Tag: غیر قانونی

راولپنڈی : محکمہ وائلڈ لائف نے شیر جی ٹی روڈ پر کھڑی گاڑی سے شیر پکڑ لیا، برآمد شیر میلوں میں سرکس کیلےلایا گیا تھا۔

تفصیلات کے مطابق محکمہ وائلڈ لائف پنجاب نے راولپنڈی میں چک بیلی روڈ سے غیر قانونی شیر تحویل میں لے لیا۔

حکام نے بتایا کہ شیر جی ٹی روڈ پر کھڑی گاڑی سے برآمد کیا گیا، شیر کا مالک جس کی شناخت فخر عباس کے نام سے ہوئی ہے۔

برآمد شیر میلوں میں سرکس کیلےلایا گیا تھا تاہم شیر کا مالک فخرعباس لائسنس پیش کرنےمیں ناکام رہا ، جس کی وجہ سے قانونی کارروائی کی گئی۔

حکام کا کہنا تھا کہ غیر قانونی شیر رکھنے پر مالک کو 60 ہزار روپے جرمانہ عائد کردیا ہے اور تحویل میں لئےگئے شیر کو محفوظ مقام پرمنتقل کر دیا گیا ہے۔

مزید پڑھیں : راولپنڈی : گھر سے افریقی نسل کا نایاب شیر برآمد ، مقدمہ درج

محکمہ وائلڈ لائف کے مطابق پنجاب بھر میں جنگلی جانوروں کو پرمٹ کے بغیر رکھنے پر سخت پابندی ہے ، ٹارگٹڈ آپریشن کے دوران پنجاب کے مختلف علاقوں سے پالتو جانوروں کے طور پر غیر قانونی طور پر رکھے گئے اٹھارہ شیروں کو پکڑا گیا ہے۔

گزشتہ ماہ لاہور کے ایک گھر سے شیر کے فرار ہونے اور ایک خاتون اور دو بچوں پر حملہ کرنے کے بعد وسیع پیمانے پر کریک ڈاؤن شروع کر دیا گیا ہے۔

محکمہ وائلڈ لائف نے زور دیا کہ جانوروں کے تحفظ کے قوانین کی خلاف ورزی کرنے والے افراد کے خلاف کارروائی جاری رہے گی۔

غیر قانونی ایل پی جی کنٹینرز سے متعلق اہم فیصلہ کر لیا گیا ہے اور کمشنر ملتان نے ڈویژن بھر میں ان کے داخلے پر پابندی عائد کر دی ہے۔

اے آر وائی نیوز کے مطابق کمشنر ملتان عامر کریم خان نے ڈویژن بھر میں غیر قانونی ایل پی جی کنٹینرز کے داخلے پر پابندی عائد کر دی ہے اور واضح کیا ہے کہ اس پابندی کی خلاف ورزی کرنے اور غیر قانونی باؤزرز کے ملتان ڈویژن میں داخلے پر ذمہ داروں کیخلاف سخت کارروائی کی جائے گی۔

کمشنر ملتان نے کہا ہے کہ انسانی جانوں کے تحفظ کے لیے اقدامات ناگزیر ہیں اور انہوں نے متعلقہ حکام کو ہدایت کی ہے کہ ناکے لگا کر اوگرا سے غیر رجسٹرڈ ایل پی جی باوزرز کو آف روڈ کیا جائے۔

واضح رہے کہ گزشتہ ماہ ملتان سمیت پنجاب کے مختلف شہروں میں ایل پی جی کنٹینر پھٹنے کے کئی واقعات رونما ہوئے تھے اور ان حادثات میں متعدد افراد جاں بحق اور درجنوں زخمی ہوئے تھے۔

ملتان کے علاقے مظفرگڑھ روڈ پر فہد ٹاؤن میں ایل پی جی باؤزر کو آگ لگنے کی ابتدائی تحقیقاتی رپورٹ میں انکشاف ہوا تھا کہ 16 ،15 افراد باؤزر سےا یل پی جی کی ری فلنگ کر رہے تھے کہ اچانک باؤزرمیں آگ لگی تو وہ کسی کواطلاع دیے بغیر فرارہو گئے۔

https://urdu.arynews.tv/multan-initial-investigation-report-on-lpg-bowser-explode/

مسافروں کی نشاندہی پر سمندر کے راستے غیر قانونی طور پر لوگوں کو اسپین بھجوانے میں ملوث متعدد گینگ بے نقاب ہو گئے ہیں۔

ترجمان ایف آئی اے کی غیر قانونی طریقے سے اسپین جانے کی کوششوں میں ناکامی پر بیرون ملک سے ڈی پورٹ کیے جانے والے چار مسافروں سے پوچھ گچھ جاری ہے، جنہوں نے کئی سنسنی خیز انکشافات کیے ہیں۔

ترجمان ایف آئی اے کے مطابق مذکورہ مسافروں کی شناخت احسن شبیر، محمد بشیر،عون محمداورحسیب خلیق کے نام سے ہوئی۔ ان کا تعلق گوجرانوالہ اور گجرات کے مختلف علاقوں سے ہے اور ان کے نام پی این آئی ایل میں شامل تھے۔

ترجمان نے بتایا کہ مسافر بین الاقوامی پروازوں کے ذریعے کراچی ایئرپورٹ پہنچے تھے۔ انہوں نے عمرہ، وزٹ ویزے پر سعودی عرب، دبئی اور آذربائیجان کے لیے سفر کیا۔

مذکورہ مسافروں نے ایف آئی اے کو بتایا کہ ایجنٹوں نے مسافروں کو مذکورہ ممالک سے سینیگال بھجوایا اور پھر غیر قانونی راستوں سے سینیگال سے موریطانیہ بھیجا۔

ابتدائی تفتیش کے مطابق مسافروں کو سمندر کے راستے اسپین بھجوانے کی کوشش کی گئی۔ تشدد کے واقعات، کشتی حادثے کی بنیاد پر مسافروں نے سمندری راستے سے جانے سے انکار کیا۔

ترجمان ایف آئی اے کا کہنا ہے کہ مسافروں نے ایجنٹوں سے اسپین جانے کے لیے لاکھوں روپے میں معاملات طے کیے۔ اب ان مسافروں سے ایجنٹوں اور سہولت کاروں کے حوالے سے معلومات لے جا رہی ہیں۔

ترجمان نے بتایا ہے کہ ابتدائی تفتیش کے مطابق ایجنٹوں کا تعلق پشاور، بہاولپور اور گوجرانوالہ سے ہے۔ مسافروں کی نشاندہی پر ان ایجنٹوں کے خلاف قانونی کارروائی کا آغاز کر دیا گیا ہے۔

ایف آئی اے نے شہریوں سے گزارش ہے بیرون ملک جانے کے لیے متعلقہ ملک کی ایمبیسی سے رابطہ کریں اور اپنے ذاتی دستاویزات غیر متعلقہ شخص کے حوالے نہ کریں۔

واضح رہے کہ انسانی اسمگلرز کے ہتھے چڑھ کر اور غیر انسانی سلوک برداشت کرنے کے بعد آزاد کرائے جانے والے سات پاکستانی ڈی پورٹ ہوکر گزشتہ دنوں اسلام آباد آئے تھے اور وہاں ایف آئی اے امیگریشن کی انسانی اسمگلنگ سیل نے حفاظتی تحویل میں لے لیا تھا۔ متاثرین میں زخمی بھی شامل تھے، جنہیں انسانی اسمگلرز کے تشدد سے شدید چوٹیں بھی آئی ہیں۔

https://urdu.arynews.tv/moroccan-boat-accident-imran-survived-returns-home/

اسلام آباد : پاکستان اور اٹلی کے درمیان غیر قانونی طور پر اٹلی جانیوالے پاکستانیوں کا داخلہ روکنے کیلئے معاہدے پر اتفاق کرلیا گیا۔

تفصیلات کے مطابق وفاقی وزیرداخلہ محسن نقوی سے اٹلی کی سفیر میریلینا ارملین کی ملاقات ہوئی، ملاقات میں غیر قانونی طور پر اٹلی جانیوالے پاکستانیوں کا داخلہ روکنے کیلئے معاہدے پر اتفاق کرلیا گیا۔

پاکستان،اٹلی میں انسانی اسمگلنگ روکنے کے معاہدے کوجلد حتمی شکل دی جائے گی، وفاقی وزیرداخلہ محسن نقوی نے معاہدے کیلئےمتعلقہ حکام کو موقع پر ہی احکامات دے دیے۔

غیر قانونی طور پر اٹلی جانیوالے پاکستانیوں کا داخلہ روکنے کیلئےمشترکہ پالیسی پر اتفاق کیا گیا اور کہا گیا انسانی اسمگلنگ روکنے کے باہمی تعاون کوفروغ دیا جائے گا۔

دونوں رہنماؤں نے میلان اور اسلام آباد کو سسٹر سیٹز کا درجہ دینے کی تجویز دی۔

اس موقع پر محسن نقوی نے کہا کہ پاکستان بھرمیں انسانی اسمگلنگ کیخلاف بھرپور کریک ڈاؤن جاری ہے، انسانی اسمگلنگ کے مافیا کیخلاف زیرو ٹالرنس کی پالیسی اپنائی ہے، اٹلی غیرقانونی طورپر جانیوالوں کو ناصرف جیل جانا پڑےگا بلکہ رقم بھی ضائع ہوگی۔

وزیرداخلہ کا کہنا تھا کہ انسانی اسمگلنگ روکنے کیلئے ایف آئی اے کو بھرپور کارروائی کا حکم دیا ہے، انسانی اسمگلنگ پر کوئی سمجھوتہ نہیں ہوگا، پاکستان سے اٹلی قانونی طور پر ہنر مند افرادی قوت بھیجی جائے گی۔

وفاقی وزیر داخلہ نے اٹلی کی سفیر کی ذمہ داری سنبھالنے پر میریلینا ارملین کو مبارکباد دی، ملاقات میں دوطرفہ تعلقات کے فروغ اور اہم امور پر تبادلہ خیال کیا گیا۔

اٹلی کی سفیر نے انسانی اسمگلنگ کی روک تھام کیلئےوفاقی وزیرداخلہ محسن نقوی کےاقدامات کو سراہتے ہوئے انسانی سمگلنگ روکنے کے لئے ہر ممکن تعاون کی یقین دہانی کرائی۔

نگراں وزیراعظم انوار الحق کاکڑ نے کہا کہ پاکستان نے تارکین وطن کو فراخدلی سے سنبھالا ہے تارکین وطن کو رجسٹریشن اور واپسی کے مواقع دیئے جلد بازی سے کام لینے کا کہنا بالکل غلط ہے۔

تفصیلات کے مطابق نگران وزیر اعظم انوار الحق کاکڑ نے برطانیہ کے بڑے اخبار ٹیلی گراف میں لکھا کہ گزشتہ دہائیوں کے دوران آئرلینڈ کی آبادی کے برابر تارکین وطن آچکے ہیں اور ہم نے فراخدلی سے تارکین وطن کی اتنی بڑی تعداد کو سنبھالا ہے۔

وزیر اعظم نے کہا کہ مہمان نوازی پاکستان کے ڈی این اے میں شامل ہے، غیر قانونی تارکین وطن کو رضاکارانہ طور پر رجسٹریشن اور واپسی کے مواقع دیئے، یہ کہنا بالکل غلط ہے کہ پاکستان نے جلد بازی سے کام لیا۔

انہوں نے کہا کہ بہت سے غیر قانونی لوگ بلیک مارکیٹ میں کام کرتے ہیں، کوئی ٹیکس نہیں دیتے، یہ لوگ انڈر ورلڈ کے استحصال کا شکار بھی ہیں، اگست 2021 سے کم از کم 16 افغانیوں نے پاکستان میں خودکش حملے کئے۔

وزیر اعظم کا کہنا تھا کہ پاکستان نے افغان حکومت کے ساتھ سیکیورٹی مسائل پر بات کی افغان حکومت نے ہمیں کہا اپنے اندرونی معاملات خود ٹھیک کریں پھر پاکستان نے فیصلہ کر لیا کہ ہم اپنے اندرونی معاملات ٹھیک کریں گے۔

وزیراعظم نے کہا کہ غیر قانونی تارکین وطن کے انخلا پر سوشل میڈیا پر غلط معلومات، بے بنیاد الزامات کی بھر مار ہے، غیر قانونی افراد کے ساتھ احترام اور دیکھ بھال کے ساتھ برتاؤ کرنے کے سخت احکامات ہیں، تقریباً 79 ٹرانزٹ مراکز قائم کیے جو مفت کھانا، پناہ گاہ اور طبی سہولیات فراہم کر رہے ہیں۔

انوالحق نے کہا کہ اتنی بڑی تعداد میں غیر قانونی افراد کو قیام کی اجازت دیکر قومی سلامتی پر مزید سمجھوتہ نہیں کرسکتے ہمارا  مقصد پاکستان کو محفوظ، پر امن اور خوشحال بنانا ہےپاکستان میں تارکین وطن کا مسئلہ بالکل مختلف نوعیت کا ہے۔

نگراں وزیراعظم کا کہنا تھا کہ دنیا بھر میں حکومتیں بڑے پیمانے پر تارکین وطن کیلئے پالیسیاں بنارہی ہیں، کئی ممالک معاشی، موسمیاتی تبدیلی مد نظر رکھ کر تارکین وطن کیلئے فیصلے کرتے ہیں۔

خان پور: پاکستان کے صوبہ خیبر پختونخوا کے علاقے سے غیر قانونی طور پر پاکستان میں داخل ہونیوالے بھارتی باشندہ کو گرفتار کرلیا گیا۔

تفصیلات کے مطابق پاکستان کے صوبہ خیبر پختونخوا کے علاقے خانپور میں غیر قانونی طور پر پاکستان میں داخل ہونیوالے بھارتی  شہری کو پولیس نے گرفتار کرلیا۔

رپورٹ میں بتایا گیا کہ تھانہ اسلام گڑھ میں بھارتی شہری کیخلاف مقدمہ درج کر لیا گیا ہے، ایف آئی آر کے متن کے مطابق 17 سال کے نوجوان کی شناخت بپن ولد متلہ کے نام سے ہوئی ہے۔

ملزم کا تعلق صوبہ راجستھان ایم پی بھارت سے ہے، ملزم سے 110 بھارتی کرنسی نوٹ بھی برآمد ہوئے ہیں جس کے بعد پولیس نے مزید تحقیقات اور کارروائی کا آغاز کر دیا ہے۔

ریگولیٹری اتھارٹی آف پاکستان (ڈریپ) نے ملک بھر میں غیر قانونی میڈیکل ڈیوائسز کی کھلے عام فروخت ہونے کا انکشاف کیا ہے۔

تفصیلات کے مطابق ریگولیٹری اتھارٹی آف پاکستان نے غیر قانونی میڈیکل ڈیوائسز سے متعلق ہنگامی الرٹ جاری کردیا۔

ڈریپ نے چھ مقامی اور عالمی کمپنیز کی تیارکردہ میڈیکل ڈیوائسز کو غیر رجسٹرڈ قرار دیدیا، ڈریپ نے کہا کہ غیر رجسٹرڈ ڈرپ سیٹ، سرنج، کینولہ فروخت ہو رہی ہیں۔

ڈریپ کا کہنا تھا کہ برطانوی، بھارتی، اماراتی میڈیکل ڈیوائسز غیر قانونی فروخت ہو رہی ہیں، برطانوی، اماراتی کمپنی کا تیار کردہ آئی وی کینولہ غیر قانونی فروخت ہو رہا ہے۔

ڈریپ نے جاری الرٹ میں کہا کہ بھارتی کمپنی کا تیار کردہ ڈرپ سیٹ غیر قانونی فروخت ہو رہا ہے، چھ ملکی، غیر ملکی سرنج، کینولہ، ڈرپ کٹ رجسٹرڈ نہیں ہیں، غیر قانونی میڈیکل ڈیوائسز کی فروخت کے بارے شکایات ملی ہیں۔

 ڈریپ کا کہنا ہے کہ غیر رجسٹرڈ میڈیکل ڈیوائسز مریض کی زندگی کیلئے خطرہ بن سکتی ہیں، غیر رجسٹرڈ میڈیکل ڈیوائسز انفیکشن کے پھیلاو کا سبب بن سکتی ہیں، غیر رجسٹرڈ میڈیکل ڈیوائسز کی تیاری، کوالٹی، سیفٹی غیر یقینی ہے۔

ڈریپ نے کاری کردہ الرٹ میں کہا کہ غیر رجسٹرڈ میڈیکل ڈیوائسز غیر محفوظ ہو سکتی ہیں، غیر رجسٹرڈ میڈیکل ڈیوائسز کی شپنگ، اسٹوریج غیر محفوظ ہو سکتی ہے۔

ڈریپ نے کہا کہ فیلڈ فورس غیر رجسٹرڈ میڈیکل ڈیوائسز ضبطی کیلئے سرویلنس بڑھائیں اور غیر رجسٹرڈ میڈیکل ڈیوائسز کا اسٹاک ضبط کریں ساتھ ہی کیمسٹ غیر رجسٹرڈ میڈیکل ڈیوائسز کی سیل روکنے کیلئے سٹاک چیک کریں۔