اسلام آباد : فوجی عدالتوں میں توسیع سے متعلق 28 ویں آئینی ترمیم کا بل سینیٹ سے منظور کرلیا گیا، 78 ارکان نے بل کے حق میں اور 3 نے مخالفت میں ووٹ دیا، جے یو آئی (ف) نے رائے شماری میں حصہ نہیں لیا۔
تفصیلات کے مطابق سینیٹ نے فوجی عدالتوں کی مدت میں دو سال کی توسیع کا بل منظور کر لیا ہے، بل کےحق میں 78 اور مخالفت میں 3 ووٹ آئے، بل 2 تہائی اکثریت سے منظور کیا گیا۔
پختونخوا ملی عوامی پارٹی نے مذکورہ بل کی مخالفت کی جبکہ جے یو آئی (ف) نے رائے شماری میں ہی حصہ نہیں لیا۔
مزید پڑھیں : قومی اسمبلی: 28 ویں آئینی ترمیم منظور، فوجی عدالتوں کی مدت میں 2 سالہ توسیع
صدر پاکستان کی منظوری کے بعد یہ بل ایکٹ آف پارلیمنٹ بن جائے گا۔ ایکٹ کے تحت فوجی عدالتوں کی مدت میں 2 سال کی توسیع ہو جائے گی۔ فوجی عدالتوں کی مدت میں ہونے والی توسیع 7 جنوری 2017ء سے شمار ہو گی۔
یاد رہے کہ 21مارچ 2017کو قومی اسمبلی نے بھی 28 ویں آئینی ترمیم اور فوجی عدالتوں میں دو سالہ توسیع کی منظوری دے دی تھی۔
ترمیم کے مطابق دہشت گردی میں ملوث ملزم کو 24 گھنٹے کے دوران فوجی عدالت میں لازمی پیش کیا جائے گا، اس کے علاوہ ملزم کو اپنی مرضی کا وکیل کرنے کی بھی اجازت ہوگی۔
