Tag: فلسطینی صدر

اسلام آباد : وزیراعظم پاکستان نواز شریف نے کہا کہ فلسطین اور اسرائیل تنازعہ حل کیے بغیر مشرق وسطیٰ میں امن کا قیام ناممکن ہے اس لیے عالمی برادری مسئلہ فلسطین کے منصفانہ حل کے لیے اپنا کردار ادا کرے ۔

یہ بات انہوں نےاسلام آباد میں صدر محمود عباس کے ساتھ بات چیت کے بعد مشترکہ پریس کانفرنس میں اظہار خیال کرتے ہوئے کہی انہوں نے کہا کہ پائیدار ، خودمختار اور فعال فلسطینی ریاست کا قیام ہی خطے میں دیرپا امن کی ضمانت ہے۔

انہوں نے کہا کہ مسئلہ کشمیر کی طرح فلسطین بھی اقوام متحدہ کے ایجنڈے میں ایک تصفیہ طلب مسئلے کے طور پر موجود ہے اس لیے مسئلہ کشمیر کی طرح فلسطین کے تصفیے کو فی الفور حل کیا جائے جس کی سرحدی 1969 سے پہلے والی اور دارالخلافہ القدس الشریف ہو۔

وزیراعظم نواز شریف نے کہا کہ پاکستان فلسطینی عوام کے لیے خصوصی لگاؤ رکھتا ہے یہی وجہ کہ محمود عباس آج پاکستان کے چوتھے دورے پر پاکستان تشریف لائے ہیں جس سے دونوں ملکوں کے درمیان بردرانہ تعلقات کا بہ خوبی اندازہ لگایا جاسکتا ہے۔

اسلام آباد میں نئی تعمیر کی گئی فلسطینی سفارتخانے کی عمارت کے حوالے سے نواز شریف نے کہا کہ یہ منصوبہ ہمارے بردرانہ تعلقات کی ایک زندہ مثال ہے اور یقین دلایا کہ پاکستان تمام فورموں پر فلسطین کے نصب العین کی حمایت جاری رکھے گا۔

اس موقع پر فلسطین کے صدر محمود عباس نے میدیا سے گفتگو کرتے ہوئے کہا کہ مالی مدد سمیت فلسطینی عوام کے نصب العین کی مسلسل حمایت اور پاکستانی جامعات میں فلسطینی طلباء کے وظائف فراہم کرنے پر پاکستان کا شکریہ ادا کرتا ہوں اور دوطرفہ تعلقات میں مزید بہتری کا خواہاں ہوں۔

محمود عباس نے کہا کہ انہوں نے وزیراعظم نواز شریف کو یہودی بستیوں کی تعمیر اور امریکن سفارتخانے کی بیت المقدس منتقلی کرنے کے امریکی فیصلے سمیت مشرق وسطیٰ میں حالیہ پیش رفت کے بارے میں بھی آگاہ کیا ہے ۔

فلسطینی صدر نے مزید کہا کہ دوطرفہ گفتگو میں علاقائی مسائل اور دہشت گردی کے چیلنج سے نمٹنے کے لیے مشترکہ کاوشوں کی ضرورت پر ذور دیا گیا اور اس سے حوالے سے ہر ممکن تعاون اور خدمات کے تبادلے پر رضامندی کا اظہار کیا گیا۔

قبل ازیں فلسطینی صدر نے اسلام آباد میں وزیراعظم ہاؤس میں اپنے اعزاز میں رکھے گئے استقبالیہ تقریب میں شرکت کی جہاں وزیراعظم نوازشریف نےفلسطینی صدر کا کاپرتباک استقبال کیا اور فوج کےچاک وچوبند دستے نےگارڈ آف آنر بھی پیش کیا گیا۔