پشاور: پاک افغان بارڈر پر سرحد پار سے فائرنگ، ایک شخص جاں بحق، تفصیلات کے مطابق باجوڑ ایجینسی میں پاک افغان بارڈر پرسرحد پارسے مارٹرشیل فائر کئے گئے.
جس کے نتیجے میں ایک شخص جاں بحق ہوگیا، مارٹرگولہ گرنے سے ایک گھر بھی تباہ ہوگیا،ذرائع کے مطابق مذکورہ مارٹرشیل دہشت گردوں کی جانب سے فائر کئے گئے۔ واضح رہے کہ افغانستان میں تحریک طالبان کی جانب سے مختلف مقامات پر کارروائیاں جاری ہیں۔
کراچی: شہر میں ٹارگٹ کلنگ کے واقعات میں فائرنگ سے مزید تین افراد جاں بحق ہوگئے۔ لیاری کے علاقےمیرا ناکہ میں دستی بم حملے میں بچوں سمیت آٹھ افراد زخمی ہو گئے۔ نیوکراچی میں مبینہ پولیس مقابلے میں ٹارگٹ کلر بھی مارا گیا۔
تفصیلات کے مطابق کراچی میں فائرنگ کے مختلف واقعات میں تین افراد کو زندگی کےحق سے محروم کردیا گیا۔ کراچی کے علاقےملیر ندی کے قریب نامعلوم افراد کی فائرنگ سے ایک شخص جاں بحق ہوگیا۔ واٹرپمپ کے قریب فائرنگ سے ایک شخص زندگی کی بازی ہارگیا جبکہ ملیر ملوک ہوٹل پر بھی نامعلوم افراد کی فائرنگ سے ایک شخص جان کی بازی ہار گیا۔
دوسری جانب رات گئے نارتھ کراچی میں پولیس کارروائی کے دوران زخمی ہونے والا ٹارگٹ کلر فیصل عرف ماکھا اسپتال میں دوران علاج دم توڑ گیا۔ پولیس کا کہنا ہے کہ ہلاک ملزم پندرہ سے زائد افراد کی ٹارگٹ کلنگ میں ملوث تھا۔
جبکہ لیاری کے علا قے میرا ناکہ پر گزشتہ شب نامعلام ملزمان نے دستی بم سے حملہ کیا جس سے بچوں سمیت آٹھ افراد زخمی ہو گئے۔
پولیس کے مطابق لاشوں اور زخمیوں کو قریبی اسپتالوں پہنچایا گیا جہاں زخمیوں کو طبی امداد دی گئیں جبکہ لاشوں کا پوس مارٹم کیا جاسکے۔
سرگودھا: کوٹ مومن میں دو گروہوں کے درمیان اراضی کے تنازع پر ایک گروہ کی فائرنگ سے پانچ افراد جاں بحق ہوگئے، وزیراعلٰی شہباز شریف نے واقعہ کا نوٹس لے لیا ہیں۔
سرگودھا کے علاقے کوٹ مومن کے نواحی گاؤں کوٹ راجہ کے رہائشی پانچ افراد اعجاز، توقیر، غلام حسین، نوید اور صفدر عدالت میں پیشی کیلئے گاڑی میں بھلوال جا رہے تھے کہ گھات لگائے مخالف گروپ نے شدید فائرنگ کردی جس کے نتیجے میں پانچ افراد جاں بحق ہوگئے۔
مقتولین کی لاشیں بھلوال ہسپتال منتقل کر دی گئیں ہیں ۔
وزیراعلٰی شہباز شریف نے واقعہ کا نوٹس لیتے ہوئے آر پی او سرگودھا سے ہلاکتوں اور دونوں گروپوں کے درمیان تنازع کی رپورٹ طلب کر لی ہے، وزیرِاعلی نے متعلقہ حکام سے افسوسناک سانحہ میں ملوث ملزمان کی گرفتاری کی ہدایت کی۔
دونوں گروپوں کے درمیان اراضی کا تنازع تھا، گذشتہ ماہ بھی دونوں گروپوں کے درمیان فائرنگ کے نتیجے میں دو افراد ہلاک ہوئے تھے۔
کراچی :شہر میں فائرنگ کے واقعات میں نوزائیدہ بچے سمیت پانچ افراد جان کی بازی ہار گئے۔فائیواسٹار چورنگی پر پولیس کی مبینہ فائرنگ سے شہری جاں بحق اور تین ڈاکو زخمی حالت میں گرفتار کرلیے گئے۔
تفصیلات کے مطابق کراچی میں فائرنگ اور پرتشدد واقعات کا سلسلہ تھم نہ سکا۔پولیس حکام کے مطابق صدر ایمپریس مارکیٹ کے قریب فائرنگ سے ایک شخص جاں بحق ہوا۔ابراہیم حیدری اور نیوکراچی سے دو افراد کی لاشیں ملیں۔منگھو پیر کے علاقے سے نوزائیدہ بچے کی لاش ملی۔
بوہرہ پیرمیں فائرنگ سے زخمی ہونے والا شخص دوران علاج چل بسا۔گلستان جوہر میں بینک ڈکیتی کی کوشش سیکورٹی گارڈ نےنے ناکام بنادی ۔ڈکیتی کی سی سی ٹی وی فوٹیج اے آر وائی نیوز نے حاصل کرلی ہے۔
ٹارگٹڈ کارروائیوں میں فائیو اسٹار چورنگی کے قریب پولیس مقابلے میں تین ڈاکو زخمی حالت میں گرفتار کرلئے۔فائرنگ کی زد میں آکر رکشہ ڈرائیور زخمی ہوگیا جس پر مشتعل مظاہرین نے موٹر سائیکل کو آگ لگادی ۔رینجرز نے پورٹ قاسم میں کارروائی کرکے سیاسی جماعت سے تعلق رکھنے والے دو ٹارگٹ کلر گرفتار کرلئے ۔
علاوہ ازیں فائیو اسٹار چورنگی کے قریب مبینہ پولیس مقابلے میں جاں بحق ہونے والے اسد نامی شہری کے ورثاء نے فائیو اسٹار چورنگی پر مقتول کی نعش رکھ کر احتجاجی مظاہرہ کیا،اور متعلقہ حکام سے مطالبہ کیا کہ اسد کے قتل میں ملوث ملزمان کو گرفتار کیا جائے، اس موقع پر متحدہ قومی موومنٹ کے رہنماء بابر غوری،خواجہ اظہار الحسن ودیگر بھی موجود تھے۔
سیالکوٹ: بھارتی فوج کی سیالکوٹ ورکنگ باؤنڈری پربلااشتعال فائرنگ اور گولہ باری کا سلسلہ نہ رک سکا،چناب رینجرز نے بھی بھرپور کارروائی کرتے ہوئے بھارت کو منہ توڑ جواب دیا۔
بھارتی افواج بازنہیں آئی ۔سیالکوٹ کے چارواہ اور ہڑپال سیکٹر پر بھارتی فورسز کی بلااشتعال فائرنگ اور گولہ باری بدستور جاری ہے ،بھارتی فورسز کی رات سے جاری فائرنگ کا چناب رینجرز نے کرارا جواب دیا اوربھرپورکارروائی کی ۔
چناب رینجرز کے بھارت کو منہ توڑ جواب میں بھارتی توپوں کو خاموش کردیا۔ ورکنگ باؤنڈری لائن پربھارتی فورسز کی فائرنگ اور گولہ باری سے چناب رینجرز کی چیک پوسٹوں کو نشانہ بنانے کی کوشش کی گئی۔
رہائشی سرحدی علاقوں سمیت مقامی آبادی پر بھی مارٹر گولے برسائے گئے،جس سے لوگوں میں خوف و ہراس پھیل گیا۔بھارتی جارحیت سے اب تک درجنوں افراد شہید ہوچکے ہیں۔
کوئٹہ: دستی بم حملوں اور فائرنگ کے چار واقعات میں چھ افراد جاں بحق اور متعدد زخمی ہوگئے۔
کوئٹہ میں مختصر عرصے میں امن وامان قائم کرنے کے تمام حکومتی دعوے ریت کی دیوار ثابت ہوئے، کوئٹہ ایک بار پھر بم دھماکوں سے گونج اٹھا، پہلا دستی بم حملہ نامعلوم حملہ آوروں نے کوئٹہ کے وسطی علاقے ڈبل روڈ پر حجام کی دکان پر کیا۔
حملے کے بعد دکان پر شدید فائرنگ بھی کی گئی، جس کے نتیجے میں ملتان سے تعلق رکھنے والا دکان کا مالک اور دکان پر موجود دیگرپانچ افراد جاں بحق ہوگئے۔
دوسرا دستی بم حملہ سریاب روڈ پر فوٹو گرافر کی دکان پر کیا گیا جس میں دوافراد زخمی ہوئے۔
دوسری جانب جائنٹ اور کاسی روڈ پر ہونے والے فائرنگ کے واقعات میں دو افراد زخمی ہوئے، زخمیوں کو سول اسپتال اور سی ایم ایچ اسپتال منتقل کردیا گیا ہے۔
نواب شاہ : دوگروپوں کےدرمیان مسلح تصادم کے نتیجے میں تین افرادہلاک ہوگئے جبکہ چارافراد زخمی ہوگئے۔فائرنگ کا واقعہ پرانی دشمنی کی بنا پر پیش آیا۔
تفصیلات کے مطابق نوابشاہ میں تین افراد پُرانی دشمنی کی بھینٹ چڑھ گئے، نواب شاہ کے قریبی گاؤں سائیں دارراؤ میں علی الصبح دو گروپ آپس میں لڑ پڑے۔ دونوں گروپوں میں شدید فائرنگ کے نتیجے میں تین افراد جان سے ہاتھ دھو بیٹھے اور چار افراد شدید زخمی ہوگئے۔
جنہیں فوری طور پر اسپتال منتقل کردیا گیا ہے۔پولیس معمول کے مطابق واقعے کے بعد پہنچی اور علاقے کو گھیرے میں لے لیا ۔واقعے کے بعد علاقے میں شدید خوف وہراس پایا جاتا ہے۔ پولیس حکام واقعے کو پُرانی دشمنی کا شاخسانہ بتاتے ہیں تاہم مزید تحقیقات جاری ہے۔
کراچی میں پُر تشدد واقعات کا سلسلہ تھم نہ سکا۔ فائرنگ اور دیگر واقعات میں چار افراد جان کی بازی ہار گئے۔ کراچی میں پُرتشدد واقعات کا سلسلہ جاری ہے ۔شہر قائد میں ایک اور صبح کا آغاز قتل و غارت گری سے ہوا۔ پولیس کے مطابق حسین آباد میں نا معلوم افراد کی فائرنگ سے تین افراد جاں بحق ہوئے ۔
جاں بحق افراد کی شناخت عمران ،نوید اورساجد کے ناموں سے ہوئی۔پولیس کے مطابق حملہ آور دو موٹرسائیکل پرسوار چار افرادتھے جنہوں نے نائن ایم ایم پستول سے فائرنگ کی ۔
جائے وقوعہ سے گولیوں کے بارہ خول برآمد ہوئے۔ رات گئے اورنگی ٹاؤن میں چھری کے وار سے ایک شخص کو قتل کردیا گیا ۔ لیاری چیل چوک اور کلفٹن کی نیلم کالونی میں نامعلوم افراد کی فائرنگ سے دو افراد زخمی ہوئے۔
دوسری جانب بلدیہ سعیدآبادمیں رینجرز نے کارروائی کے دروان قتل کی متعدد وارداتوں میں مطلوب ٹارگٹ کلرکو گرفتار کرلیا۔مچھر کالونی میں پولیس کارروائی میں اسٹریٹ کرائمزکی متعددوارداتوں میں ملوث ایک ملزم گرفتار ہوا۔
اسلام آباد: پاکستان عوامی تحریک اور مسلم لیگ ق کے رہنماؤں سے غیرملکی سفیروں کی ملاقات میں دھرنوں سےمتعلق آگاہ کیا۔
عوامی تحریک اورق لیگ کے رہنماؤں سے غیرملکی سفیروں نے الگ الگ ملاقاتیں کی، ق لیگ کی جانب سے چوہدری شجاعت،مشاہد حسین سید اور وسیم سجاد غیرملکی سفیر وں سے ملے ۔ جب کہ عوامی تحریک کی جانب خرم نواز گنڈا پور اور رحیق عباسی نے سفارت کاروں سے ملاقات کی، ملاقات کرنے والوں میں کینڈا، آسٹریلیا،اٹلی،بوسنیا،جنوبی کوریا ،کیوبا،ازبکستان ،ارجنٹینا اور مصر کے سفیر شامل تھے ۔
لاہور: سسیشن جج نے پاکستان عوامی تحریک کے کارکنوں پر بلا اشتعال فائرنگ اورکلنگ کے خلاف ایس ایچ او تھانہ سیکریٹریٹ اوروفاق کے خلاف نوٹس جاری کردیا ہے۔
پاکستان عوامی تحریک کے وکیل راجا ظہور الحسن اور ملک وقاص سیشن جج راجا جواد کی عدالت میں پیش ہوئے، پاکستان عوامی تحریک کے وکیل راجا ظہور الحسن کا کہنا تھا کہ فائرنگ اور شیلنگ کے نتیجے میں سینکڑوں افراد زخمی اور تین قتل ہوئے تھے۔
جس پر عدالت نے بائیس اے کی درخواست سماعت کیلئے منظورکرتے ہوئے فریقین کو نوٹس جاری کردیا ہے۔
عدالت نے وفاق اورتھانہ سیکریٹریٹ کے ایس ایچ او کو عدالت میں تحریری جواب دو دن میں داخل کرنے کا حکم بھی دیا ہے، جس کے بعد کیس کی سماعت دس ستمبر تک ملتوی کردی گئی ہے۔