ابو ظہبی: متحدہ عرب امارات کی ایئر لائن فلائی دبئی نے اپنی پروازوں میں اضافے کا اعلان کردیا، اس وقت یہ ایئر لائن 108 ایئر پورٹس کے لیے پروازیں چلا رہی ہے۔
اردو نیوز کے مطابق فلائی دبئی نے آئندہ سال 2023 کے دوران 7 نئے ایئر پورٹس کے لیے پروازیں شروع کرنے کا اعلان کیا ہے۔
فلائی دبئی مسافروں کی تعداد میں غیر معمولی اضافے کے باعث ماہ رواں کے دوران سلوینیا کے دارالحکومت لیویلیانا کے لیے ہر روز ایک پرواز چلارہی ہے۔
فلائی دبئی نے لیویلیانا کے لیے اپنی پہلی پرواز 24 ستمبر 2021 سے شروع کی تھی اور ہفتے میں تین پروازیں چلائی جا رہی تھیں۔
ایئر لائن کا کہنا ہے کہ فی الوقت افریقہ، وسطی ایشیا، قوقاز، مشرقی، جنوبی، وسطی یورپ، جی سی سی ممالک، مشرق وسطیٰ اور برصغیر ہند کے 108 ایئر پورٹس کے لیے پروازیں چلائی جارہی ہیں۔
فلائی دبئی نے سال رواں کے دوران 20 بوئنگ 737 میکس طیارے حاصل کیے ہیں جس کے بعد اس کے کل طیاروں کی تعداد 71 ہوچکی ہے، ان میں بوئنگ 737 اور بوئنگ 737 میکس شامل ہیں۔
فلائی دبئی کا کہنا ہے کہ 2023 کے وسط تک اس کی پروازیں 115 بین الاقوامی ایئر پورٹس کے لیے جانے لگیں گی۔
