لاہور: معروف اداکارہ صبیحہ خانم امریکا میں انتقال کر گئیں، وہ طویل عرصے سے امریکا میں مقیم تھیں۔
اے آر وائی نیوز کے مطابق خاندانی ذرایع نے تصدیق کی ہے کہ طویل عرصے سے امریکا میں مقیم اداکارہ صبیحہ خانم 84 برس کی عمر میں انتقال کر گئی ہیں، صبیحہ خانم 1935 میں گجرات میں پیدا ہوئی تھیں۔
صبیحہ خانم نے 1950 میں فلم بیلی سے اپنے فنی سفر کا آغاز کیا، صبیحہ اور سنتوش کی جوڑی فلمی دنیا کے مقبول ترین جوڑیوں میں سے ایک تھی، 50 اور 60 کی دہائی میں ان کی جوڑی فلم کی کامیابی کی ضمانت ہوا کرتی تھی۔
صبیحہ خانم ٹی وی ڈراما سیریل دشت میں بھی جلوہ گر ہوئیں، ان کو خوبصورت اداکاری پر صدارتی تمغاے حسن کارکردگی اور نگار سمیت متعدد ایوارڈز سے نوازا گیا۔ صبیحہ خانم نے 7 لاکھ، تہذیب، انوکھا، مکھڑا، دیور بھابی، ایک گناہ، شکوہ، باجی اور درجنوں دیگر کامیاب فلموں میں زبردست اداکاری کے جوہر دکھائے۔
صبیحہ خانم کا پیدائشی نام مختار بیگم تھا، ان کی شادی سنتوش کمار سے ہوئی جن کا اصل نام سید موسیٰ رضا تھا، صبیحہ خانم نے 50 اور 60 کی دہائی میں پاکستانی سنیما پر راج کیا، 1980 اور90 کی دہائی میں انھوں نے پاکستان ٹیلی ویژن کے مشہور ڈراموں میں بھی اداکاری کی۔
خاندانی ذرایع کے مطابق صبیحہ خانم کا انتقال ہفتے کی صبح (13 جون کو) ورجینیا میں ہوا، وہ کافی عرصے سے گردوں کے عارضے، بلڈ پریشر اور شوگر سمیت کئی بیماریوں میں مبتلا تھیں۔
