Tag: فائرنگ
-
کراچی میں فائرنگ:دو فراد ہلاک،کریکر حملے میں چودہ زخمی
کراچی میں فائرنگ اور پرتشدد واقعات میں دو افرادجان کی بازی ہارگئے۔ قصبہ کالونی میں شادی کی تقریب پرکریکر حملے میں چودہ افراد زخمی ہوگئے۔ کراچی میں پر تشدد واقعات تھمنے کا نام نہیں لے رہے۔
پولیس کے مطابق گلستان جوہر بلاک سترہ میں ڈکیتی کے دوران مزاحمت پرفائرنگ سے اسلم نامی شخص زندگی کی بازی ہار گیا جبکہ شعیب نامی شخص زخمی ہوا۔ بلدیہ ٹاون کے علاقے گلشن غازی کے قریب سے ایک شخص کی لاش ملی مقتول کو کلہاڑیوں کے وار کرکے قتل کیا گیا۔ مقتول کی شناخت نہیں کی جاسکی ہے۔
قصبہ کالونی کے مسلم آبادٹاؤن میں شادی کی تقریب میں رقص و سرورکی محفل جاری تھی کہ نامعلوم ملزمان نے کریکرسے حملہ کردیا۔حملے میں چودہ افراد زخمی ہوئے ۔ زخمی ہونے والوں میں دو خواجہ سرا بھی شامل ہیں۔
زخمیوں کو شہر کے مختلف اسپتالوں میں منتقل کیا گیا جہاں دو افراد کی حالت تشویشناک بتائی جاتی ہے۔ ملیر مندر کے قریب ڈکیتی کے دوران مزاحمت پر فائرنگ سے تین افرادزخمی ہوگئے۔
-
غزہ :اسرائیلی فوج کی فائرنگ، 3 فلسطینی زخمی
مذاکراتی عمل شروع ہونے کے باوجود اسرائیلی افواج کی جارحیت جاری ہے، فائرنگ سے تین فلسطینی زخمی ہوگئے۔
میڈیا رپورٹس کے مطابق غزہ اسرائیلی فوج کی جانب سے فصلوں کو تباہ کرکے شاہراہ بنانے کے خلاف احتجاج کرنے والے مظاہرین پر فائرنگ کی گئی، جس کے باعث تین فلسطینی زخمی ہوگئے۔
زخمی ہونے والے مظاہرین کو فوری طورپر قریبی اسپتال بھیج دیا گیا، یاد رہے کہ تین روزقبل بھی اسرائیلی فضائیہ نے پانچ مختلف مقامات پر فضائی حملے کئے تھے، جن میں پانچ افراد زخمی ہوگئے تھے، جن میں تین بچے بھی شامل تھے۔
-
راولپنڈی:ڈھوک سیداں میں فائرنگ، 2سگے بھائی سمیت 4افراد قتل
راولپنڈی کے علاقے مصریال روڈ ڈھوک سیدان میں دو سگے بھائیوں سمیت چار افراد دیرینہ دشمنی کی بھینٹ چڑھ گئے۔
دو موٹر سائیکلوں پر سوار چار مسلح افراد نے گھر میں گھس کر فائرنگ کی، جس کے نتیجے میں دو سگے بھائیوں حضرت علی اور شیر علی سمیت زرغون اور سید رازم زخموں کی تاب نہ لاتے ہوئے دم توڑ گئے۔
ابتدائی پولیس تفتیش کے مطابق مارنے اور مرنے والوں کا تعلق افغانستان سے ہے۔
-
کراچی:لیاری میں کشیدگی، 2افراد جاں بحق ، بچی بازیاب
کراچی کےعلاقے لیاری میں بدستور خوف و ہراس نے پنجے گاڑ رکھے ہیں، پولیس نے کورنگی انڈسٹریل ایریا میں کارروائی کرتے ہوئے مغوی بچی بازیاب کرالی۔
لیاری میں رات گئے دو گروپوں کے تصادم سے کشیدگی اور خوف ہراس پھیل گیا، لیاری میں اجارہ داری قائم کرنے کی جنگ نے مقامی لوگوں کو شدید اذیت میں مبتلا کر رکھا ہے، حالات کشیدہ ہونے پر لوگ گھروں میں محصور ہو کر رہ گئے۔
دوسری جانب رات میں بنارس کے قریب نامعلوم افراد نے فائرنگ کرکے دو افراد کو موت کے گھاٹ اتاردیا، گلشن اقبال یونیورسٹی روڈ پر ڈکیتی کے دوران مزاحمت پر فائرنگ سے ایک شخص زخمی ہوا۔
اُدھر کورنگی انڈسٹریل ایریا پولیس نے کاروائی کرکے تیرہ سالہ بچی بازیاب کرالی، کارروائی کے دوران فیاض نامی اغواکار کو گرفتار کرکے اسلحہ برآمد کرلیا گیا۔
پولیس کے مطابق ملزم بچی کو ڈیرہ اسماعیل خان سے اغوا کرکے کراچی لایا تھا، ملزم پنجاب اور خیبر پختون خواہ پولیس کو متعدد مقدمات میں مطلوب تھا، اورنگی ٹاؤن میں بھی پولیس نے کارروائی کرتے ہوئے سترہ مشتبہ افراد حراست میں لے لئے۔
-
انڈیانا: شاپنگ مال میں فائرنگ، 2 خواتین سمیت 3 افراد ہلاک
امریکی ریاست انڈیانا کی سپرمارٹ میں مسلح شخص کی فائرنگ سے دو خواتین ہلاک ہوگئیں، پولیس کی جوابی کارروائی میں حملہ آور بھی مارا گیا۔
امریکی ریاست انڈیانا کے شہر الخارت میں معروف شاپنگ مال میں فائرنگ کے واقعے میں دو خواتین ہلاک ہوگئیں، پولیس حکام کا کہنا ہے کہ رات گئے مسلح شخص نے مارٹ میں گھس کر اندھا دھند فائرنگ شروع کر دی۔
جس کے نتیجے بیس سالہ مارٹ کی ملازمہ کرسٹل ڈائیک اور شاپنگ کے لیے آئی ہوئی چوالیس سالہ ریچل موقع پر ہلاک ہوگئی، پولیس کی جوابی کارروائی کے نتیجے میں حملہ آور بھی ہلاک ہوگیا۔
ملزم کی شناخت بائیس سالہ شان بئیر کے نام سے ہوئی ہے، پولیس نے واقعہ کی تحقیقات شروع کر دی ہے تاہم فائرنگ کی وجوہات تاحال معلوم نہیں ہوسکی۔
-
کراچی:قتل و غارت گری کا سلسلہ جاری،پولیس اہلکار نشانے پر
کراچی کے مختلف علاقوں میں فائرنگ سے دو پولیس اہلکاروں سمیت چار افراد لقمہ اجل بن گئے، یونیورسٹی روڈ پر فائرنگ سے حساس ادارے کا اہلکار زخمی ہوگیا، کورنگی میں پولیس موبائل پر فائرنگ کرنے والے تین ملزمان کو گرفتار کرلیا گیا۔
کراچی میں قتل و غارت گری کا سلسلہ جاری ہے، شہر میں پولیس اور رینجرز کی ٹارگٹڈ کارروائیوں کے باوجود ٹارگٹ کلنگ کا سلسلہ تھم نہ سکا اور نہ ہی اس میں کمی نظر آرہی ہے، یونیورسٹی روڈ پر نامعلوم افراد کی کار پر فائرنگ سے ایک شخص زخمی ہوگیا جبکہ خاتون محفوظ رہی۔
ایس پی گلشن مقدس حیدر کا کہنا ہے کہ زخمی ہونے والا نوجوان حساس ادارے کا اہلکار ہے، پولیس حکام کے مطابق صبح سویرے تھانہ تیموریہ کی حدود شفیق موڑ کے قریب نامعلوم موٹرسائیکل سواروں افراد معمول کی گشت میں مصروف پولیس موبائل پر فائرنگ کرکے فرار ہوگئے۔
جسکے نتیجے میں دو پولیس اہلکارپینتیس سالہ محمد جاوید اور تیس سالہ آصف جان بحق ہوگئے جبکہ سلیم نامی پولیس اہلکار اور ایک راہگیر زخمی بھی ہوئے، کارساز کے قریب بھی نامعلوم افراد نے گاڑی پر فائرنگ کی، جسکے نتیجے میں سجاد نامی شخص چل بسا، جسکی لاش کو ضابطے کی کاروائی کیلئے اسپتال منتقل کیا گیا۔
رات گئے بلدیہ رشید آباد سے بھی ایک خاتون کی لاش ملی، گلستان جوہر میں بھی فائرنگ سے ایک شخص زخمی ہوگیا، کورنگی میں پولیس موبائل پر فائرنگ کرنے والے تین ملزمان کو گرفتار کرلیا گیا، ایسٹ زون پولیس نے مختلف کارروائیوں کے دوران بائیس ملزمان کو گرفتار کرکے اسلحہ منشیات اور چھینی گئی موٹر سائکلیں برآمد کیں۔
-
عراق:بم دھماکوں سے 75افراد جاں بحق، متعدد زخمی
عراق میں پرتشدد کاروائیوں، بم دھماکوں اور فائرنگ کا سلسلہ جاری ہے، تازہ ہونے والے بم دھماکوں سے پچھتر افراد جاں بحق اور متعدد زخمی ہوگئے۔
عراقی پولیس اور طبی حکام کے مطابق ملک کے مختلف علاقوں میں سلسلہ وار بم دھماکوں کے باعث زیادہ ہلاکتیں دارالحکومت بغداد میں ہوئیں، جس میں کم از کم 75 افراد جاں بحق اور درجنوں زخمی ہوئے۔
اس کے علاوہ عراق کے جنوبی صوبے دیالہ کے دارالحکومت بقوبہ کے جنوب میں واقع ایک گاؤں میں بم حملے میں سولہ افراد جاں بحق ہوئے، ادھر عراقی وزیراعظم نوری المالکی نے عراق میں ہونے والے بم دھماکوں پر کہا کہ دہشتگرد عراق کو غیرمستحکم کررہے ہیں۔
انہوں نے شہریوں سے ایپل کی کہ وہ عراق سے دہشتگردوں کو نکال دیں اور قائم امن کے لئے حکومت سے تعاون کریں، اقوامِ متحدہ کی رپورٹ کے مطابق عراق میں دوہزار تیرہ میں سات ہزار آٹھ سو اٹھارہ شہری اور ایک ہزار سے زائد سیکیورٹی کے اہلکار جاں بحق ہوئے۔
