امریکا کے خفیہ ادارے سینٹرل انٹیلیجنس ایجنسی (سی آئی اے) کی ایسوسی ایٹ ڈپٹی ڈائریکٹر اینالائسز نے غیر معمولی اقدام اٹھاتے ہوئے اپنے فیس بک اکاؤنٹ پر فلسطین کے حق میں تصویر شیئر کر دی۔
غیر ملکی ذرائع ابلاغ کے مطابق ایک رپورٹ میں دعویٰ کیا گیا ہے کہ سی آئی کی عہدیدار نے 21 اکتوبر کے روز اپنے فیس بک اکاؤنٹ کی کوور فوٹو تبدیل کرتے ہوئے فلسطین کے حق میں تصویر پوسٹ کی تھی۔
رپورٹ میں انکشاف ہوا ہے کہ خاتون عہدیدار نے اپنی پروفائل کے کوور فوٹو میں ایک شخص کی تصویر لگائی تھی جس نے اپنے ہاتھ میں فلسطینی پرچم بلند کیا ہوا تھا۔
رپورٹ میں دعویٰ کیا گیا کہ امریکا کے خفیہ ادارے سینٹرل انٹیلیجنس ایجنسی (سی آئی اے) کی ایسوسی ایٹ ڈپٹی ڈائریکٹر اینالائسز کی جانب سے پبلک پلیٹ فارم پر سیاسی جھکاؤ ظاہر کرنے والی تصویر شیئر کرنا غیر معمولی اقدام تھا۔
سی آئی اے کا مذکورہ معاملے پر موقف اختیار کرتے ہوئے کہنا تھا کہ بطور ایجنسی ہم جس طرح کام کرتے ہیں، اس اعتبار سے ہمارے افسران اپنی اینالیٹیکل آبجیکٹویٹی سے کمٹڈ ہیں۔
سی آئی اے کے مطابق ممکن ہے کہ کسی معاملے پر کوئی افسر اپنی ذاتی رائے بھی رکھتا ہو لیکن وہ رائے ان کی یا سی آئی اے کی غیرجانبداری کو بلکل بھی متاثر نہیں کرتی۔
واضح رہے کہ بائیڈن انتظامیہ کو اسرائیل و فلسطین جنگ میں یکطرفہ اسرائیلی حمایت پر سفارت کاروں سمیت دیگر عہدیداروں کی جانب سے شدید تنقید اور ردعمل کا سامنا کرنا پڑ رہا ہے۔
یو ایس ایڈ کے سینکڑوں افسران نے اس سلسلے میں جنگ بندی کیلئے امریکی صدر کو خط بھی لکھا تھا جبکہ محکمہ خارجہ سمیت مختلف محکموں کے کئی افراد اپنے عہدوں سے بھی مستعفی ہوگئے تھے۔
