Tag: فتنہ الخوارج

باجوڑ : سیکیورٹی فورسز کے آپریشن کیخلاف فتنہ الخوراج کےخارجی نورولی کااعلامیہ منظرعام پرآگیا، جس میں آپریشنز کو پاک فوج کا ظلم قرار دینے کی کوشش کی گئی ہے۔

تفصیلات کے مطابق باجوڑ میں سیکیورٹی فورسز کے حالیہ آپریشن کے بعد فتنہ الخوارج کی جانب سے ایک اور عوام مخالف پروپیگنڈا بے نقاب ہوگیا۔

ذرائع نے بتایا کہ سیکیورٹی فورسز کے آپریشن کیخلاف فتنہ الخوراج کے خارجی نورولی کااعلامیہ منظرعام پرآگیا، خارجی کمانڈر نے اپنے اعلامیے میں باجوڑ آپریشنز کو پاک فوج کا ظلم قرار دینے کی کوشش کی ہے تاہم یہ بیان حقائق کے برعکس اور تنظیم کی دوغلی پالیسی کا عکاس ہے۔

ذرائع کا کہنا تھا کہ سیکیورٹی فورسز نے 18 اگست کو عوام کو واضح ہدایت کی تھی کہ دہشت گردوں کو علاقے میں داخل نہ ہونے دیا جائے، تاہم خارجی گروہ کے اعلامیے میں مقامی کمانڈروں کو باجوڑ چھوڑنے کی اجازت نہ دینے کی بات سامنے آئی ہے۔

ذرائع نے وضاحت کی کہ سیکیورٹی فورسز باجوڑ میں صرف دہشت گردوں کو نشانہ بنا رہی ہیں جبکہ عوام، ان کے کاروبار اور بچوں کے مستقبل کو محفوظ بنانے کے لیے اقدامات جاری ہیں، مقامی عوام کو بھی یقین دہانی کرائی گئی ہے کہ اُن کی جان و مال کا تحفظ اولین ترجیح ہے۔

ذرائع نے مزید کہا کہ خارجی گروہ کی جانب سے جاری بیانیہ دراصل ان کی شکست کا اظہار ہے۔ یہ گروہ اپنے پروپیگنڈے کے ذریعے مقامی آبادی کو دھوکا دینا چاہتا ہے لیکن باجوڑ کے عوام اب ان کا حقیقی چہرہ پہچان چکے ہیں اور ان کے بیانیے کو مسترد کر چکے ہیں۔

ذرائع کا کہنا تھا کہ مقامی عوام کی حمایت ہی دیرپا امن کی ضمانت ہے جو فتنہ الخوارج کے لیے سب سے بڑا خطرہ ہے، عوام جانتے ہیں کہ دہشت گردوں کی واپسی کا مطلب مزید تباہ شدہ بازار اور معصوم جانوں کا ضیاع ہوگا جبکہ باجوڑ کا مستقبل امن، ترقی اور خوشحالی سے جڑا ہے، نہ کہ خونریزی اور دہشت گردی سے۔

سوات : کاؤنٹر ٹیررازم ڈپارٹمنٹ ( سی ٹی ڈی) سوات نے کامیاب آپریشن میں فتنہ الخوارج کے 3 دہشت گرد ہلاک کردیے۔

تفصیلات کے مطابق کاؤنٹر ٹیررازم ڈپارٹمنٹ ( سی ٹی ڈی) سوات نے انٹیلی جنس بیسڈ سوئفٹ آپریشن کیا ، آپریشن میں فتنہ الخوارج کے3 دہشت گرد ہلاک ہوگئے۔

ترجمان نے بتایا کہ پررئی اور بری کوٹ کےعلاقےمیں انٹیلی جنس بنیادوں پرکارروائی کی گئی، ہلاک دہشت گرد اجمل عرف وقاص 9 مقدمات میں مطلوب تھا جبکہ مارے گئے دہشت گرد اجمل پر 20 لاکھ روپے انعام مقررتھا۔

سی ٹی ڈی کا کہنا تھا کہ دیگر 2 دہشت گرد مطیع اللہ اور رحیم اللہ ٹارگٹ کلنگ ،سہولت کاری میں ملوث تھے۔

ترجمان نے مزید بتایا کہ ہلاک دہشت گرد پولیس پر حملوں،بم دھماکوں میں ملوث تھے جبکہ دہشت گرد گروہ غیر ملکی سرپرستی میں ریاست مخالف سرگرمیوں میں ملوث تھا۔

ان کا کہنا تھا کہ مقامی پولیس کی مدد سے کامیاب آپریشن کیا گیا، سی ٹی ڈی سوات دہشت گردی کے خاتمے کیلئے پُرعزم ہے۔

اس حوالے سے ڈی پی اوسوات نے بتایا کہ گزشتہ شام 7 بجے دہشت گردوں کی موجودگی کی اطلاع ملی تھی،جس پر سی ٹی ڈی نےدہشت گردوں کیخلاف انٹیلی جنس بیسڈ آپریشن کیا، دہشت گردوں نےپولیس پرفائرنگ کی جوابی فائرنگ میں تینوں ہلاک ہوئے، ایک ہلاک دہشت گردکیخلاف دہشت گردی کے9مقدمات جبکہ دیگر دو ہلاک دہشت گرد 2،2 مقدمات میں ملوث تھے۔