اسلام آباد ہائیکورٹ نے مختلف کمپنیز اور اداروں کی جانب سے دائر درخواستیں منظورکرتے ہوئے اربوں روپے کے سپر ٹیکس کا نفاذ غیر آئینی قرار دے دیا۔
تفصیلات کے مطابق درخواست گزاروں کی جانب سے سلمان اکرم راجہ ، عدنان حیدر و دیگر نے کیسز کی پیروی کی، اسلام آباد ہائیکورٹ کے جسٹس سرداراعجاز اسحاق خان نے محفوظ فیصلہ سنا دیا۔
عدالت نے انکم ٹیکس آرڈیننس کی شق فور سی کو غیر آئینی قرار دیتے ہوئے اپنے تفصیلی فیصلے میں وضاحت بھی پیش کردی۔
عدالت نے فیصلے میں حکومت کی جانب سے سپر ٹیکس اکٹھا کرنا غیر قانونی قرار دیا، عدالت نے کہا کہ اربوں روپے کے سپر ٹیکس کا نفاذ غیر آئینی ہے۔
عدالت نے انکم ٹیکس آرڈیننس کی شق فور سی کو بھی غیر آئینی قرار دے دیا، سپر ٹیکس کے ڈیمانڈ اور ریکوری کے تمام نوٹسز عدالت نے کالعدم قرار دے دیئے ہیں۔
واضح رہے کہ وزیر خزانہ اسحاق ڈار نے گزشتہ ماہ اپنی بجٹ تقریر میں ٹیکس کا اعلان کیا تھا، سپر ٹیکس 500 ملین روپے سالانہ یا اس سے زیادہ کمانے والوں پر لاگو ہوگا۔
