Tag: فائرنگ کے واقعات

کراچی میں فائرنگ اور پُرتشدد واقعات میں مسلم لیگی رہنما سمیت چار افراد جاں بحق ہوگئے جبکہ امن کی بحالی کے لئے پولیس اور رینجرز کی تابڑ توڑ کاروائیاں جاری ہیں، ٹارگٹڈآپریشن میں درجنوں ملزم گرفتار کر لئے گئے۔

کراچی شہر میں جہاں سیکیورٹی اہلکاروں کی ٹارگٹڈ کاروائیاں جاری ہیں، وہیں جرائم پیشہ افراد بھی آزاد دکھائی رہے ہیں، کورنگی کھڈی اسٹاپ کے قریب نامعلوم افراد نے فائرنگ کرکے مسلم لیگ نون کے مقامی رہنما عبدالحمید کو قتل کردیا۔ 

ورثا کے مطابق مقتول گھر سے بلدیاتی انتخابات کا فارم جمع کرانے کیلئے نکلے تھے، لانڈھی منزل پمپ سے ایک شخص کی لاش ملی، کورنگی نمبر ڈھائی میں فائرنگ سے ایک شخص جان سے گیا، لیاری میرا ناکہ میں فائرنگ سے ایک شخص جاں بحق ہوا۔

لیاری کلا کوٹ، بلدیہ، گلشن معمار، نارتھ ناظم آباد اور رضویہ میں فائرنگ سے ایک ایک شخص زخمی ہوا، تھانہ بوٹ بیسن کی حدود میں بھی ڈکیتی مزاحمت پر فائرنگ سے ایک شخص زخمی ہوا۔

دوسری جانب کراچی میں پولیس اور رینجرز نے قیام امن اور جرائم کے خاتمے کے لئے کمر کس لی، تھانہ گارڈن کی حدود میں پولیس نے جرائم پیشہ افراد کے خلاف کریک ڈاؤن کرتے ہوئے بھتہ خوری، منشیات فروشی، ڈکیتیوں میں ملوث متعدد ملزمان گرفتار کئے۔

نیوکراچی صنعتی ایریا میں پولیس کاروائی میں قتل، اقدام قتل اور ڈکیتیوں میں ملوث چھ ملزمان پکڑے گئے، لیاری سنگولین اور ملیر بکراپیڑی سے گینگ وار میں ملوث دو ملزمان گرفتار کئے گئے، لیاقت آباد میں رینجرز کی کارروائی میں پانچ مشتبہ افراد گرفتار ہوئے، کورنگی ڈھائی نمبر میں رینجرز کی کاروائی کے دوران ایک سیاسی جماعت کے دفتر کی تلاشی بھی لی گئی۔