کراچی: شہر قائد کے علاقے فرنٹیئر کالونی میں پکوان سینٹر پر گرنیڈ حملے کی فوٹیج سامنے آ گئی ہے۔
تفصیلات کے مطابق اورنگی ٹاؤن کے علاقے فرنٹیئر کالونی میں پکوان سینٹر پر نامعلوم ملزمان نے آج صبح سویرے دستی بم حملہ کیا تھا، جس کی سی سی ٹی وی سامنے آئی ہے۔
فوٹیج میں دیکھا جا سکتا ہے کہ دو موٹر سائیکلوں پر سوار 4 حملہ آور آئے، اور پکوان سینٹر کے سامنے سے گزرے اور واپس مڑ کر آئے، پہلے والی موٹر سائیکل پر پیچھے سوار شخص نے دستی بم کی پن نکال کر دکان پر پر پھینکا، اور پھر ان کے پیچھے والی موٹر سائیکل سوار نے پستول سے دکان پر تین فائر مار دیے۔
دستی بم خوش قسمتی سے پھٹ نہیں سکا تھا، شاید اسی لیے پیچھے والے حملہ آور نے پکوان سینٹر پر فائرنگ کی۔ پکوان سینٹر کے مالک کا کہنا تھا کہ وہ گھر پر سو رہے تھے کہ اچانک فائرنگ کی آوازیں آئیں، جن پر وہ اٹھے اور باہر آ کر دیکھا تو دستی بم پڑا ہوا تھا۔
فرنٹیئر کالونی میں پکوان سینٹر پر دستی بم حملہ، 2022 میں بھتے کی پرچی بھیجنے والے کو پکڑوایا تھا
دکان مالک کے مطابق ان کی کسی سے کوئی دشمنی نہیں ہے، نہ ہی کوئی دھمکی ملی تھی، تاہم 2022 میں انھیں بھتے کی پرچی ملی تھی، اور اس واقعے کا مقدمہ پیر آباد تھانے میں درج ہوا تھا، اور پولیس نے ملوث ملزم کو گرفتار کر کے جیل بھیج دیا تھا، جو کہ دکان مالک ہی کا پڑوسی نکلا تھا۔
