بوستان: پشین میں مارخور کا غیر قانونی شکار کرنے کے الزام میں تین افراد کو گرفتار کرلیا گیا جبکہ مردہ مار خور بھی برآمد ہوا ہے۔
تفصیلات کے مطابق بلوچستان کے ضلع پشین کے علاقے بوستان میں لیویز فورس نے کارروائی کرتے ہوئے مار خور کے غیر قانونی شکار میں ملوث 3 افراد کو گرفتار کرکے مقدمہ درج کرلیا، ملزمان کے قبضے سے مردہ مار خور بھی برآمد ہوا ہے۔
لیویز فورس کا کہنا ہے کہ گرفتار ملزمان نے انڈسٹریل زون کے عقب میں جیپ میں شکار کیا جانے والا مارخور چھپا رکھا تھا جسے برآمد کرلیا گیا ہے، گرفتار ہونے والوں میں اظہار خان، مصور خان اور صدام خان شامل ہیں۔
پروجیٹ ڈائریکٹر محکمہ جنگلی حیات نیاز کاکڑ نے بتایا گرفتار افراد نے تکتو کے علاقے میں مار خور کا شکار کیا تھا، ملزمان کے خلاف وائلڈ لائف ایکٹ کی خلاف ورزی کے تحت مقدمہ درج کرلیا گیا ہے۔
واضح رہے کہ گزشتہ ماہ چترال میں امریکی شکاری نے تاریخ کی سب سے بڑی بولی 2 لاکھ 71 ہزار امریکی ڈالر (ساڑھے 7 کروڑ پاکستانی روپے) کی بولی کے عوض کشمیری مارخور کا شکار کیا تھا۔
