پاکستان تحریک انصاف کے بانی عمران خان نے کہا ہے کہ یہ تاثر غلط ہے میں نے غیر مشروط معافی مانگی ہے۔
پاکستان تحریک انصاف( پی ٹی آئی) کے بانی عمران خان نے غیر رسمی گفتگو میں کہا کہ میں پیشگوئی کررہا ہوں، حکومت کے پاس دو ماہ کا وقت ہے، حکومت دلدل میں پھنستی جارہی ہے، میرے پاس بہت وقت ہے، آپکے پاس وقت ختم ہورہا ہے، یہ بیوقوف ہیں انہیں اب بھی سمجھ نہیں آرہی۔
بانی پی ٹی آئی نے کہا کہ 9 مئی کی سی سی ٹی وی میں پی ٹی آئی کے لوگ سامنے لائیں تو معافی مانگوں گا، یہ تاثر غلط ہے میں نے غیر مشروط معافی مانگی ہے، مجھ سے مذاکرات کیلئے کسی نے رابطہ نہیں کیا، ہم بس 9 مئی پر انصاف چاہتے ہیں۔
بانی پی ٹی آئی کا کہنا تھا کہ میں صرف اور صرف پاکستان کے لیے بات کرنے کا کہہ رہا ہوں، جتنے مقدمات بنانے ہیں بنا لیں کوئی ڈیل نہیں کروں گا کیوں کہ ڈیل وہ کرتا ہے جس نے کوئی جرم کیا ہو۔
بانی پی ٹی آئی کا مزید کہنا تھا کہ حکومت کی پوری کوشش ہے پی ٹی آئی کسی طرح ختم ہوجائے، اگر موجودہ حکومت کی زیر نگرانی دوبارہ الیکشن ہوئے تو ہم نہیں مانیں گے۔
پاکستان تحریک انصاف( پی ٹی آئی) کے بانی عمران خان غیر رسمی گفتگو میں کہا کہ القادر ٹرسٹ کیس میں گواہ پیش کروں گا لیکن شناخت ابھی نہیں بتاؤں گا۔
