اسلام آباد: فری اینڈ فیئر الیکشن نیٹ ورک نے خیبرپختونخوا میں بلدیاتی انتخابات میں بدانتظامی کا ذمہ دار صوبائی حکومت اور الیکشن کمیشن کو قرار دے دیا۔ فافن کا کہنا ہے کہ الیکشن میں چھبیس فیصد دھاندلی ہوئی۔
فافین نے خیبرپختونخوا میں بلدیاتی انتخابات کے حوالے سے اپنی رپورٹ جاری کر دی، فافین کے مطابق انتخابات میں چھبیس فیصد تک دھاندلی کی گئی، بلدیاتی الیکشن بدترین بد انتظامی کا شکار ہوئے۔ تیرہ فیصد پولنگ سٹیشنز پر بروقت پولنگ شروع نہ ہو سکی، تریسٹھ وارڈز میں خواتین کو پولنگ سے روکا گیا، الیکشن کمیشن نے ویب سائٹ پر پولنگ اسکیم بھی جاری نہیں کی۔
فافین کی رپورٹ کے مطابق عام انتخابات کے مقابلے میں زیادہ لوگ ووٹ ڈالنے آئے، پولنگ عملہ غیر تربیت یافتہ اور پولنگ بوتھ کم تھے، خواتین کے ووٹ کم پڑے۔
فافین نے الیکشن کے دوران ہنگامہ آرائی کے حوالے سے کہا ہے کہ سب سے زیادہ ہنگامہ آرائی پشاور میں ہوئی، پشاور میں اٹھارہ بار پولنگ روکی گئی، ہنگامہ آرائی کے اعتبار سے دوسرا بڑا شہر بنوں رہا۔
فافین کے مطابق ہری پور میں چھبیس مرتبہ پولنگ سٹیشنوں پر قبضہ کیا گیا۔
فافین کی رپورٹ میں کہا گہا ہے کہ بدامنی اور ہنگامہ آرائی کی وجہ سے ووٹرز کا ٹرن آﺅٹ متاثر ہوا، ضلع صوابی میں پندرہ پولنگ اسٹیشنز پر خواتین کو ووٹ سے روکا گیا۔ کے پی کے بلدیاتی انتخابات میں قوانین کی خلاف ورزی کی گئی۔