کویت سٹی: کویت میں دو ہزار کے قریب غیر ملکی اساتذہ کی ملازمت ختم کر دی گئی۔
تفصیلات کے مطابق کویتی وزارت تربیت نے ایک ہزار 815 غیر ملکی اساتذہ کو ملازمت سے فارغ کر کے ان کی جگہ کویتی شہری تعینات کر دیے ہیں۔
تعلیم وتربیت کے اداروں میں مختلف شعبوں کے 209 غیر ملکی سربراہان کو بھی ملازمتوں سے فارغ کر دیا گیا ہے۔
عاجل ویب کے مطابق غیر ملکیوں کو وزیر تربیت اور اعلیٰ تعلیم ڈاکٹر حمد کی براہ راست ہدایت پر تدریس اور انتظامیہ کے عہدوں سے فارغ کیا گیا ہے۔
کویتی وزارت کے ترجمان نے بیان میں کہا کہ حکومت نے 2017 میں سرکاری اسامیوں پر کام کرنے والے غیر ملکیوں کی جگہ کویتی شہریوں کی تقرری کے قواعد و ضوابط مقرر کیے تھے، اسی پالیسی کے تحت غیر ملکی اساتذہ اور دفتری ذمہ داران کو سبک دوش کیا جا رہا ہے۔
ترجمان نے کہا کویتائزیشن کے اس اقدام سے ملک میں تعلیمی عمل بہتر ہوگا، اور تربیت کے شعبے میں استحکام آئے گا، مقامی شہریوں میں بے روزگاری کی شرح کم ہوگی۔
انھوں نے غیر ملکی اساتذہ کے ایثار اور اخلاص کا شکریہ بھی ادا کیا۔
