ARYNews.tv | Urdu – Har Lamha Bakhabar

Tag: فاروق ستار

  • اہلیان کراچی کی تضحیک، ایم کیو ایم نے شہباز شریف سے معافی مانگنے کا مطالبہ کر دیا

    اہلیان کراچی کی تضحیک، ایم کیو ایم نے شہباز شریف سے معافی مانگنے کا مطالبہ کر دیا

    کراچی: متحدہ قومی موومنٹ پاکستان کے رہنماؤں نے شہباز شریف کے بیان پر ردِ عمل ظاہر کرتے ہوئے کہا ہے کہ وہ کراچی والوں سے فوری طور پر معافی مانگیں۔

    تفصیلات کے مطابق ایم کیو ایم پاکستان کے سینئر رہنما ڈاکٹر فاروق ستار نے مطالبہ کیا ہے شہباز شریف کا بیان ہتک آمیز ہے، وہ فوری طور پر کراچی والوں سے معافی مانگیں۔

    فاروق ستار نے ن لیگی رہنما کے بیان پر احتجاج کرتے ہوئے کہا کہ شہباز شریف نے اہلیان کراچی کی ہتک کی ہے، وہ بولتے وقت اپنی زبان اور الفاظ کا صحیح استعمال کریں۔

    فاروق ستار نے برہمی کا اظہار کرتے ہوئے کہا کہ الیکشن قریب آتے ہی شریفوں کو کراچی یاد آ جاتا ہے، اپنے ہتک آمیز بیان پر شہباز شریف معافی مانگیں۔

    متحدہ قومی موومنٹ کے سینئر رہنما خواجہ اظہار الحسن نے بھی مسلم لیگ ن کے صدر کے بیان پر رد عمل ظاہر کرتے ہوئے کہا کہ کراچی کو پان سے تشبیہ دینا توہین آمیز ہے۔

    خواجہ اظہار کا کہنا تھا کہ شہباز شریف بتائیں کہ انھوں نے کراچی کو دیا کیا ہے، حیرت انگیز بات ہے کہ تمام لوگوں کو اب کراچی کا خیال آگیا ہے۔

    ایم کیو ایم رابطہ کمیٹی نے بھی شہباز شریف کا بیان افسوس ناک قرار دے دیا، رابطہ کمیٹی نے اپنے بیان میں کہا کہ شہباز شریف کا بیان کراچی کے عوام کی تضحیک کے مترادف ہے، خود کو قومی لیڈر قرار دینے والے شہباز شریف کا بیان باعثِ ندامت ہے، ان کا لب و لہجہ شائستہ کردار کی نفی کرتا ہے۔

    ’کراچی والے پان کھاتے ہیں پاناما نہیں‘

    واضح رہے کہ شہبازشریف نے کراچی میں آکر اہلیان کراچی کی تضحیک کر دی ہے، انھوں نےکراچی والوں کو پان کھانے والا بنا دیا، کہا پان کھانے والوں کے’کرانچی‘ کو لاہور بنائیں گے۔

    کراچی میں پریس کانفرنس کرتے ہوئے شہباز شریف نے کراچی والوں کے تلفظ کا مذاق اڑایا، رپورٹر سے بات چیت میں ہنسنے کو ہنس پرندے سے تشبیہ دے دی، رپورٹر سے کہا ہنس کرسوال کریں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عامر لیاقت اور پی ٹی آئی کے لیے دعا گو ہوں، فاروق ستار

    عامر لیاقت اور پی ٹی آئی کے لیے دعا گو ہوں، فاروق ستار

    کراچی: متحدہ قومی موومنٹ پاکستان کے رہنما ڈاکٹر فاروق ستار نے کہا ہے کہ میں عامر لیاقت اور تحریک انصاف کے لیے دعا گو ہوں۔

    ان خیالات کا اظہار انھوں نے اے آر وائی نیوز کے اینکر پرسن وسیم بادامی کے پروگرام الیونتھ آور میں کیا، انھوں نے کہا کہ ایم کیوایم تاریخ کی سب سے بڑی آزمائش سے گزر رہی ہے۔

    ڈاکٹر فاروق ستار نے کہا کہ میں نے ایم کیو ایم کو تقسیم ہونے اور بکھرنے سے بچایا ہے، پُر یقین لہجے میں کہا ’ایم کیو ایم کا ووٹ بینک تقسیم نہیں ہوگا۔‘

    متحدہ قومی موومنٹ کے رہنما کا کہنا تھا کہ انھوں نے تحریک کے لیے بہت قربانیاں دی ہیں، وہ پارٹی کو بکھرنے نہیں دیں گے۔

    فاروق ستار نے کہا ابھی فائنل نہیں ہوا ہے کہ میں نے این اے 245 سے الیکشن لڑنا ہے یا نہیں، تاہم میں نے قومی اسمبلی کے تین حلقوں سے کاغذات جمع کرائے ہیں۔

    ایم کیو ایم پاکستان کے رہنما فاروق ستار نے الیونتھ آور میں گفتگو کرتے ہوئے کہا کہ انھوں نے عامر لیاقت سمیت کسی بھی مخالف کو آسان نہیں لیا۔

    کراچی کو جنوبی ایشیا کا پیرس بنائیں گے ، شہباز شریف

    فاروق ستار کا کہنا تھا کہ کراچی میں تمام ڈپٹی کمشنرز پیپلز پارٹی کو سپورٹ کر رہے ہیں، خیال رہے کہ آج گرینڈ ڈیمو کریٹک الائنس نے بھی اس حوالے سے اپنے تحفظات کا اظہار کیا ہے۔

    فاروق ستار نے کہا کہ ایم کیو ایم کا مقابلہ کسی سے بھی نہیں ہے، ہمارا مقابلہ ایک سوچ کے ساتھ ہے۔ الیونتھ آور میں گفتگو کرنے والے پی ٹی آئی کے امیدوار عامر لیاقت کے بارے میں کہا کہ وہ عامر لیاقت اور پی ٹی آئی دونوں کے لیے دعا گو ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • کراچی پر آج کل بہت سے لوگوں کی رال ٹپک رہی ہے، فاروق ستار

    کراچی پر آج کل بہت سے لوگوں کی رال ٹپک رہی ہے، فاروق ستار

    کراچی: ایم کیو ایم پاکستان کے رہنما ڈاکٹر فاروق ستار نے کہا ہے کہ کراچی میں آج کل بہت سے لوگوں کی رال ٹپک رہی ہے، یہ سب جلد مرجھا جائیں گے۔

    ان خیالات کا اظہار وہ ایم کیو ایم پاکستان کے اجلاس سے خطا ب کرتے ہوئے کر رہے تھے، فاروق ستار کا کہنا تھا کہ کراچی پر سب کی نظریں ہیں لیکن مخالفین کو کہوں گا کہ حسرت ان غنچوں پر جو بِن کھلے مرجھا گئے۔

    فاروق ستار نے ایک بار پھر سندھ میں ایک نئے صوبے کے حوالے سے بات کرتے ہوئے کہا کہ جنوبی سندھ صوبہ ایک حقیقت ہے اس کو کوئی ٹال نہیں سکتا۔

    انھوں نے کہا کہ سندھ میں نئے انتظامی یونٹس بننا یہاں کی اہم ضرورت ہے، اس لیے وسائل کی منصفانہ تقسیم ایم کیو ایم کے منشور کا اہم نقطہ ہے۔

    شہر کراچی کے بلدیاتی اختیارات سے محرومی پر انھوں نے چیف جسٹس آف پاکستان ثاقب نثار سے مطالبہ کیا کہ وہ کراچی کے بلدیاتی اداروں کو اختیارات دلوائیں۔

    فاروق ستار نے کہا کہ سندھ اور پاکستان کےعوام کے مسائل کا حل ایم کیو ایم ہے، پاکستان چلانے کی اہلیت صرف پاکستان بنانے والوں کے پاس ہے۔

    کراچی: این اے 245 سے فاروق ستارکے کاغذات نامزدگی مسترد

    انھوں نے کراچی میں متحدہ قومی موومنٹ کے اندرونی اختلافات اور ٹوٹ پھوٹ پر تبصرہ کرتے ہوئے کہا کہ ہمارے الگ ہونے پر جو لوگ خوش تھے اب ان کا جشن ختم ہوگیا ہے۔

    ڈاکٹر فاروق ستار کا کہنا تھا کہ ایم کیو ایم پاکستان کی تقسیم کے تاثر کو اب اتحاد سے زائل کرنا ہے، 25 جولائی کو ہر جگہ پتنگ ہی پتنگ ہوگی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مائنس ون کے بعد مائنس ٹو آگیا جو مائنس ایم کیو ایم ہے، فاروق ستار

    مائنس ون کے بعد مائنس ٹو آگیا جو مائنس ایم کیو ایم ہے، فاروق ستار

    کراچی: ایم کیو ایم پاکستان کے سربراہ فاروق ستار نے کہا ہے کہ کنوینر شپ کے فیصلے کے بعد ہمارے پاس سپریم کورٹ جانے کا آپشن موجود ہے، ابھی فیصلہ نہیں کیا، مائنس ون کے بعد مائنس ٹو آگیا جو مائنس ایم کیو ایم ہے۔

    ان خیالات کا اظہار انہوں نے کراچی میں نیوز کانفرنس کرتے ہوئے کیا، فاروق ستار نے کہا کہ کنوینر شپ کے فیصلے پر سپریم کورٹ جانے کا مشورہ دیا گیا ہے سوچ کر فیصلہ کریں گے۔

    فاروق ستار نے کہا کہ ایک آپشن یہ بھی آیا ہے کہ الیکشن کا بائیکاٹ کریں، ہائیکورٹ کا فیصلہ آیا ہے، کنوینر شپ کا فیصلہ دیا گیا ہے، سوال ہی پیدا نہیں ہوتا فیصلہ قبول کروں، مجھ سے پتنگ چھین کر کسی اور کو دی گئی ہے۔

    سربراہ ایم کیو ایم پاکستان نے کہا کہ عدالتیں کسی کو لیڈر نہیں بناتیں، کارکن اور عوام لیڈر بناتے ہیں، 23 اگست کو ایم کیو ایم کو بچایا تھا، مجھے یقین ہے کہ عوام کے دل میں میری عزت ہے۔

    فاروق ستار نے کہا کہ عوام کے درمیان رہ کر ان کے مسائل حل کرنے ہیں، مہاجروں کے ضبط شدہ حقوق کی جدوجہد بھی کی۔

    مزید پڑھیں: ہائی کورٹ نے خالد مقبول صدیقی کو ایم کیو ایم پاکستان کا کنوینر قرار دے دیا

    واضح رہے کہ آج اسلام آباد ہائیکورٹ نے ڈاکٹر فاروق ستار کی درخواست خارج کرتے ہوئے خالد مقبول صدیقی کو ایم کیو ایم پاکستان کا کنوینر قرار دے دیا ہے۔

    ہائی کورٹ نے کیس کی سماعت کرتے ہوئے الیکشن کمیشن کا فیصلہ بحال کردیا، الیکشن کمیشن نے ایم کیوایم کا کنوینرخالد مقبول صدیقی کو قرار دیا تھا۔

    خیال رہے کہ ڈاکٹر فاروق ستار نے 26 مارچ کے الیکشن کمیشن کے حکم نامے کو چیلنج کیا تھا جب کہ ہائی کورٹ کے جسٹس عامر فاروق نے 17 اپریل کو کیس کا فیصلہ محفوظ کر لیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ہائی کورٹ نے خالد مقبول صدیقی کو ایم کیو ایم پاکستان کا کنوینر قرار دے دیا

    ہائی کورٹ نے خالد مقبول صدیقی کو ایم کیو ایم پاکستان کا کنوینر قرار دے دیا

    اسلام آباد: ہائی کورٹ نے ڈاکٹر فاروق ستار کی درخواست خارج کرتے ہوئے خالد مقبول صدیقی کو ایم کیو ایم پاکستان کا کنوینر قرار دے دیا۔

    تفصیلات کے مطابق ڈاکٹر فاروق ستار نے الیکشن کمیشن کے فیصلے کو چیلنج کرتے ہوئے اسلام آباد ہائی کورٹ میں درخواست دائر کردی تھی کہ پارٹی کے کنوینر وہ ہیں۔

    ہائی کورٹ نے کیس کی سماعت کرتے ہوئے الیکشن کمیشن کا فیصلہ بحال کردیا، الیکشن کمیشن نے ایم کیوایم کا کنوینرخالد مقبول صدیقی کو قرار دیا تھا۔

    متحدہ قومی موومنٹ پاکستان کے کنوینر شپ کا معاملہ کئی ماہ جاری رہنے کے بعد آخر کار آج اسلام آباد ہائی کورٹ میں حل ہوگیا، پارٹی کے کنوینر اب خالد مقبول صدیقی ہوں گے۔

    خیال رہے کہ ڈاکٹر فاروق ستار نے 26 مارچ کے الیکشن کمیشن کے حکم نامے کو چیلنج کیا تھا جب کہ ہائی کورٹ کے جسٹس عامر فاروق نے 17 اپریل کو کیس کا فیصلہ محفوظ کر لیا تھا۔

    واضح رہے کہ انیس اپریل کو ایم کیو ایم کے انٹرا پارٹی انتخابات میں فاروق ستار بھاری اکثریت سے کام یاب ہوکر ایم کیو ایم پاکستان کے سربراہ منتخب ہوئے تھے، تاہم اسے ایم کیو ایم کے دوسرے گروپ نے منظور نہیں کیا تھا۔

    فاروق ستار ایم کیو ایم پاکستان کے کنوینر نہیں رہے‘ الیکشن کمیشن

    انتخابات کو کالعدم قرار دینے اور فاروق ستار کو سربراہی سے ہٹانے کے لیے ایم کیو ایم بہادرآباد کے رہنما کنور نوید جمیل اور خالد مقبول صدیقی نے الیکشن کمیشن میں درخواستیں دائر کردی تھیں۔

    خیال رہے کہ الیکشن کمیشن کی جانب سے انٹرا پارٹی انتخابات کالعدم قرار دینے اور فاروق ستار کو کنوینر شپ سے ہٹانے کے فیصلے کو فاروق ستار نے چیلنج کردیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مائنس ون فارمولہ اختیار کیا گیا تو ہم بھی خاموش نہیں رہیں گے ،فاروق ستار

    مائنس ون فارمولہ اختیار کیا گیا تو ہم بھی خاموش نہیں رہیں گے ،فاروق ستار

    کراچی : ایم کیو ایم پاکستان کے سربراہ فاروق ستار نے الیکشن لڑنے کا اعلان کر دیا اور پی پی انتخابی فضا بگاڑ رہی ہے، مائنس ون فارمولہ اختیار کیا گیا تو ہم بھی خاموش نہیں رہیں گے اور ایم کیوایم کوزمین سے لگانے کا فیصلہ کیا گیا تو پھرہم بھی جواب دیں گے۔

    تفصیلات کے مطابق ایم کیو ایم پاکستان کے سربراہ فاروق ستار نے این اے 241 سے کاغذات جمع کرادیے، میڈیا سے گفتگو کرتے ہوئے کہا کہ ہمارے ساتھ بہت سارے ساتھی کاغذات جمع کرارہے ہیں، این اے241 ، 245 اور 247 سے کاغذات جمع کرارہا ہوں۔

    فاروق ستار کا کہنا تھا کہ ایم کیوایم کوانتخابات سے متعلق پوری اسپیس نہیں دی گئی، ایم کیوایم کو اپنے دفاتر تک ابھی واپس نہیں کیے گئے، کتنےحلقوں سے لڑنا ہے اس کا ابھی فیصلہ نہیں ہوا۔

    سربراہ ایم کیو ایم پاکستان نے کہا کہ ہمارے165 کے قریب ساتھیوں کو بازیاب نہیں کرایا گیا، ہمارے ساتھیوں کی رہائی میں تاخیری حربے استعمال ہو رہے ہیں، مردم شماری میں کراچی کے ساتھ ناانصافی کی گئی ہے، مردم شماری میں کراچی کی ایک کروڑ آبادی کو کم کیا گیا ہے، مردم شماری پرہی حلقہ بندیاں کی گئیں جن پرتحفظات ہیں۔

    فاروق ستار نے سندھ کی نگراں حکومت کو پیپلزپارٹی کی حکومت قرار دیتے ہوئے کہا نگراں سندھ حکومت میں کچھ لوگ نیوٹرل ہیں، گاڑیاں سرکاری محکموں کی ہیں اور جھنڈے پیپلزپارٹی کے لگے ہیں۔

    فاروق ستار نے کہا کہ پیپلزپارٹی انتخابی فضا کو بگاڑ رہی ہے، ترقیاتی فنڈز پیپلزپارٹی کے امیدوار استعمال کر رہےہیں، پیپلزپارٹی ابھی بھی سیاسی فائدے لے رہی ہے۔

    رہنما ایم کیو ایم پاکستان کا کہنا تھا کہ اسکروٹنی کے بعد والے دستاویزات ابھی سے مانگے جارہےہیں، نامزدگی کا طریقہ انتہائی آسان ہونا چاہیے، صوبائی اسمبلی کی فیس 20ہزار اور قومی اسمبلی کی 30ہزار ہے، اتنے پیسے عام پاکستانی کہاں سے لائے گا۔

    انھوں نے مزید کہا کہ اس قسم کے فیصلے الیکشن کیلئے ناانصافی ہے، ایسی ناانصافی کیساتھ الیکشن ہوگا تو پھردھرنا بھی ہوگا، ریکارڈ کرلیں ہمیں دیوار سے لگانے کی کوشش کی جارہی ہے، مائنس ون فارمولہ اختیار کیا گیا تو ہم بھی خاموش نہیں رہیں گے۔

    ایم کیو ایم پاکستان کے سربراہ کا کہنا تھا کہ بڑی پارٹیاں اربوں کے اشتہار دینگی کوئی پوچھنے والانہیں ہوگا، پیسوں کے ذریعے الیکشن کو خریدا جائے گا، میں نے کہیں بھی بائیکاٹ کا لفظ استعمال نہیں کیا۔

    فاروق ستار نے کہا کہ ہمیں دیوارسے لگانے کا سلسلہ بند ہوناچاہیے، ایم کیو ایم کو زمین سے لگانے کا فیصلہ کیا گیا تو پھر ہم بھی جواب دینگے، ایم کیوایم پاکستان کاووٹ بینک کوکوئی دھڑانہیں ہے۔

    ان کا کہنا تھا کہ الیکشن کمیشن کو بھی عدالت کے فیصلوں کو ماننا چاہیے اور میرا نام کنوینئر کے طور پر ویب سائٹ پر ڈالنا چاہیے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • فاروق ستارکی زیرقیادت ایم کیوایم پی آئی بی گروپ انتخابی دنگل میں کود گیا

    فاروق ستارکی زیرقیادت ایم کیوایم پی آئی بی گروپ انتخابی دنگل میں کود گیا

    کراچی : متحدہ قومی موومنٹ پی آئی بی کے رہنما ڈاکٹر فاروق ستار نے پی آئی بی کے رہنماؤں کو انتخابی فارم جمع کرانے کی ہدا یت جاری کردی،وہ خود گلشن اقبال اور پی آئی بی کے حلقوں سے الیکشن لڑیں گے۔

    تفصیلات کے مطابق متحدو قومی موومنٹ پاکستان کے دونوں دھڑوں کے درمیان سرد جنگ تاحال جاری ہے اور الیکشن کی آمد پر بھی دونوں جانب سے کسی قسم کی لچک کا مظاہرہ نہیں کیا جارہا۔

    اس حوالے سے ذرائع کا کہنا ہے کہ پی آئی بی گروپ کے سربراہ ڈاکٹر فاروق ستار نے دو قومی اورایک صوبائی اسمبلی کے حلقوں کے فارم حاصل کرلیے، لہٰذا فارو ق ستار گلشن اقبال سے قومی اسمبلی اور پی آ ئی بی کالونی سے صوبائی اسمبلی کا الیکشن لڑنے کا امکان ہے۔

    ذرائع کا مزید کہنا ہے کہ فاروق ستار نے پی آئی بی گروپ کے رہنماؤں کو ہدایات جاری کرتے ہوئے کہا ہے کہ تمام رہنما جلدازجلد کاغذات نا مزدگی جمع کرائیں۔

    ،مزید پڑھیں: شہری علاقوں کے مینڈیٹ کو تقسیم کرنے کی کوشش ہورہی ہے، فاروق ستار

    اطلاعات کے مطابق اب تک شیخ صلاح الدین، نشاط ضیاء، سلمان مجاہد بلوچ نے فارم جمع کر ادئیے ہیں۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

  • خالدمقبول صدیقی جھوٹ بولیں لیکن حد رکھیں، فاروق ستار

    خالدمقبول صدیقی جھوٹ بولیں لیکن حد رکھیں، فاروق ستار

    کراچی: ایم کیو ایم پاکستان کے سربراہ فاروق ستار نے کہا کہ خالدمقبول صدیقی نے مجھے افطار کی دعوت نہیں دی تھی،جھوٹ بولیں لیکن حد رکھیں، مسئلہ بہادرآباد والوں کی طرف سے ہے،میری پوری کوشش ہے ہم پھر ایک ہوجائیں۔

    تفصیلات کے مطابق ایم کیو ایم پاکستان کے سربراہ فاروق ستار نے انسداد دہشت گردی کی عدالت کے باہر میڈیا سے گفتگو کرتے ہوئے کہا کہ مجھے افطار کی دعوت نہیں دی گئی تھی، خالد مقبول صدیقی جھوٹ بولیں لیکن کوئی حد رکھیں،سیاسی اکابرین اور عمائدین شہر سے جھوٹ بولا گیا۔

    فاروق ستار کا کہنا تھا کہ قبل ازانتخابات دھاندلی کی نشاندہی کی ہے ،مسئلہ بہادر آباد والوں کی طرف سے ہے، میری طرف سے یکجا ہونے میں کوئی کسر نہیں ہے، پارٹی کی تقسیم کا تاثر نہیں دینا چاہتا، میری پوری کوشش ہےہم پھرایک ہوجائیں۔

    سربراہ ایم کیو ایم پاکستان نے کہا کہ مجھے 5 مئی کے جلسے سے پہلے کچھ اور آفرکی گئی تھی اور جلسے کے بعد کچھ اور آفرز کی جارہی تھیں، 26 مئی کو  جنوبی سندھ صوبے کے لیے مظاہرے کا کہا تھا۔

    ان کا کہنا تھا کہ انتخابات 2018کےشیڈول کا اعلان ہوگیا ہے، کارکنان سے کہا ہے چاہیں توکاغذات نامزدگی جمع کرائیں، میرے اپنے حلقےمیں ایک سیٹ کم کردی گئی ہے۔

    فاروق ستار نے مطالبہ کیا کہ کاغذات نامزدگی جمع کرانےکی تاریخ بڑھائی جائے۔

    یاد رہے گزشتہ روز ایم کیو ایم بہادر آباد کی جانب سے افطار ڈنر کا اہتمام کیا گیا تھا، جس میں تمام سیاسی جماعتوں کے قائدین ، سماجی ، مذہبی، ادبی، صحافتی شخصیات سمیت بیورو کریٹس، ، بلدیاتی نمائندگان اور سابق اراکین اسمبلی نے بھرپور شرکت کی۔

    اس موقع پر ایم کیو ایم کے کنونیر ڈاکٹر خالد مقبول صدیقی نے بھی واضح کیا تھا کہ الیکشن کا کسی صورت بائیکاٹ نہیں کیا جائے گا، کسی سےانتخابی اتحاد نہیں لیکن سیٹ ایڈجسمنٹ پر بات ہوسکتی ہے، تحریک انصاف کا کراچی میں ووٹ بینک نہیں ہے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک’پہنچانے کے لیے سوشل میڈیا پر شیئر کریں۔

  • یہ موسم درخت لگانے کا نہیں ہے، فاروق ستار

    یہ موسم درخت لگانے کا نہیں ہے، فاروق ستار

    کراچی: متحدہ قومی موومنٹ پاکستان کے سربراہ ڈاکٹر فاروق ستار نے کہا ہے کہ یہ موسم درخت لگانے کا نہیں ہے، شجر کاری کے موسم میں درخت لگانے چاہئیں۔

    ان خیالات کا اظہار انھوں نے پریس کانفرنس کرتے ہوئے کیا، فاروق ستار نے کہا کہ جو کرتا دھرتا ہیں اُن پرلازم ہے کہ مستقبل کی منصوبہ بندی کریں، پاکستان موسمیاتی تبدیلیوں سے متاثر ہو رہا ہے۔

    انھوں نے کہا کہ کراچی میں جو ہیٹ ویو کی شدت ہے اس میں لگے ہوئے کیمپس نا کافی ہیں، کہا کہ پانی کی کمی کی وجہ سے کراچی میں فسادات کا خطرہ ہے، ہم نے اپنے منشور میں پانی کی کمی دور کرنے کا نکتہ شامل کیا ہے۔

    فاروق ستار نے کہا کہ حقوق نہیں ملتے تو لوگ نئے صوبوں کی طرف مائل ہوجاتے ہیں، جنوبی سندھ والے کوئی نیا سورج نہیں بلکہ نیا صوبہ مانگ رہے تھے، انھوں نے کھل کر کہا کہ اگر ووٹ لینے ہیں تو جنوبی سندھ صوبے کا مطالبہ کرنا پڑے گا۔

    ہم نے جنوبی سندھ صوبہ تحریک کو روکے رکھا ہے لیکن کب تک، فاروق ستار

    ایم کیو ایم پاکستان کے رہنما کا کہنا تھا کہ میرا مینڈیٹ کسی اور کو دینے کی کوشش ہو رہی ہے، مجھے مجبوراً پھر متحرک ہونا پڑا، جنوبی سندھ کے لوگوں کے لیے الگ انتظامی یونٹ کی بات کریں گے۔

    فاروق ستار کا کہنا تھا کہ بڑے سیاسی لوگ کھلے دل سے معافی مانگ لیا کرتے ہیں، معافی لفظ استعمال کرنے سے نہ جھجکیں، مراد علی شاہ اور خورشید شاہ نے لوگوں کے دل دکھائے ہیں۔

    فاروق ستار کہنا تھا کہ پاکستان سرزمین پارٹی کو چار یا پانچ، بہادرآباد گروپ کوچار یا پانچ اور پیپلز پارٹی کو پانچ یا چھ سیٹیں ملیں گی، کیا اس صورت حال میں ہماری بقا و سلامتی کی ضمانت دی جاسکتی ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • وزیراعلیٰ سندھ کے بیان کیخلاف ایم کیوایم کا آج احتجاج کا اعلان

    وزیراعلیٰ سندھ کے بیان کیخلاف ایم کیوایم کا آج احتجاج کا اعلان

    کراچی: وزیراعلیٰ سندھ کے بیان کے خلاف ایم کیوایم نے آج احتجاج کا اعلان کردیا ،فاروق ستار کا کہنا ہے کہ بانیان پاکستان کی اولادوں پرلعنت بھیجنےوالوں کی سوچ پرلعنت ہے، احتجاج میں اہم اعلانات اور حکمت عملی دوں گا۔

    تفصیلات کے مطابق ایم کیو ایم پاکستان کے سربراہ فاروق ستار کی جانب سے وزیراعلیٰٰ سندھ کو بیان پر معافی مانگنے کا دیا گیا الٹی میٹم ختم ہوگیا۔

    فاروق ستار  نے وزیراعلیٰ سندھ کے بیان کے خلاف آج لیاقت آباد میں احتجاج کرنے کا اعلان کرتے ہوئے کہا کہ عوام وزیراعلی کے متعصبانہ بیان کے خلاف یکجہتی کا مظاہرہ کریں، وزیراعلیٰ کے متعصب بیان کا جواب اظہار یکجہتی سے دیں گے۔

    سربراہ ایم کیو ایم کا کہنا تھا عوام سے ہونے والی ناانصافیوں کا خاتمہ ہونا چاہیے، بانیان پاکستان کی اولادوں پرلعنت بھیجنےوالوں کی سوچ پرلعنت ہے، تعصب اور نفرت کی سوچ کا جواب مہاجر اظہار  یکجہتی ہے۔

    انھوں نے کہا کہ اردو بولنے والوں کے اجداد نے ملک بنایا، صوبے کا چیلنج نہ کیا جائے، نئے صوبے کی سوچ لوگوں میں روز بڑھتی جارہی ہے، احتجاج میں اہم اعلانات اور حکمت عملی دوں گا۔

    یاد رہے وزیراعلیٰ سندھ مرادعلی شاہ نے اپنے بیان میں کہا تھا صوبے کا مطالبہ کرنے والوں پر لعنت بھیجتا ہوں۔

    مزید پڑھیں : وزیراعلیٰ سندھ اپنے بیان پر معافی مانگیں، فاروق ستار کا 48 گھنٹے کاالٹی میٹم

    جس پر ایم کیو ایم پاکستان کے سربراہ فاروق ستار نے وزیراعلیٰ سے بیان پر معافی مانگنے کا مطالبہ کرتے ہوئے کہا تھا کہ مراد علی شاہ نے48 گھنٹوں میں معافی نہیں مانگی تو لیاقت آباد میں احتجاج کریں گے جبکہ فاروق ستار نے ایم کیوایم پاکستان کے رہنماؤں سمیت مہاجر قومی موؤمنٹ، پی ایس پی اور مہاجراتحاد کو بھی احتجاج میں شامل ہونے کی دعوت بھی دی۔

    فاروق ستار کا کہنا تھا کہ کہ بلاول بھٹو اور آصف زرداری اپنے وزرا کو لگام دیں، بات نکلے گی تو بہت دور تلک جائےگی، شہری عوام بتائیں گے جب چاہا پاکستان بنے تو پاکستان بنادیا، جب چاہیں گےجنوبی سندھ صوبہ بنےتوہم وہ بھی بنادیں گے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔