لاہور: صوبائی وزیر اطلاعات صمصام بخاری نے کہا ہے کہ غیرملکی میڈیا کا پاکستان کے بارے میں رویہ غیر منصفانہ ہے، ہمارے ملک میں کسی قسم کا صنفی امتیاز نہیں ہے۔
ان خیالات کا اظہار انہوں نے لاہور میں انسٹی ٹیوٹ آف جرنلزم کی تقریب سے خطاب کرتے ہوئے کیا، صوبائی وزیر اطلاعات کا کہنا تھا کہ مغرب میں پاکستان کا پیش کیا جانے والا امیج درست نہیں، غیر ملکی میڈیا پاکستان کے بارے میں غلط رپورٹنگ کررہا ہے، جو انتہائی غیر منصفانہ فعل ہے۔
ان کا کہنا تھا کہ پاکستان میں کسی قسم کا صنفی امتیاز نہیں ہے، اس طرح کی خبریں من گھڑت اور بے بنیاد ہیں، پاکستان کا اصل امیج بحال کرنے کیلئے میڈیا، ادیب اور فنکار آگےآکر اپنا کردار ادا کریں۔
صمصام بخاری کا مزید کہنا تھا کہ پاکستان صوفیائے کرام کی پرا من دھرتی اور محبت کا گہوارہ ہے, جرمن سفیرمارٹن کوبلر کی پاکستان سے محبت کی مثال ملنا مشکل ہے۔
