ARYNews.tv | Urdu – Har Lamha Bakhabar

Tag: فاروق ستار

  • فاروق ستار کی ایم کیو ایم میں واپسی کا معاملہ فائنل راؤنڈ میں داخل

    فاروق ستار کی ایم کیو ایم میں واپسی کا معاملہ فائنل راؤنڈ میں داخل

    کراچی: فاروق ستار کی ایم کیو ایم میں واپسی کا معاملہ فائنل راؤنڈ میں داخل ہو گیا۔

    تفصیلات کے مطابق ڈاکٹر فاروق ستار کی ایم کیو ایم پاکستان میں واپسی کا معاملہ فائنل راؤنڈ میں داخل ہو گیا ہے، ذرائع کا کہنا ہے کہ خالد مقبول اور فاروق ستار کی آج ایک اور اہم ملاقات متوقع ہے۔

    ذرائع ایم کیو ایم نے بتایا کہ ملاقات میں آزاد بلدیاتی امیدواروں کی ایڈجسٹمنٹ پر تفصیلی گفتگو ہوگی۔

    واضح رہے کہ ایم کیو ایم پاکستان میں واپسی پر فاروق ستار نے این اے 245 کے ضمنی انتخاب لڑنے سے معذرت کی تھی، جس کے بعد ایم کیو ایم نے ضمنی انتخاب کے لیے ٹکٹ معید انور کو دے دیا۔

    ذرائع کے مطابق ایم کیو ایم پاکستان اور تنظیم بحالی کمیٹی کے رہنماؤں کی گزشتہ روز ملاقات میں تنظیمی معاملات طے پا گئے ہیں، کراچی اور حیدر آباد کے ذمے داران کو ایڈجسٹ کرنے کا فارمولہ بھی طے پا گیا ہے۔

    فاروق ستار سے معاملات طے نہ ہو سکے، ایم کیوایم نے امیدوار کا اعلان کردیا

    آئندہ 48 گھنٹوں کے درمیان ڈاکٹر فاروق ستار کی اپنی مکمل کابینہ کے ہمراہ ایم کیو ایم کے مرکز بہادر آباد جانے کا امکان ہے۔

    اس سے قبل فاروق ستار کا پتنگ کے نشان پر الیکشن لڑنے کا معاملہ سامنے آیا تھا، اور گزشتہ روز بتایا گیا تھا کہ اس سلسلے میں خالد مقبول صدیقی اور فاروق ستار کے درمیان ہونے والی ملاقاتیں بے سود ثابت ہوئی ہیں، جس پر ایم کیو ایم نے این اے 245 کے ضمنی انتخاب کے لیے سابق ڈسٹرکٹ چیئرمین ایسٹ معید انور ٹکٹ جاری کیا۔

  • فاروق ستار کا ایم کیو ایم کے لیے روڈ میپ

    فاروق ستار کا ایم کیو ایم کے لیے روڈ میپ

    کراچی: فاروق ستار نے کنوینر ایم کیو ایم خالد مقبول صدیقی کے سامنے ایک روڈ میپ رکھ دیا ہے۔

    اے آر وائی نیوز کے مطابق کراچی میں مہاجر ووٹ کو تقسیم ہونے سے بچانے کے لیے شہر کی سیاست میں بڑا بریک تھرو سامنے آیا ہے۔

    کنوینر ایم کیو ایم ڈاکٹر خالد مقبول صدیقی رات گئے اچانک ڈاکٹر فاروق ستار کی رہائش گاہ پہنچ گئے، ذرائع کا کہنا ہے کہ فاروق ستار کی رہائش گاہ پر خالد مقبول صدیقی اور ڈاکٹر فاروق ستار کی ملاقات میں احمد چنائے، کامران احمد، وسیم حسین اور جمال احمد بھی شامل تھے۔

    اس ملاقات میں سیاسی صورت حال، این اے 245 کے ضمنی انتخابات سمیت بلدیاتی انتخابات اور پارٹی کے دیگر معاملات پر تفصیلی گفتگو ہوئی۔

    ‘ایم کیو ایم کے سندھ کے ساتھ ساتھ وفاق سے بھی علیحدگی کے امکانات’

    ذرائع کا کہنا ہے کہ ملاقات میں این اے 240 میں ہونے والی خامیوں، مستقبل کے لائحہ عمل پر بھی بات چیت ہوئی، جب کہ ڈاکٹر فاروق ستار نے خالد مقبول صدیقی کے سامنے ایک روڈ میپ رکھا۔

    ایم کیو ایم کے رہنما فاروق ستار نے کہا کہ اس وقت ہمیں اتحاد کی ضرورت ہے، اگر ہم سب ملے نہیں تو ہمارا مزید نقصان ہوگا۔

  • فاروق ستار کی والدہ انتقال کر گئیں

    فاروق ستار کی والدہ انتقال کر گئیں

    کراچی: متحدہ قومی موومنٹ کے رہنما فاروق ستار کی والدہ انتقال کر گئی ہیں۔

    تفصیلات کے مطابق سربراہ تنظیم بحالی کمیٹی ڈاکٹر فاروق ستار کی والدہ کا انتقال ہوگیا، ان کی عمر 94 برس تھی۔

    فاروق ستار کی والدہ کچھ عرصے سے شدید علیل اور مقامی اسپتال میں زیر علاج تھیں، ان کی نماز جنازہ اور تدفین کا اعلان بعد میں کیا جائے گا۔

    ڈاکٹر فاروق ستار کی والدہ کے انتقال پر سیاسی و مذہبی رہنماؤں نے اظہار تعزیت کیا ہے، کنوینئر ایم کیو ایم ڈاکٹر خالد مقبول صدیقی، عامر خان اور وسیم اختر نے فاروق ستار سے والدہ کے انتقال پر تعزیت کی۔

    سابق صدر آصف زرداری کی والدہ انتقال کرگئیں

    سابق گورنر ڈاکٹر عشرت العباد خان، چیئرمین مہاجر قومی موومنٹ آفاق احمد، انیس ایڈووکیٹ اور حیدر عباس رضوی نے بھی فاروق ستار کی والدہ کے انتقال پر اظہار افسوس کیا۔

  • دبئی میں عشرت العباد اور فاروق ستار کی ملاقات، یکجا ہوکر حکمت عملی بنانے پر اتفاق

    دبئی میں عشرت العباد اور فاروق ستار کی ملاقات، یکجا ہوکر حکمت عملی بنانے پر اتفاق

    دبئی : سابق گورنر سندھ عشرت العباداور فاروق ستار نے ملاقات میں شہری علاقوں کے مسائل کے حل کیلئے یکجا ہوکر حکمت عملی بنانے پر اتفاق کیا۔

    تفصیلات کے مطابق دبئی میں سابق گورنر سندھ عشرت العباداور فاروق ستار کی ملاقات ہوئی، جس میں دونوں رہنماؤں کےدرمیان ملاقات میں ملکی سیاسی صورتحال پرتبادلہ خیال کیا گیا۔

    ملاقات میں شہری علاقوں کے مسائل کے حل کیلئے یکجا ہوکر حکمت عملی بنانے پر اتفاق کیا گیا، دبئی میں دونوں رہنماؤں کی ملاقات کئی گھنٹے تک جاری رہی۔

    سابق گورنر سندھ عشرت العباد نے کہا کہ کراچی وہ قومی کرداراداکرنےسےقاصرہےملک کوجسکی ضرورت ہے، ماضی کی تلخ یادوں کو بھول کرقومی اجتماعی مفادمیں آگےبڑھاجائے۔

    فاروق ستار کا کہنا تھا کہ قوم کو مایوسی سے نکالا جائے گا اور مستقبل کے سفر کی سمت کا تعین کیا جائے، چیلنجزسے نمٹنے کیلئے قومی میثاق برائے استحکام اور تعمیر و ترقی طے کیا جائے۔

    ملاقات میں دونوں رہنماؤں میں اتفاق ہوا کہ مشترکہ جدوجہد سے قومی مسائل حل کیے جاسکتے ہیں اور کہا تجربے،سیاسی بصیرت کےساتھ دیگرسیاسی اقابرین سےبھی رابطہ کیاجائے۔

    دونوں رہنماؤں نے گفتگو میں کہا کراچی کے عوام میں احساس محرومی تیزی سے بڑھ رہاہے، احساس محرومی کے خاتمے کیلئے مشترکہ لائحہ عمل ناگزیر ہے۔

  • کراچی میں سیاسی اور مذہبی رہنماؤں کی تھلیسیمیا بچوں کے لیے خون کی اپیل

    کراچی میں سیاسی اور مذہبی رہنماؤں کی تھلیسیمیا بچوں کے لیے خون کی اپیل

    کراچی: شہر قائد میں کرونا وائرس کی وجہ سے لاک ڈاؤن کے بعد تھلیسیمیا کے مریض بچوں کے لیے خون کی فراہمی کا عمل شدید متاثر ہو گیا ہے، جس کے پیش نظر سیاسی اور مذہبی رہنماؤں نے عوام سے خون عطیہ کرنے کی اپیلیں کر دی ہیں۔

    اے آر وائی نیوز کے مطابق سیاسی رہنما ڈاکٹر فاروق ستار نے تھلیسیمیا کے مریضوں اور بچوں کو خون کا عطیہ دینے کے لیے نوجوانوں اور کارکنان سے اپیل کرتے ہوئے کہا ہے کہ کرونا وائراس اور لاک ڈاؤن کے نتیجے میں جو صورت حال سامنے آئی ہے اس نے ایک سنگین مسئلے کو جنم دیا ہے۔

    فاروق ستار کا کہنا تھا کہ تھلیسیمیا کے مریضوں اور بچوں کو خون کی عدم دستیابی بہت بڑا مسئلہ ہے، ان مریضوں کو ہر 15 دن میں خون چڑھایا جاتا ہے، اگر انھیں یہ خون وقت پر نہ ملے تو پھر ان بچوں کی زندگیوں خطرہ لاحق ہو جاتا ہے، میں خاص طور پر ملک کے نوجوانوں، طالب علموں اور تحریک کے کارکنوں اور ساتھیوں سے اپیل کرتا ہوں کہ وہ اپنے گھروں کے قریب تھلیسیمیا سینٹرز پر خون کا عطیہ دیں۔

    پی ٹی آئی کے رکن اسمبلی راجہ اظہر خون کا عطیہ دے رہے ہیں

    ادھر رکن سندھ اسمبلی راجہ اظہر بھی تھیلیسیمیا مرض میں مبتلا بچوں کے لیے خون عطیہ کرنے تھیلیسیمیا سینٹر پہنچے اور خون عطیہ کیا، انھوں نے مرض میں مبتلا بچوں سے ملاقات بھی کی، ان کا کہنا تھا کہ تھیلیسیمیا میں مبتلا بچوں کی زندگیاں بچانا ہم سب کا فرض ہے، عوام سے اپیل ہے غیر ضروری گھروں سے نہ نکلیں مگر تھلیسیمیا کے بچوں کی زندگیاں بچانے میں اپنا کردار ادا کریں۔ انھوں نے کہا لاک ڈاؤن کی صورت حال میں خون عطیہ کرنے والا عمل سب سے زیادہ متاثر ہوا ہے، شہریوں اور خصوصاً پی ٹی آئی کے ورکرز اور پارلیمنٹیرینز سے گزارش کروں گا وہ عطیات دیں۔

    دعوت اسلامی کے امیر مولانا الیاس قادری نے بھی عوام سے اپیل کی ہے کہ لاک ڈاؤن سے تھیلیسیمیا کے مریض پریشان ہیں، ملک میں 49 ہزار تھیلیسیمیا کے مرض میں مبتلا بچوں کی زندگی خطرے میں ہے، لاک ڈاؤن کے دوران خون دینے جاتے ہوئے حکومتی احکامات کو مدنظر رکھیں لیکن خون دینے ضرور جائیں۔ انھوں نے دعوت اسلامی کے کارکنان سے اپیل کی کہ ملک بھر سے ان بچوں کے لیے خون کے عطیات دیں۔

  • 35 سال میں پہلی بار سیاسی جماعتوں میں ڈائیلاگ منقطع ہوئے: شاہد خاقان

    35 سال میں پہلی بار سیاسی جماعتوں میں ڈائیلاگ منقطع ہوئے: شاہد خاقان

    کراچی: پاکستان مسلم لیگ ن کے رہنما شاہد خاقان عباسی نے کہا ہے کہ 35 سال میں پہلی بار ایسا ہوا ہے کہ سیاسی جماعتوں میں کوئی ڈائیلاگ نہیں ہو رہے، کوئی رابطہ نہیں ہو رہا، سیاسی جماعتوں کے درمیان ڈائیلاگ کی کمی کی ذمہ دار وفاقی حکومت ہے۔

    اے آر وائی نیوز کے مطابق سابق وزیر اعظم شاہد خاقان عباسی نے ایم کیو ایم رہنما فاروق ستار سے ملاقات کی، بعد ازاں پریس کانفرنس سے خطاب کرتے ہوئے انھوں نے کہا کہ ہم شہباز شریف کی ہدایت پر پرانے ساتھی فاروق ستار کے پاس آئے ہیں، سیاسی جماعتیں اپنے سیاسی ڈائیلاگز برقرار رکھتی ہیں، سیاسی ڈائیلاگز کے لیے ہمیشہ حکومت ہاتھ آگے بڑھاتی ہے لیکن پہلی بار ہوا ہے کہ کوئی ڈائیلاگز نہیں ہو رہے ہیں۔

    انھوں نے کہا کہ کراچی عام شہر نہیں یہ پاکستان کا دل ہے، کراچی ترقی نہیں کرے گا تو پاکستان بھی ترقی نہیں کرے گا، کراچی کے مسائل حل نہیں ہوں گے تو پاکستان کے مسائل بھی حل نہیں ہوں گے، پاکستان میں گورنرز کا ماڈل ناکام ہو چکا ہے، پاکستان کو ایک فری اینڈ فیئر الیکشن کی ضرورت ہے۔

    شہباز شریف کی ہدایت پر 4 رکنی پارٹی وفد کراچی پہنچ گیا

    فاروق ستار کا کہنا تھا کہ ن لیگ اور ہم نے پارلیمان میں ایک ساتھ کام کیا، ہمارے درمیان رابطے آسان ہیں تو گلے شکوے بھی چلتے رہتے ہیں، ہم نے ایک دوسرے سے گلے شکوے کیے ہیں، اب ملک کی صورت حال کے پیش نظر سیاسی مفاہمت نہیں بلکہ قومی ایجنڈا وضع کرنے کی ضرورت ہے، عام آدمی دیوار سے نہیں لگا بلکہ دیوار میں چنوا دیا گیا ہے، قومی ایجنڈے میں ہمارا فوکس معیشت پر ہونا چاہیے۔

    انھوں نے کا کہ کراچی میں 12 سال میں ایک قطرہ پانی میں اضافہ نہیں ہوا، گزشتہ 2 سال میں موجودہ حکومت بری طرح ناکام ہوئی، معاشی بحران سنگین ہے، دکانیں اور گھر توڑے گئے لیکن ان کو متبادل نہیں دیا گیا۔

    بعد ازاں، مسلم لیگ نون کے وفد نے شاہد خاقان عباسی کی قیادت میں ادارہ نور حق جا کر سابق میئر کراچی نعمت اللہ خان کے انتقال پر تعزیت کی، شاہد خاقان نے کہا کہ نعمت اللہ خان مرحوم کراچی کے محسن تھے، انھوں نے ریکارڈ ترقیاتی کام کرائے۔

  • ‘کراچی والو! میرے پاس تم ہو ‘

    ‘کراچی والو! میرے پاس تم ہو ‘

    کراچی : ایم کیو ایم پاکستان کے رہنما فاروق ستار نے کہا کہ کراچی کو سالانہ 300ارب ملنا چاہیے ، کوئی ہو نہ ہو تم میرے پاس ہو،کراچی والو!میرے پاس تم ہو۔

    تفصیلات کے مطابق ایم کیو ایم پاکستان کے رہنما فاروق ستار نے انسداد دہشت گردی کی عدالت میں پیشی کے موقع پر میڈیا سے گفتگو کرتے ہوئے کہا ٹریفک پولیس کی جانب سے جو رانگ وے پر ایف آئی آر کاٹی گئیں ختم کی جائیں۔

    فاروق ستار کا کہنا تھا کہ دنیا کا بہترین کپاس پیداکرنے والا ملک اب کپاس بحران کاشکارہے، اس قدر نالائقی ہے کہ پہلے آٹا ایکسپورٹ کردیا ، اب کہہ رہے ہیں کہ امپورٹ کریں گے۔

    ایم کیو ایم پاکستان کے رہنما کا کہنا تھا کہ ٹیکسٹائل ملوں سے بے روزگاری ہوئی توعدم استحکام بڑھے گی، کراچی کو سالانہ 300ارب ملنا چاہیے۔

    فاروق ستار نے ایک بار پھر ڈرامہ سیریل میرے پاس تم ہو کا ذکر کرتے ہوئے کہا کوئی ہو نہ ہو تم میرے پاس ہو،کراچی والو! میرے پاس تم ہو۔

    یاد رہے چند روز قبل بھی ایم کیو ایم پاکستان رہنما ڈاکٹر فاروق ستار نے ایک نجی اسکول کے منعقد کئے گئے پروگرام میں اپنے خطاب کے دوران کہا تھا کہ نہ مجھے ایم این اے بننے دیا اور مجھ سے پارٹی رکنیت بھی لے لی گئی۔

    جس پر دکھ کا اظہار کرتے ہوئے وہ ڈرامہ سیریل میرے پاس تم ہو کو یاد کرنے لگے، جس کے بعد ان کا ویڈیو کلپ سوشل میڈیا پر وائرل ہوا تھا۔

  • خالد مقبول صدیقی نے استعفیٰ کیوں دیا ؟ فاروق ستار نے بڑی وجہ بتا دی

    خالد مقبول صدیقی نے استعفیٰ کیوں دیا ؟ فاروق ستار نے بڑی وجہ بتا دی

    کراچی : ایم کیو ایم پاکستان کے رہنما فاروق ستار نے کہا ہے کہ نیب گرفتاریوں سےبچنےکیلئےوزارت سےاستعفےکاٹوپی ڈرامہ کیاگیا ، فروغ نسیم ایم کیوایم ہےیانہیں فیصلہ کریں اورجرات کامظاہرہ کرتے ہوئے سینیٹر شپ سے استعفیٰ دیں۔

    تفصیلات کے مطابق ایم کیو ایم پاکستان کے رہنما فاروق ستار نے میڈیا سے گفتگو کرتے ہوئے کہا پارٹی میں نئے لوگوں کو آنے دیں، متحدہ کو صحیح معنوں میں متحدہ بنائیں، نہ یہ متحدہ ہے اورنہ ایم کیوایم پاکستان ہے ، یہ چوں چوں کی مٹی ہے۔

    فاروق ستار کا کہنا تھا کہ مزید گروپوں میں ایم کیو ایم کی تقسیم جاری ہے، جو کرپشن اورکک بیکس کھایا ہے اسکو قائم رکھنا ہے ، نیب کے تحت گرفتاریوں کاعمل شروع ہونے والا تھا، نیب گرفتاریوں سےبچنے کیلئے وزارت سے استعفے کا ٹوپی ڈرامہ کیا گیا۔

    مزید پڑھیں : وفاقی وزیر خالد مقبول صدیقی نے استعفیٰ وزیراعظم کو بھجوادیا

    فروغ نسیم کے حوالے سے رہنما ایم کیو ایم پاکستان نے کہا کہ فروغ نسیم ایم کیوایم ہےیانہیں فیصلہ کریں، فروغ نسیم اخلاقی جرات کا مظاہرہ کریں اورسینیٹر شپ سے استعفیٰ دیں۔

    یاد رہے 12 جنوری کو ڈاکٹر خالد مقبول صدیقی کی جانب سے استعفی کا اعلان کیا گیا تھا، جس کے دوسرے ہی روز 13 جنوری کو وفاقی وزیر اسد عمر ایم کیو ایم پاکستان کو منانے بہادرآباد گئے تھے تاہم ڈاکٹر خالد مقبول صدیقی نے اپنا فیصلہ واپس لینے سے صاف انکار کردیا تھا اور پھر 16 جنوری کو اپنا استعفی بھی وزیر اعظم عمران خان کو ارسال کردیا تھا۔

  • ایم کیوایم لندن کے گرفتار ٹارگٹ کلر کے بیان پر فاروق ستار کا ردعمل

    ایم کیوایم لندن کے گرفتار ٹارگٹ کلر کے بیان پر فاروق ستار کا ردعمل

    کراچی : متحدہ قومی موومنٹ تنظیم بحالی کے سربراہ ڈاکٹر فاروق ستار نے ایم کیوایم لندن کے گرفتار ٹارگٹ کلر کے بیان پر ردعمل دیتے ہوئے کہا کہ میں پارٹی کے تنظیمی سیٹ اپ کا کبھی انچارج نہیں رہا۔

    تفصیلات کے مطابق ڈاکٹر فاروق ستار نے میڈیا سے گفتگو کرتے ہوئے کہا کہ میں کبھی نائن زیرو کا کیئرٹیکر نہیں رہا، یہ ذمہ داری عامرخان، کنور نوید ،انیس قائمخانی کے پاس رہی۔

    متحدہ قومی موومنٹ تنظیم بحالی کے سربراہ نے کہا کہ نائن زیرو میں کب کون رہتا تھا میرا اس سے تعلق نہیں، میں پارٹی کے تنظیمی سیٹ اپ کا کبھی انچارج نہیں رہا، ہمیشہ سیاسی سیٹ اپ کی ذمہ داری نبھائی ہے۔

    انہوں نے کہا کہ ملزم سے یہ کون کہلوا رہا ہے سامنے آجائے گا، میرے خلاف سازش ہو رہی ہے جو سامنے آجائے گی، میں سختی سے اس بات کی تردید کرتا ہوں۔

    کراچی پولیس کی بڑی کارروائی، 96 افراد کا قاتل گرفتار

    واضح رہے کہ ایس ایس پی ایسٹ غلام اظفرمہیسر اور ایس پی زبیرنذیر نے پریس کانفرنس کے دوران بتایا کہ ڈسٹرکٹ ایسٹ پولیس نے کارروائی کرتے ہوئے ایم کیو ایم لندن کے ٹارگٹ کلر یوسف عرف ٹھیلے والا کو گرفتار کرلیا۔

    گرفتار ٹارگٹ کلر نے دعویٰ کیا ہے کہ فاروق ستار نے نائن زیرو پر کمرہ دے کر ایک ماہ تک مفروری کٹوائی۔

  • کراچی پولیس کی بڑی کارروائی، 96 افراد کا قاتل گرفتار

    کراچی پولیس کی بڑی کارروائی، 96 افراد کا قاتل گرفتار

    کراچی: شہر قائد میں ڈسٹرکٹ ایسٹ پولیس نے کارروائی کرتے ہوئے 96 افراد کے قاتل کو گرفتار کرلیا، ٹارگٹ کلر کا تعلق ایم کیو ایم لندن سے ہے۔

    تفصیلات کے مطابق ایس ایس پی ایسٹ غلام اظفرمہیسر اور ایس پی زبیرنذیر نے پریس کانفرنس کے دوران بتایا کہ ڈسٹرکٹ ایسٹ پولیس نے کارروائی کرتے ہوئے ایم کیو ایم لندن کے ٹارگٹ کلر یوسف عرف ٹھیلے والا کو گرفتار کرلیا۔

    ایس ایس پی ایسٹ نے بتایا کہ گرفتار ملزم کا ٹارگٹ کلنگ گروپ 43 ٹارگٹ کلر پر مشتمل تھا، ٹارگٹ کلرٹیم نے 2 فوجی جوانوں کو قتل کیا، گروہ نے پاک فضائیہ، پولیس کے ایک ایک اہلکار کو قتل کیا۔

    غلام اظفر مہیسر کے مطابق گروہ نے ایم کیوایم حقیقی کے 5 کارکن، سرکاری ملازم سمیت 2 افراد کوقتل کیا، مخبری کے شبے میں 12، بھتہ نہ دینے پرایک شہری کو قتل کیا۔


    ایس ایس پی ایسٹ نے بتایا کہ محکمہ داخلہ سندھ نے بھی ملزم کی گرفتاری کے احکامات جاری کیے تھے، ملزم دہشت گرد ندیم ماربل اور عبدالسلام عرف مسہ کا قریبی ساتھی ہے۔

    انہوں نے بتایا کہ ملزم 1996 میں رینجرز کے ہاتھوں گرفتار ،1997 میں رہا ہوا، ملزم پیرول پر رہا ہونے کے بعد روپوش ہوگیا تھا، روپوشی کے دوران ایم کیوایم لندن گروپ ملزم کو پیغامات پہنچاتا تھا۔ گرفتار ٹارگٹ کلر نے دعویٰ کیا ہے کہ فاروق ستار نے نائن زیرو پر کمرہ دے کر ایک ماہ تک مفروری کٹوائی۔