بھارتی فلم انڈسٹری کی شہرۂ آفاق فلم ’شعلے ‘ سے متعلق ایک حقیقت سامنے آئی ہے۔
فلمساز رمیش سپی کی 1975 میں ریلیز ہونے والی فلم مشہور فلم ’شعلے‘ آج بھی اپنے جاندار ڈائیلاگس اور فلم اداکاروں کی شاندار اداکاری کی وجہ سے فلمی شائقین کے دلوں پر راج کرتی ہے۔
فلم شعلے میں بالی ووڈ کے معروف اداکار دھرمیندر، امیتابھ بچن، امجد خان، سنجیو کمار، ہیما مالنی اور جیا بچن کے علاوہ اسرانی، جگدیپ نے اپنی اداکاری کے جوہر دکھائے تھے۔
بھارتی میڈیا کے مطابق نے اس بات کا انکشاف کیا ہے کہ اس فلم میں کس اداکار کو کتنا معاوضہ دیا گیا تھا، یہ فلم 3 کروڑ کے بجٹ سے بنائی گئی تھی، اس فلم میں کام کرنے کیلئے دھرمیندر کو ڈیڑھ لاکھ روپے کا معاوضہ ادا کیا گیا اور دھرمیندر اس وقت کے سب سے مہنگے اداکار سے طور پر جانے جاتے تھے۔
اس فلم میں دھرمیندر کے بعد سنجیو کمار سب سے زیادہ معاوضہ لینے والے دوسرے اداکار تھے جنہوں نے اس فلم کیلئے ایک لاکھ 25 ہزار روپے کا معاوضہ لیا تھا جبکہ امیتابھ بچن اس فلم میں سیکنڈ لیڈ پر تھے لیکن اس کے باوجود انہیں سنجیو کمار سے کم معاوضہ دیا گیا جو ایک لاکھ روپے تھا۔
بسنتی کا کردار ادا کرنے والی ہیما مالینی کو 75 ہزار روپے اور رادھا کا کردار ادا کرنے والی جیا بچن کو صرف 35 ہزار روپے دیے گئے جس کے پیش نظر جیا بچن اس فلم میں سب سے کم معاوضہ لینے والی اداکارہ تھیں جبکہ سامبا (میک موہن) کو 12 ہزار، کالیا کا کردار ادا کرنے والے وجو کھوٹے کو 10 ہزار اور امام صاحب کا کردار ادا کرنے والے اداکار اے کے ہنگل کو صرف 8 ہزار روپے میں کاسٹ کیا گیا تھا۔
فلم کے سب سے مشہور کردار گبر سنگھ یعنی امجد خان نے اس مشہور کردار کو ادا کرنے کے لیے صرف 50 ہزار روپے لیے تھے۔
واضح رہے کہ یہ فلم جاوید اختر اور سلیم خان کے مشترکہ پراجیکٹس میں سب سے مشہور ہے، کئی سال گزر جانے کے باوجود ’شعلے‘ آج بھی فلمی شائقین کے دلوں پر راج کرتی ہے۔
