اسلام آباد: پاکستان میں فلمی صنعت کی بحالی کے لیے طویل عرصے سے التوا کی شکار فلم پالیسی کو حتمی شکل دے دی گئی۔
تفصیلات کے مطابق وفاقی وزیر اطلاعات فواد چوہدری سے آج اسلام آباد میں فلم پروڈیوسرز ایسوسی ایشن کے وفد نے ملاقات کی جس میں چیئرمین سی پیک عاصم سلیم باجوہ، وزیر اعظم کے معاون خصوصی عثمان ڈار، اور سینیٹر فیصل جاوید شریک تھے۔
وفد کی قیادت ایسوسی ایشن کے وائس چیئرمین جرجیس سیجا کر رہے تھے، شیخ امجد رشید، سنتیش آنند، چوہدری کامران، فضا علی مرزا، عرفان ملک اور بدر اقبال بھی شریک تھے۔
اس ملاقات میں طویل عرصے سے التوا کی شکار فلم پالیسی کو حتمی شکل دے دی گئی، فلمی صنعت کی بحالی کے لیے تمام تر اقدامات اٹھانے کے عزم کا بھی اعادہ کیا گیا۔
فواد چوہدری نے کہا کہ پاکستان میں شعبہ فلم کی ترقی اور بحالی حکومت کی ترجیح ہے، حکومت فلموں کی ایکسپورٹ کی حوصلہ افزائی کے لیے پُر عزم ہے، فواد چودھری نے برآمدات کے حوالے سے فلم پروڈیوسرز ایسوسی ایشن کو فوکل گروپ تشکیل دینے کی ہدایت کرتے ہوئے کہا کہ اس ضمن میں سعودی عرب اور چین کے ساتھ تعاون و اشتراک سود مند ثابت ہو سکتا ہے۔
انھوں نے کہا حکومت فلمی صنعت کے لیے ٹیکس مراعات اور دیگر مراحل کی منظوری سہل بنانے کے لیے بھی اقدام اٹھا رہی ہے۔
وفاقی وزیر اطلاعات کا کہنا تھا ہم نے فلمی صنعت کی تنزلی کو ترقی کے سفر میں بدلنا ہے، جس کے لیے بہترین تخلیق، ٹیکنالوجی کے امتزاج، اور اچھے مواد پر توجہ دینا ہوگی۔
