رہنے کی وجہ یہی ہوتی ہے کہ وہ کوئی بات دل میں نہیں رکھتے اور یوں ان کا دل و دماغ ہلکا پھلکا رہتا ہے۔
:جذبات کو مستقل جگہ دینا
جس طرح جذبات کا اظہار کرنا ضروری ہے اسی طرح انہیں مستقل اپنے اوپر طاری کیے رکھنا بھی غلط ہے۔ اگر آپ غصہ یا ناراضگی کو کافی دیر تک خود پر طاری رکھیں گے تو آنے والے بہت سے لمحہ جو خوش ہو کر گزارے جاسکتے ہیں، کھو دیں گے۔
:اپنے آپ کو غلط سمجھنا
اپنے بارے میں منفی خیالات رکھنا احساس کمتری کو جنم دیتا ہے اور احساس کمتری کا شکار لوگ کبھی خوش نہیں رہ سکتے۔
اپنے اندر برائیوں اور خامیوں کو تلاش کرنا اور انہیں درست کرنا اچھی بات ہے۔ لیکن اسے دماغ پر طاری کر کے خود کو دوسروں سے کمتر سمجھنا آپ کی ساری خوشیوں کو ملیا میٹ کرسکتا ہے۔
:بے مقصد چیزوں پر توجہ دینا
ایسی چیزیں جو آپ کو خوشی اور اطمینان نہیں دیتیں انہیں توجہ دینا چھوڑ دیں۔ ذہنی دباؤ اور ڈپریشن کا شکار کرنے والے افراد، حالات اور واقعات سے زیادہ سے زیادہ دور رہنے کی کوشش کریں۔
:خوشی کو چیز سمجھنا
ناخوش رہنے والے افراد خوشی کو بھی کوئی ’چیز‘ سمجھتے ہیں۔ انہیں لگتا ہے کہ کوئی انہیں یہ چیز ڈبہ میں پیک کر کے پیش کرے گا اور اسے کھولتے ہی وہ دنیا کے سب سے خوش رہنے والے انسان بن جائیں گے۔
خوشی دراصل محسوس کرنے کی چیز ہے۔ مثبت سوچ رکھنے والے افراد پھول کھلتا دیکھ کر بھی خوش ہوجاتے ہیں۔ لیکن منفی سوچ رکھنے والے سب کچھ حاصل کر کے بھی خوش نہیں رہ سکیں گے۔
