مصنوعی ذہانت (آرٹیفشل انٹیلیجنس مختصراً اے آئی) زندگی کے ہر شعبے میں قدم جما رہی ہے اب حیران کن خصوصیات والا فریج متعارف کرا دیا گیا ہے۔
ٹیکنالوجی کے بدلتے رجحانات کے ساتھ مختلف کمپنیاں بھی اے آئی ٹیکنالوجی کو اپناتے ہوئے لوگوں کے لیے نت نئی مصنوعات پیش کر رہی ہیں جو حیرت انگیز خصوصیات کے حامل ہیں۔
گھروں میں عام طور پر فریج کھانے پینے کی اشیا سے بھرے ہوتے ہیں تاہم مشکل اس وقت ہوتی ہے جب اچانک مہمان آجائیں اور آپ فریج کھولیں تو معلوم ہو کہ اس میں رکھا گوشت، چکن، سبزی یا دیگر اشیا استعمال ہوچکی ہیں۔
تاہم اب اس مسئلے کا حل بھی تلاش کر لیا گیا ہے اور ایک مشہور بین الاقوامی کمپنی (سام سنگ) نے اب ایک ایسا اسمارٹ فریج متعارف کرایا ہے جو اپنے اندر رکھی گئی اشیا میں کمی پر آپ کو آگاہ کر دے گا۔
سام سنگ نے حال ہی میں آنے والی ٹیکنالوجی کا اعلان کیا ہے۔ اس اے آئی فریج میں آپ جو اشیا بھی رکھیں گے وہ ان اشیا کو Instacart ایپ میں خودبخود شامل کر دے گا اور جب کوئی بھی شے اس میں کم ہو جائے گی تو وہ انسٹا کارٹ پر آپ کو ضروری اشیا کی فہرست بھیجے گا تاکہ اس کی بروقت خریداری کر کے مستقبل کی پریشانی سے بچ سکیں۔
32 انچ کا سام سنگ بیسپوک فریج اس ماہ کنزیومر الیکٹرانکس شو (سی ای ایس) میں پیش کیا جائے گا۔
