ٹنڈو محمد خان : سلیکون انگوٹھوں سے بینظیر انکم سپورٹ پروگرام فنڈز میں خورد برد کا انکشاف سامنے آیا ، ایف آئی اے نے 3 ملزمان کو گرفتار کرلیا۔
تفصیلات کے مطابق ایف آئی اے سائبر کرائم سرکل حیدرآباد نے بڑی کارروائی کرتے ہوئے بینظیرانکم سپورٹ پروگرام فنڈز میں خوردبرد کرنے والے تین ملزمان کو گرفتارکرلیا۔
ایف آئی اے نے بتایا کہ مونو ٹیکنیکل کالج ڈسٹرکٹ ٹنڈو محمد خان میں واقع ریلٹیرز پر چھاپہ مارا گیا، گرفتار ملزمان میں شبیر احمد، غلام عباس اور آصف علی شامل ہیں۔
چھاپے کے دوران ملزمان سے 3 بی وی ایس ڈیوائسزز اور 5 موبائل فونز،ملزمان کے قبضے سے 44 شناختی کارڈز ،سیلیکون تھمز اور کیش نکلوانے کی متعدد سلپس بھی برآمد کئے ہیں۔
ملزمان سادہ لوح شہریوں کے سیلیکون تھم کا استعمال کرتے تھے اور بینظیر انکم سپورٹ پروگرام تک غیر قانونی رسائی حاصل کرتے تھے۔
ملزمان سادہ لوح شہریوں کے بینظیر فنڈز کی مد میں لاکھوں روپے کے فنڈز خوردبرد کر چکے تھے۔
ایف آئی اے کا کہنا ہے کہ ملزمان کے خلاف مقدمہ درج کر کے تفتیش کا آغاز کر دیا گیا ہے، ملزمان کی نشاندہی پر مزید گرفتاریاں متوقع ہے۔