Tag: فارن فنڈنگ کیس

اسلام آباد : عدالت نے فارن فنڈنگ کیس اور دہشت گردی کے مقدمے میں پی ٹی آئی چیئرمین عمران خان کی عبوری ضمانت میں توسیع کردی۔

تفصیلات کے مطابق بینکنگ کورٹ اسلام آباد میں تحریک انصاف کے چیئرمین عمران خان کے خلاف ممنوعہ فنڈنگ کیس کی سماعت ہوئی۔

سماعت بینکنگ کورٹ کی جج رخشندہ شاہین نے کی، راسیکیوٹرراجہ رضوان عباسی عدالت میں پیش ہوئے۔

پراسیکیوٹرراجہ رضوان عباسی نے بتایا کہ عمران خان نے حفاظتی ضمانت ہائی کورٹ سے حاصل کی۔

عمران خان کے وکیل انتظار پنجوتھا نے حاضری سے استثنیٰ کی درخواست دائر کر دی۔

وکیل انتظارپنجوتھا نے کہا کہ عمران خان لاہور میں لانگ مارچ کی قیادت کر رہے ہیں، کیس کا پہلے حدود کا ایشو تھا، اسلام آبادہائیکورٹ نے حدود کا تنازع حل کیا ہے۔

وکیل کا کہنا تھا کہ عمران خان سیاسی پارٹی کے قائد ہیں اوروہ لانگ مارچ کی سربراہی کر رہے ہیں ، ہماری درخواست آج کی حد تک ہے، ویسےعمران خان ہر جگہ پیش ہوتے ہیں۔

پراسیکیوٹر نے استدعا کی کہ عمران خان کی حاضری سےاستثنیٰ کی درخواست مسترد کی جائے ، یہ تو کوئی جواز نہ ہوا، عمران خان لانگ مارچ کر رہے ہیں پیش نہیں ہو سکتے۔

جج نے وکیل انتظار پنجوتھا سے استفسار کیا آپ کچھ کہنا چاہتے ہیں، وکیل انتظار پنجوتھا نے کہا کہ راجہ رضوان عباسی اسپیشل پراسیکیوٹر تعینات ہیں، سپریم کورٹ نے اسپیشل پراسیکیوٹرکی تعیناتی سے متعلق فیصلے دے رکھے ہیں۔

عدالت نے عمران خان کی حاضری سےاستثنیٰ کی درخواست منظور کرتے ہوئے عبوری ضمانت میں 10 نومبرتک توسیع کر دی۔

دوسری انسداد دہشت گردی کی عدالت میں عمران خان کیخلاف تھانہ ترنول میں درج دہشت گردی کے مقدمے کی سماعت ہوئی۔

سماعت انسداد دہشت گردی عدالت کے جج راجہ جواد عباس حسن نے کی، عمران خان کے وکیل بابر اعوان عدالت میں پیش ہوئے۔

بابراعوان نےعمران خان کی آج حاضری سےاستثنیٰ کی درخواست دائرکر دی، عدالت نے عمران خان کی حاضری سےاستثنیٰ کی درخواست منظور کرتے ہوئے عبوری درخواست ضمانت میں 9 نومبر تک توسیع کردی۔

اسلام آباد: ایف آئی اے نے فارن فنڈنگ کیس میں پی ٹی آئی رہنماؤں عمران اسماعیل، نجیب ہارون، اور سیما ضیاء کو جمعرات کو دوبارہ طلب کرلیا۔

تفصیلات کے مطابق فارن فنڈنگ انکوائری میں ایف آئی اے نے تحریک انصاف کے رہنماؤں عمران اسماعیل، نجیب ہارون، اور سیما ضیاء کو جمعرات کو دوبارہ طلب کرلیا۔

ایف آئی اے کی جانب سے رہنماؤں سے صوبائی حلقہ انتخاب کے حوالے سے اکاونٹ کھولنے کے لئے مرکزی پارٹی کااجازت نامہ بھی طلب کیا گیا ہے۔

رہنماؤں سے حلقے کے لئے پی ٹی اے اکاونٹ کھولنے پر صوبائی الیکشن کمیشن میں رجسٹریشن سرٹیفکیٹ کی فراہمی کا بھی کہا گیا ہے

ایف آئی اے نے کھولے گئے اکاونٹ میں اندرون و بیرون ملک سے رقومات کی ترسیل اور رقم کے استعمال کے حوالے سے بھی مرکزی پارٹی کا اجاز نامہ طلب کیا گیا ہے۔

رہنماؤں سے مرکزی پارٹی کے سرٹیفکیٹ کے بغیر پارٹی کے نام سے اکاونٹ نہ کھولنے اور پارٹی کے نام سے کھولے گئے اکاونٹ کو اشخاص کی جانب سے آپریٹ کئے جانے کی تحریری وجوہات طلب کی گئی ہیں۔

مرکزی پارٹی کی اجازت کے بغیر اکاونٹس کھولنے والے بینک حکام کو بھی انکوائری میں طلب کیا گیا ہے۔

خیال رہے فارن فنڈنگ کے حوالے سے پی ٹی آئی رہنما ثمر علی خان بھی ایف آئی اے کو اپنا بیان ریکارڈ کرا چکے ہیں ،،،فارن فنڈنگ کے حوالے سے تحقیقات میں صدر عارف علوی کا نام بھی شامل ہیں

گزشتہ پیشی پر تینوں رینماؤں کو شواہد کیساتھ جوابات جمع کرانے کے لئے سوالنامہ جاری کیا گیا تھا۔

اسلام آباد : پاکستان تحریک انصاف نے الیکشن کمیشن کا اکبر ایس بابر کو فارن فنڈنگ کیس سے الگ کرنے کی درخواست مسترد کرنے کا فیصلہ اسلام آباد ہائیکورٹ میں چیلنج کردیا۔

تفصیلات کے مطابق اکبرایس بابر کو فارن فنڈنگ کیس سے الگ کرنےکی درخواست مسترد ہونے کے معاملے پر پی ٹی آئی نےالیکشن کمیشن کےفیصلے کو ہائی کورٹ میں چیلنج کردیا۔

اسد عمر نے پارٹی سیکریٹری جنرل کی حیثیت سے درخواست دائرکی، جس میں کہا گیا ہے کہ فنڈز کی تفصیلات صرف الیکشن کمیشن کو بتانے کے پابند ہیں۔

درخواست میں کہا گیا کہ اسکروٹنی کمیٹی رپورٹ پرپی ٹی آئی کاجواب اکبرایس بابرکوابھی نہ دیاجائے اور اکبر ایس بابر کو اس کیس سے الگ کیا جائے۔

درخواست کے مطابق الیکشن کمیشن نے پی ٹی آئی کے درخواستیں مسترد کیں، انہیں منظور کیا جائے، تحریک انصاف نے 25 جنوری اور 31 جنوری کو دائر کی گئی درخواستوں کو مسترد کرنے کے فیصلہ چیلنج کیا ہے۔

درخواست میں استدعا کی گئی کہ اسلام آباد ہائیکورٹ الیکشن کمیشن کا 15 مارچ کا حکم کالعدم قرار دے اور رجسٹرار آفس درخواست کو 28 مارچ کے لیے مقرر کر دے الیکشن کمیشن کورٹ آف لا نہیں ہے،ایڈمنسٹریٹواتھارٹی ہے۔

درخواست کے ساتھ حکم امتناع کے لئے بھی متفرق درخواست میں منسلک کیا گیا ہے۔

اسلام آباد : الیکشن کمیشن نے فارن فنڈنگ کیس میں پاکستان تحریک انصاف کی التوا کی درخواست مسترد کرتے ہوئے کہا کہ سات سال سے کیس چل رہا ہے اور کتنا چلانا ہے؟

تفصیلات کے مطابق چیف الیکشن کمشنر کی سربراہی میں تین رکنی کمیشن نے تحریک انصاف پارٹی فارن فنڈنگ کیس کی سماعت کی، پی ٹی آئی کے معاون وکیل الیکشن کمیشن میں پیش
ہوئے جبکہ پی ٹی آئی وکیل انور منصور اور شاہ خاور پیش نہ ہوسکے۔

معاون وکیل نے بتایا کہ انورمنصورکراچی سے اسلام آباد پہنچ گئےمگرشدید بخارہے، جس پر چیف الیکشن کمشنر نے استفسار کیا انوار منصور باہر ملک نہیں گئے تھے ؟ انھوں نے گزشتہ سماعت پر کہا تھا وہ بیرون ملک جارہےہیں۔

پی ٹی آئی کے معاون وکیل نے انورمنصورکی علالت کے باعث ایک ہفتے کے التوا کی استدعا کی، جس پر چیف الیکشن کمشنر سماعت التوا کی پی ٹی آئی کی استدعا مسترد کرتے ہوئے کہا آپ بار بار التوا مانگتے ہیں ، 7سال سےکیس زیرسماعت ہے۔

اکبر ایس بابر کے وکیل احمد حسن نے دلائل میں کہا پارٹی فنڈز تفصیلات صرف الیکشن کمیشن کو بتانے کے پابند ہیں، یہ معاملہ پی ٹی آئی اور الیکشن کمیشن کےدرمیان ہے۔

وکیل اکبر ایس بابر نے پی ٹی آئی کی درخواست پر دلائل دیتے ہوئے کہا اسکروٹنی کمیٹی میں ہمیشہ پی ٹی آئی کی التواکی درخواست آئی، میں نےامریکہ کی ویب سائٹ سےڈیٹالیا، پارٹی ویب سائٹ سےڈیٹالیا،کچھ افرادنےکاغذات فراہم کیا۔

وکیل نے بتایا کہ اسکروٹنی کمیٹی نےامریکی ویب سائٹ سےحاصل ڈیٹاکی تصدیق کی، اسکروٹنی کمیٹی نےتصدیق کر دی اکاؤنٹ چھپائےگئے ، اربوں روپے آئے، کمیٹی نے اس کا ذکر نہیں کیا، لیکن10ملین ڈالرز کی تو کمیٹی نےتصدیق کر دی۔

وکیل اکبرایس بابر کا کہنا تھا کہ انہوں نےغیرملکی اکاؤنٹس کی تفصیلات کمیٹی کونہیں دیں ، پی ٹی آئی چاہتی ہےاکبر ایس بابرکوکیس میں شامل نہ کیا جائے، پی ٹی آئی کی درخواست کومستردکیاجائے۔

چیف الیکشن کمشنر نے کہا آپ پی ٹی آئی کی درخواست پر دلائل دیں ، وکیل کا کہنا تھا کہ کمیٹی نےتصدیق کررہی ہےممنوعہ فنڈنگ ہوئی، یہ غیرمتعلقہ ہےایک ارب کی ممنوعہ فنڈنگ آئی یا 10 روپے کی، درخواست پرجواب نہیں دےسکتےجب تک رپورٹ زیرسماعت نہ آئے۔

چیف الیکشن کمشنر نے ریمارکس دیئے کہ درخواست پر فیصلہ الیکشن کمیشن نے کرناہے ، مجھے تو لگ رہا ہے کہ آپ التوا کر رہے ہیں۔

الیکشن کمیشن نےپی ٹی آئی کی درخواست پر فیصلہ محفوظ کرتے ہوئے غیرملکی فنڈنگ کیس کی سماعت17مارچ تک ملتوی کردی۔