Tag: فائرنگ

کراچی میں فائرنگ اور پرتشدد واقعات کے دوران سیاسی کارکن اور پولیس اہلکاروں سمیت چھ افراد جاں بحق اور چار افراد زخمی ہوگئے۔ پولیس حکام کے مطابق بلدیہ ٹاون سات نمبر میں عوامی نیشنل پارٹی کے مقامی رہنما رزاق بونیری کی دکان پر نامعلوم افرادنے دستی بم حملہ کرنے کے بعد اندھا دھند فائرنگ کردی جس کے نتیجے میں دو پولیس اہلکار خان محمد اور عبدالرحمان جاں بحق ہوگئے اور ایک راہگیر زخمی ہوا اور دکان کو بھی نقصان پہنچا۔

ترجمان اے این پی کے مطابق بلدیہ ٹاون کے رہنما اور پی ایس91کے امیدوار عبدالرزاق بونیری کی سعید آباد بلاک جے میں واقع بیٹری دکان پر حملہ،ہینڈ گرنیڈ اور فائرنگ کی گئی ،سینیٹر شاہی سید نے واقعے کی سخت الفاظ میں مذمت کی۔

بلدیہ ٹاون ہی کے علاقے مواچ گوٹھ میں نامعلوم افراد کی فائرنگ سے تین افراد شدید زخمی ہوگئے جن میں دو افراد اسپتال پہنچ کر دم توڑ گئے مقتولین کی شناخت شفیق محمد اور امیر بخش کے نام سے ہوئی ہے، ادھر بلدیہ ٹاون کے ہی علاقے رشید آباد میں نامعلوم افراد نے فائرنگ کرکے قاری جعفر نامی شخص کو ابدی نیند سلادیا،پی ٹی آئی سندھ کے ترجمان کے مطابق ٹارگٹ کلنگ کا نشانہ بننے والے قاری جعفر پاکستان تحریک انصاف کے سرگرم کارکن تھے ۔

اورنگی ٹاون بارہ نمبر میں چمچہ ہوٹل کے قریب نامعلوم افراد کی فائرنگ سے قمر الدین نامی شخص لقمہ اجل بنا۔اورنگی مومن آباد اور بوٹ بیسن کے علاقے میں فائرنگ سے دو افراد زخمی ہوئے جنھیں طبی امداد کیلئے اسپتال منتقل کیا گیا۔

کراچی کے مختلف علاقوں میں فائرنگ اور پرتشدد واقعات میں دو افراد جاں بحق ہوگئے۔ پولیس اور رینجرز نے ٹارگٹڈ کارراوئیوں میں متعدد مشتبہ افراد کو حراست میں لے لیا۔ کراچی میں قتل و غارت گری کے بڑھتے واقعات کے بعد پولیس نے مختلف علاقوں میں سرچ آپریشن کر کے متعدد مشتبہ افراد کو حراست میں لے لیا۔رینجرز نے لیاری کے علاقوں رانگی واڑہ اور عیسیٰ نگری میں کارروائی کرتے ہوئے گینگ وار اور بھتہ خوری میں ملوث تین افراد کو گرفتارکرلیا۔

ملزمان کے قبضے سے اسلحہ بھی برآمد کیا گیا۔ اورنگی ٹاؤن فرنٹئیر کالونی میں پولیس نے داخلی اور خارجی راستوں کی ناکہ بندی کرکے سرچ آپریشن کیا جس کے دوران متعدد مشتبہ افراد کو حراست میں لیا گیاپولیس ذرائع کے مطابق سرچ آپریشن گذشتہ شب پیر آباد کے علاقے میں پولیس موبائل پر فائرنگ کے واقعے میں ملوث ملزمان کی موجودگی کی اطلاع پر کیا گیا تاہم کارروائی کے دوران پولیس کو ئی اہم کامیابی حاصل نہیں کرسکی۔

لیاقت آباد اور شریف آباد پولیس نے ایف سی ایریا، الکرم اسکوائر، اپسرا اپارٹمنٹ اور بندھانی کالونی میں کارروائی کے دوران پانچ مشتبہ افراد کو حراست میں لیا، کیماڑی پولیس نے بھی بینک ڈکیتیوں اور پولیس مقابلوں میں ملوث اشتہاری ملزم جاوید قریشی کو گرفتار کرکے اسلحہ برآمد کرلیا۔ ملزم کو ملتان کی عدالت نے اشتہاری قرار دیا تھا۔ بوٹ بیسن پولیس نے بھی اسٹریٹ کرائمز میں ملوث ملزم کو گرفتار کرکے اسلحہ برآمد کرلیا۔

کراچی کے علاقے ماڑی پور میں قتل کئے جانے والے ایک ہی خاندان کے چار افراد کو قتل کرنے والے دو ملزمان کو گرفتار کرلیا گیا ہے ملزمان کا تعلق لیاری گینگ وار سے ہے۔

گزشتہ روز ماڑی پور روڈ سے متصل مشرف کالونی میں نالے سے خاتون اور بچوں سمیت چار افراد کی لاشیں ملیں جنہیں گولیاں مارکر موت کے گھاٹ اتارا گیاتھا جبکہ ایک پندرہ سالہ لڑکی زخمی حالت میں ملی۔ مقتولین کی شناخت پچاس سالہ مظفر اس کی اہلیہ شازیہ اور دو بیٹوں اٹھائیس سالہ شاہ میراور بارہ سالہ عمران کےنام سے ہوئی۔

پولیس حکام کے مطابق زخمی بچی اورخاتون کو قتل سے قبل ملزمان نے زیادتی کا نشانہ بھی بنایا تھا، ذرائع کا کہنا ہے ملزمان نے خاندان کو صرف اس بات پر قتل اور درندگی کا نشانہ بنایا مقتولین کا تعلق سیاسی جماعت سے تھا، پولیس کے مطابق ملزمان کا تعلق لیاری گینگ وار سے ہے، ایم کیوایم نے واقعہ کی شدید مذمت کرتے ہوئے قاتلوں کو کیفر کردار تک پہنچانے کا مطالبہ کیا ہے۔