Tag: فنانشل ایکشن ٹاسک فورس

اسلام آباد: پاکستان نے بھارتی وزیر خزانہ کے ایف اے ٹی ایف پر بیان پر تشویش کا اظہار کرتے ہوئے کہا ہے کہ اس بیان سے ایک بار پھر ثابت ہوا کہ بھارت تکنیکی فورم کو سیاست زدہ کر رہا ہے۔

تفصیلات کے مطابق دفتر خارجہ نے بھارتی وزیر خزانہ ارون جیٹلی کے بیان پر تشویش کا اظہار کیا، ترجمان نے کہا کہ بھارت پہلے بھی ایف اے ٹی ایف میں سیاست کی کوشش کر چکا ہے، فروری 2019 میں بھی بھارت نے پاکستان کو بلیک لسٹ میں ڈالنے کا کہا۔

گزشتہ روز بھارتی وزیر خزانہ نے کہا تھا کہ فنانشل ایکشن ٹاسک فورس کا آئندہ اجلاس مئی میں ہو رہا ہے، جس میں بھارت مطالبہ کرے گا کہ دہشت گردی کی روک تھام کے لیے ناکافی اقدامات کرنے پر پاکستان کو بلیک لسٹ میں شامل کیا جائے۔

ترجمان دفتر خارجہ نے کہا کہ ماضی میں ایف اے ٹی ایف سے متعلق بھارتی میڈیا کو معلومات لیک کی گئی تھیں، جس پر پاکستان نے ایف اے ٹی ایف کے صدر کو تحفظات سے آگاہ کیا، بھارتی وزیر کے بیان سے ایف اے ٹی ایف میں بھارت کا بہ طور ممبر موجود ہونا متنازع ہو گیا ہے۔

یہ بھی پڑھیں:  اقوام متحدہ نے مسعود اظہر کا نام پابندیوں کی فہرست میں شامل کر لیا: ڈاکٹر فیصل

دفتر خارجہ کے مطابق پاکستان ایف اے ٹی ایف ایکشن پلان پر عمل درآمد کے لیے پُر عزم ہے، پاکستان نے اس عزم کا اظہار اعلیٰ ترین سیاسی سطح پر کر رکھا ہے، امید ہے ایف اے ٹی ایف کا فیصلہ غیر متعصب، فیئر اور تکنیکی طور پر درست ہوگا۔

خیال رہے کہ فرانس میں قائم ادارے ایف اے ٹی ایف نے پاکستان کو گرے لسٹ میں ڈال رکھا ہے، گزشتہ روز اقوام متحدہ کی سیکورٹی کونسل کی کمیٹی نے جیش محمد کے سربراہ مسعود اظہر کو بلیک لسٹ کر دیا ہے۔

بھارت چاہتا ہے کہ کہ ایف اے ٹی ایف کی فہرست میں پاکستان کو ڈاؤن گریڈ کیا جائے، تاہم اس سے قبل بھی بھارت اپنی اس کوشش میں ناکام ہو چکا ہے۔

واشنگٹن : امریکہ میں پاکستانی سفیر علی جہانگیرصدیقی نے فنانشل ایکشن ٹاسک فورس کی گرے لسٹ سے نکلنے کے لیے اقدامات کرنے کےعزم ظاہر کیا ہے۔

تفصیلات کے مطابق امریکہ میں پاکستانی سفیرعلی جہانگیرصدیقی نے غیرملکی خبررساں ادارے کو انٹرویو میں کہا کہ پاکستان میں دہشت گردی کی سرگرمیوں میں 80 فیصد تک کمی آئی ہے۔

علی جہانگیرصدیقی کے مطابق فوجی امداد کے بارے میں امریکہ سے کوئی خصوصی بات چیت نہیں ہوئی۔

پاکستانی سفیرکا کہنا تھا کہ واشنگٹن میں اپنی ذمہ داریاں سنبھالنے کے بعد ان کی توجہ امریکہ کے ساتھ تجارتی اور معاشی تعلقات کوفروغ دینا ہے۔

انٹرویو کے دوران ایک سوال پرعلی جہانگیرصدیقی کا کہنا تھا کہ پاکستان کو امریکہ اور بھارت کے درمیان بڑھتے ہوئے تعلقات سے کوئی مسئلہ نہیں ہے۔

انہوں نے امید ظاہر کی کہ بھارت بھی امریکہ کے ساتھ ہمارے تعلقات کوکسی مخصوص زاویے سے نہیں دیکھے گا۔

چین سے تعلقات سے متعلق سوال پرپاکتسانی سفیرکا کہنا تھا کہ ہم نے چین کے ساتھ تعاون کو فروغ دیا ہے اور ہرملک کے مختلف ملکوں سے کثیرالجہتی تعلقات ہوسکتے ہیں۔

علی جہانگیرصدیقی کا انٹرویو کے دوران کہنا تھا کہ امریکہ اور چین دونوں پاکستان کے لیے اہم ہیں۔

پاکستانی سفیر نے انٹرویو کے دوران گرے لسٹ سے نکلنے کے لیے اقدامات کرنے کا عزم ظاہر کرتے ہوئے کہا کہ پاکستان نے اس حوالے سے 15 ماہ کا فریم ورک تیار کیا ہے۔

ایف اے ٹی ایف نے پاکستان کا نام گرے لسٹ میں شامل کردیا

خیال رہے کہ گزشتہ ہفتے فنانشل ایکشن ٹاسک فورس (ایف اے ٹی ایف) نے پاکستان کو گرے لسٹ میں شامل کیا تھا، گرے لسٹ میں دہشت گردوں کی مالی معاونت کرنے والے ملکوں کو شامل کیا جاتا ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔