کراچی : فاریکس ایسوسی ایشن کے صدر ملک بوستان نے کہا ہے کہ آج بھی ڈالر کی قیمت گری ہے اور بھی گرے گی کیونکہ ڈنڈا چل گیا ہے اور اب اس کو مزید نیچے لے کر آئیں گے۔
اے آر وائی نیوز کے پروگرام ’’خبر مہر بخاری کے ساتھ‘‘ میں خصوصی گفتگو کرتے ہوئے انہوں نے بتایا کہ ڈالر کی قیمت جلد ہی 250روپے کی سطح پر آجائے گی اور یہ ہی اس کی اصل قیمت ہے۔،
ملک بوستان نے کہا کہ امریکی ڈالر کو اب اس کی اصل قیمت پر ہی رکھا جائے گا، اسمگلنگ کی روک تھام اور ذخیرہ اندوزوں کیخلاف کارروائی سے فائدہ ہورہا ہے۔
صدر فاریکس ایسوسی ایشن کا کہنا تھا کہ اب اسمگلرز اور ذخیرہ اندوزوں کو خوف ہے اس لیے ڈالر کی قیمت گررہی ہے، ذخیرہ اندوزوں کو پتہ ہے کہ ڈالر کی قیمت250تو ہونی ہی ہے۔
ایک سوال کے جواب میں ملک بوستان نے کہا کہ ڈالر کو فروخت کیا جائے گا تواس کی مزید قدر گرے گی، 5ہزار کے نوٹ کو دو تین سال میں ختم کردینا چاہیے۔
