کراچی : اسٹیٹ بینک آف پاکستان نے شہریوں کو خبردار کیا ہے کہ شہری کسی بھی فون کالز پر اکاؤنٹ کے حوالے سے اپنی ذاتی تفصیلات نہ دیں بلکہ ایسی کالز کی اطلاع قانون نافذ کرنے والے اداروں کو دی جائیں۔
تفصیلات کے مطابق ملک کے مختف شہروں میں ناملعلوم افراد کی جانب سے سادہ لوح لوگوں کو فون کرکے ان سے ان کے بینک اکاؤنٹ سے متعلق تفصیلات مانگی جارہی ہیں۔
دھوکے باز افراد ان کے اکاؤنٹ سے رقم نکال کر ان کو زندگی بھر کی جمع پونجی سے محروم کردیتے ہیں، مختلف شہروں میں ہونے والے واقعات کے بعد اسٹیٹ بینک آف پاکستان نے ایک اعلامیہ کے ذریعے عوام الناس کو مطلع کیا ہے کہ شہری فون کالز پر کسی کو بھی ذاتی تفصیلات بتانے سے گریز کریں۔
اپنے شناختی کارڈ نمبر، بینک اکاؤنٹ یا پاس ورڈزکی معلومات کسی سے شیئر نہ کئے جائیں، ترجمان اسٹیٹ بینک کا مزید کہنا ہے کہ شہری اس قسم کی جعلی فون کالز کی فوری طور پر اطلاع قانون نافذ کرنے والے اداروں کو دیں اور معلومات افشا ہونے پر متاثرین اپنے متعلقہ بینک سے رجوع کریں۔
جعلی فون کالز کی اطلاع اسٹیٹ بینک کی ہیلپ لائن نمبر021،273727111 پر فوری دی جائیں، اعلامیہ میں مزید کہا گیا ہے کہ مرکزی بینک کھاتے داروں سے ذاتی معلومات کا کبھی تقاضا نہیں کرتا، مذکورہ دھوکے باز عناصر اسٹیٹ بینک اور دیگراداروں کے اہلکار بن کر معلومات حاصل کرتے ہیں۔
مزید پڑھیں: بینک اکاؤنٹ ہیک، کالا باغ میں ریٹائرڈ اہل کار کی رقم غائب
واضح رہے کہ ملک بھر میں بینک صارفین کو بے وقوف بناکر اکاؤنٹ کا صفایا کرنے والے گروہ کے کارندے کبھی بینک نمائندے بن کر کسی موبائل یا لینڈ لائن نمبر سے فون کر کے عام لوگوں کو بے وقوف بناتے ہیں۔
گزشتہ ماہ یہ بھی اطلاع سامنے آئی تھی کہ کچھ لوگ پاک فوج کا نام استعمال کر کے لوگوں کے اکاؤنٹس کی تفصیلات جمع کررہے ہیں۔
