Tag: فوجی مشق

آسٹریلیا میں ملکی تاریخ کی سب سے بڑی دو طرفہ فوجی مشقیں شروع ہو گئیں ان فوجی مشقوں میں 19 ممالک سے 35 ہزار سے زائد فوجی شریک ہیں۔

غیر ملکی میڈیا کے مطابق آسٹریلیا میں اس کی ملکی تاریخ کی سب سے بڑی دو طرفہ فوجی مشقیں شروع ہو گئی ہیں۔ ان فوجی مشقوں کو ’’ایکسرسائز ٹالیزمین سیبر 2025‘‘ کا نام دیا گیا ہے اور اس میں 19 ممالک سے 35 ہزار سے زائد فوجی شریک ہیں۔

اتوار کے روز ایچ ایم اے ایس ایڈیلیڈ لینڈنگ ڈاک پر افتتاحی تقریب کے بعد ان مشقوں کا باضابطہ طور پر آغاز کر دیا گیا ہے۔

اس حوالے سے اسٹریلیا کی وزارت دفاع سے جاری کردہ بیان میں کہا ہے کہ یہ مشقیں گیارہویں بار منعقد ہو رہی ہے اور یہ آسٹریلیا کی تاریخ کی سب سے بڑی اور جدید جنگی مشقیں ہیں۔

اس مشق میں امریکا، کینیڈا، فجی، فرانس، جرمنی، بھارت، انڈونیشیا، جاپان، نیدرلینڈز، نیوزی لینڈ، ناروے، پاپوا نیو گنی، فلپائن، جنوبی کوریا، سنگاپور، تھائی لینڈ، ٹونگا، اور برطانیہ کی افواج شامل ہیں، جبکہ ملائیشیا اور ویتنام مبصرین کے طور پر شریک ہیں۔

ان فوجی مشقوں کے لیے آئندہ تین ہفتوں کے دوران، آسٹریلیا اور شراکت دار ممالک کے 35,000 سے زائد فوجی کوئنزلینڈ، شمالی علاقہ جات، مغربی آسٹریلیا، نیو ساؤتھ ویلز، اور کرسمس آئی لینڈ میں تعینات ہوں گے، جب کہ پہلی بار پاپوا نیوگنی میں بھی فوجی مشقیں کی جائیں گی۔

ان فوجی مشقوں میں براہ راست فائر، فیلڈ ٹریننگ، زمینی افواج کی نقل وحرکت، فضائی اور بحری آپریشن اور ہنگامی لینڈنگ کی مشقیں شامل ہیں۔ اس کے ساتھ ہی ان مشقوں میں آسٹریلیا کی نئی فوجی صلاحیتوں جیسے یو ایچ۔60 ایم بلیک باکس اور پریسیژن اسٹرائیک میزائلز کی بھی آزمائش کی جائے گی۔

آسٹریلوی وزیر برائے دفاعی صنعت پیٹ کونرائے کا کہنا ہے کہ کینبرا کسی بھی تنازع میں فوجیوں کو پیشگی تعینات نہیں کرے گا۔ آسٹریلوی فوجیوں کو کسی تنازعے میں تعینات کرنے کا فیصلہ اس وقت کی حکومت کرے گی۔

واضح رہے کہ یہ فوجی مشق ایسے وقت میں شروع ہو رہی ہے جب امریکا نے تائیوان کے معاملے پر چین سے ممکنہ جنگ کی صورت میں اپنے اتحادیوں جاپان اور آسٹریلیا سے وضاحت طلب کی ہے۔

https://urdu.arynews.tv/possible-war-with-china-us-seeks-clarification-from-its-allies/