Tag: فضائی حدود

کراچی: سول ایوی ایشن اتھارٹی نے لاہور ریجن میں فضائی روٹس میں تبدیلی کر دی ہے، لاہور ریجن کے فضائی روٹس میں طیاروں کی بلندی کی حد میں اضافہ کر دیا گیا۔

تفصیلات کے مطابق سی اے اے نے ایک نوٹم جاری کرتے ہوئے لاہور ریجن میں فضائی روٹس میں تبدیلی کر دی، نوٹم میں کہا گیا ہے کہ لاہور ریجن میں غیر ملکی طیاروں کو 46 ہزار فٹ کی بلندی سے نیچے پرواز کی اجازت نہیں ہوگی۔

نوٹم میں افغانستان سے پاکستان کی فضائی حدود میں داخل ہونے اور جانے والے طیاروں کو متبادل راستے اختیار کرنے کی ہدایت کی گئی ہے۔

بتایا گیا ہے کہ سی اے اے کے نوٹم پر فوری اطلاق ہوگا، یہ پابندی 5 ستمبر تک لاگو رہے گی، نوٹم کے مطابق پابندی پر صبح 7 بج کر 45 منٹ سے شام 4 بجے تک عمل ہوگا۔

روٹس میں تبدیلی کے سلسلے میں نوٹم کے ذریعے تمام ایئر لائنز کو آگاہ کر دیا گیا۔

یہ بھی پڑھیں:  پاکستانی فضائی حدود کھلنے کے بعد ائیرٹریفک میں اضافہ

واضح رہے کہ پاکستان نے پاک بھارت کشیدگی کے بعد 27 فروری سے تمام پروازوں کے لیے فضائی حدود بند کر دی تھیں، جسے بعد ازاں 16 جولائی کو کھول دیا گیا تھا۔ پاکستان کی جانب سے فضائی حدود کھلنے کی اجازت دینے کے بعد ائیر ٹریفک میں اضافہ ہوا۔

دنیا بھر کی فلائٹس پر نظر رکھنے والے ادارے کی رپورٹ کے مطابق اجازت ملنے کے بعد 17 گھنٹوں کے دوران 533 پروازوں نے پاکستانی فضائی حدود کو استعمال کیا۔ رپورٹ میں بتایا گیا ہے کہ بھارت سے آنے والی 51 سے زائد پروازوں نے پاکستان کی فضائی حدود کو استعمال کیا۔

فروری میں ہونے والی پاک بھارت کشیدگی کے باعث پاکستان نےاپنی فضائی حدود بھارت کے لیے بند کر دی تھی جس کے بعد انڈیا کو کافی نقصان کا سامنا بھی کرنا پڑا۔

اسلام آباد: سول ایوی ایشن کے حکام نے کہا ہے کہ بھارت نے فضائی حدود کھولنے کے لیے رابطہ کرلیا، کشیدگی کے باعث پاکستان کی حدود میں بھارتی طیاروں کے داخلے پر بندش ہے۔

تفصیلات کے مطابق سینیٹر مشاہد اللہ کی زیر صدارت سینیٹ کی قائمہ کمیٹی برائے ایوی ایشن (ہوا بازی) کا اجلاس ہوا جس میں وفاقی وزیر غلام سرور خان اور سول ایوی ایشن کے حکام شریک ہوئے۔

ڈائریکٹر جنرل سول ایوی ایشن کا کہنا تھا کہ بھارت نےفضائی حدودکھولنےکے لیے رابطہ کیا ہے، کشیدگی کےباعث بھارتی جہازوں کے لیے فضائی حدودتاحال بندہے کیونکہ بھارت کے لڑاکا طیارے ایئر بیسز  پر موجود ہیں۔

انہوں نے بتایا کہ بھارت کو جواب دیا ہے کہ ایئر بیس کلیئر اورجنگی طیارےہٹانےتک فضائی حدود نہیں کھولی جائے گی۔ اجلاس میں اسلام آباد ایئرپورٹ مالی بےضابطگیوں کی تحقیقات کے حوالے سے سول ایوی ایشن کے حکام نے رپورٹ پیش کی جس پر کمیٹی اراکین نے بحث کی۔

مزید پڑھیں: بھارتی ائیرلائنز کو پاکستانی فضائی حدود کی بندش کے سبب 549 کروڑ کا نقصان

یہ بھی پڑھیں: بھارتی حکومت کی پاکستان سے فضائی حدود کے استعمال کی درخواست

ہوا بازی کے حکام نے کمیٹی کو بریفنگ دی کہ مالی بےضابطگیوں کی 2 بار تحقیقات کمیشن نے کی ہیں، ایف آئی اے کی رپورٹ میں مالی بےضابطگیوں کی تصدیق نہیں ہوسکی کیونکہ اُس میں خامیوں کی تکنیکی نشاندہی کی گئی۔

قائمہ کمیٹی کے اراکین نے سول ایوی ایشن کی بریفنگ کو مسترد کردیا جبکہ چیئرمین سینیٹر مشاہد اللہ کا کہنا تھا کہ ایک رپورٹ میں مالی کرپشن کی نشاندہی کی گئی تو دوسری میں کہاگیاکچھ نہیں ہوا، سول ایوی ایشن کی جانب سےموصول جواب تسلی بخش  نہیں ہے۔ کمیٹی اراکین کا کہنا تھا کہ سول ایوی ایشن کےبیان میں بڑاتضادہے۔

اس موقع پر وفاقی وزیر برائے ہوا بازی نے کمیٹی کے سامنے مؤقف پیش کیا کہ بے ضابطگیوں میں ملوث افراد کو قانون کے کٹہرے میں لائیں گے کیونکہ قانون کے آگے کوئی مقدس گائے نہیں ہے۔ انہوں نے کہا کہ اسلام آبادایئر پورٹ معاملےکی خودتحقیقات کررہاہوں، ابھی مالی بے ضابطگیوں کی تحقیقات مکمل نہیں ہوئیں۔

اُن کا کہنا تھا کہ ایئر پورٹ تعمیرمیں سول ایوی ایشن کے افسران بھی قصور وار ہیں۔