کراچی: پاکستان پیپلزپارٹی کے جلسے نے ایم کیو ایم کے دونوں دھڑوں کو ایک کر دیا، بہادر آباد میں فاروق ستار اور خالد مقبول کی اراکین رابطہ کمیٹی کے ساتھ اہم بیٹھک ہوئی۔
تفصیلات کے مطابق پیپلزپارٹی کی سیاسی حکومت عملی کا مقابلہ کرنے کے لیے فاروق ستار اور خالد مقبول نے ہاتھ ملا لیے۔ میٹنگ میں عامر خان، کنور نوید ، فیصل سبزواری ، امین الحق اور دیگر اراکین بھی موجود تھے۔ اس دوران 5 مئی کے جلسے کے انتظامات سمیت پارٹی امور پرتبادلہ خیال کیا گیا۔
اس موقع پر فاروق ستار نے کہا کہ 5 مئی کا جلسہ پیپلزپارٹی کی نیندیں اڑا دے گا، اب مزید خوش خبریاں آئیں گی، بتا دیا ہے کہ مہاجر قوم اور اس کے مینڈیٹ کو تقسیم نہیں ہونےدیں گے۔
اس ضمن میں خالد مقبول صدیقی کا کہنا تھا کہ 5 مئی کو پیپلز پارٹی، مہاجر دشمن قوتوں کو بھرپور جواب دیں گے، قوم، عوامی خدمت اور مسائل کے حل کےلیے سب ایک ہیں۔
کیا فاروق ستار اور عامر خان کے اختلافات ختم ہوگئے؟
پارٹی ذرایع نے دعوی کیا ہے کہ ایم کیو ایم پی آئی بی اور بہادرآباد میں اختلافات ختم ہوگئے ہیں، فاروق ستار اور عامرخان کے درمیان تمام گلے شکوے بھی دور ہوچکے ہیں۔
فاروق ستاراور خالد مقبول کے درمیان 5 مئی کے جلسے سے قبل ریلی کی تجویز بھی زیر غور ہے۔ پارٹی رہنما آج شام ٹنکی گروانڈ کا دورہ کریں گے۔
دورے میں جلسے کے انتظامات کا جائزہ لیا جائے گا اور لیاقت آباد کےعوام سے ملاقات کی جائے گی، ساتھ علاقے میں جلسے کے پمفلٹ تقسیم کیے جائیں گے۔
یاد رہے کہ ایم کیو ایم پی آئی بی گروپ نے 4 مئی کو ٹنکی گراؤنڈ میں جلسے کا اعلان کیا تھا، مگر گذشتہ شام فاروق ستار اپنا جلسہ ملتوی کرکے بہادر آباد پہنچ گئے، جہاں مشترکہ پریس کانفرنس میں ایک جلسہ کرنے کا اعلان کیا گیا۔
ایم کیو ایم کو پیپلزپارٹی سے نہیں ہم سے خطرہ ہے، مصطفیٰ کمال
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
