ARYNews.tv | Urdu – Har Lamha Bakhabar

Tag: فوڈ

  • پکانے سے قبل انڈے کو دھونے کا نقصان جانتے ہیں؟

    پکانے سے قبل انڈے کو دھونے کا نقصان جانتے ہیں؟

    کیا آپ انڈوں کو ابالنے یا پکانے کے لیے توڑنے سے قبل دھوتے ہیں؟ تو جان لیں کہ آپ اس صحت مند غذا کو اپنے لیے نہایت خطرناک بنا رہے ہیں۔

    جس طرح مرغی کو دھونا اس میں موجود جراثیم کو پھیلانے کا سبب بنتا ہے، اور دھونے کے بعد یہ جراثیم ہمارے ہاتھوں، برتن اور دیگر اشیا میں منتقل ہوسکتے ہیں جو فوڈ پوائزن کا خطرہ بڑھا دیتے ہیں، بالکل اسی طرح کے خطرات انڈے میں بھی موجود ہوتے ہیں۔

    گو کہ انڈے کو دھوتے ہوئے اس کے بیرونی خول پر موجود بیکٹیریا اپنی جگہ سے حرکت کرتے ہیں اور وہاں سے ہٹ جاتے ہیں، لیکن کیا آپ جانتے ہیں کہ اس کے بعد وہ کہاں جاتے ہیں؟

    ماہرین کا کہنا ہے کہ انڈے کا خول مسام دار ہوتا ہے اور اس میں نہایت ننھے ننھے سوراخ ہوتے ہیںِ لہٰذا جب انڈے کو دھویا جاتا ہے تو بیکٹیریا اس خول کے اندر انڈے کی زردی اور سفیدی میں چلے جاتے ہیں۔

    بعد ازاں انڈے کے پکنے کے بعد بھی یہ ہماری پلیٹ میں موجود ہوتے ہیں۔

    ماہرین کا کہنا ہے کہ ٹھنڈے پانی سے انڈے کو دھونا اس خطرے کو بڑھا دیتا ہے۔ ان کے خیال میں ویسے تو انڈے کو پکانے سے قبل دھونا بالکل غیر ضروری ہے، تاہم پھر بھی اگر آپ انڈے کو ہر صورت دھونا ہی چاہتے ہیں تو اس کے لیے نیم گرم پانی کا استعمال کریں۔

  • بادام پلاؤ تیار کرنے کی ترکیب

    بادام پلاؤ تیار کرنے کی ترکیب

    پلاؤ چاولوں کی ایسی ڈش ہے جس میں مصالحوں کی مقدار بریانی کے مقابلے میں کم رکھی جاتی ہے اور یہ زود ہضم بھی ہوتا ہے۔ دنیا بھر میں پلاؤ کو مختلف طریقوں سے پکایا جاتا ہے۔

    آج ہم آپ کو بادام کا پلاؤ تیار کرنے کی ترکیب بتا رہے ہیں جو نہایت آسان ہے۔

    اجزا

    کشمش و بادام: 1 پاؤ

    گوشت: 1 کلو

    دھنیہ: آدھا چھٹانک

    گھی: آدھا کلو

    ادرک: 1 چھٹانک

    زعفران: 2 ماشہ

    پیاز: آدھا پاؤ

    سیاہ مرچ: 4 ماشہ

    لونگ: 4 ماشہ

    الائچی: 4 ماشہ

    ترکیب

    سب سے پہلے گوشت کی یخنی تیار کر لیں۔ گوشت کو لونگ اور یخنی سے دو تین مرتبہ بگھاریں۔

    اس کے بعد باقی پیاز کو گھی میں تل لیں۔ پھر صاف پیاز اور آدھا شوربہ آنچ پر رکھیں، جب گاڑھا پن تھوڑا سا رہ جائے تو اتار لیں اور گھی ملا کر تہہ بنائیں۔

    اسے چاول، نمک اور لونگ ڈال کر جوش دیں۔ جب آدھا گل جائے تو ہلا کر تہہ ڈالیں اور اوپر سے پیاز کا شوربہ اور یخنی اس طرح پھیلا کر ڈالیں کہ چاولوں میں پھیل جائے۔

    آٹے سے پتیلی کا منہ بند کر کے دم پر رکھ دیں۔

    تھوڑی دیر بعد کھول کر پسی ہوئی زعفران ڈال دیں اور کشمش بھون کر اوپر سے چھڑک دیں اور منہ ڈھانپ کر ہلکی آنچ پر رکھیں۔

    دم دینے کے بعد مزیدار بادام پلاؤ گرما گرم سرو کریں۔

  • آج اپنے دستر خوان کی رونق مزیدار ملائی کباب سے بڑھائیں

    آج اپنے دستر خوان کی رونق مزیدار ملائی کباب سے بڑھائیں

    آج اپنے دستر خوان کی رونق کچھ مختلف کھانوں سے بڑھائیں اور مزیدار ملائی کباب بنا کر اپنے اہل خانہ کا دل جیت لیں۔

    اجزا

    قیمہ: 1 کلو

    ادرک لہسن پسا ہوا: 1 کھانے کا چمچ

    نمک: حسب ذائقہ

    لال مرچ پسی ہوئی: 1 کھانے کا چمچ

    گرم مصالحہ پسا ہوا: ڈیڑھ کھانے کا چمچ

    کچا پپیتا پسا ہوا: 2 کھانے کے چمچ

    ہرا دھنیہ باریک کٹا ہوا: آدھی گڈی

    پودینہ باریک کٹا ہوا: آدھی گڈی

    ہری مرچیں باریک کٹی ہوئی: 6 سے 8 عدد

    ڈبل روٹی کے سلائس: 4 عدد

    انڈے: 2 عدد

    فریش کریم: آدھی پیالی

    کوکنگ آئل: تلنے کے لیے

    ترکیب

    ڈبل روٹی کو ایک پیالی دودھ میں 10 سے 12 منٹ تک بھگو لیں، پھر دودھ سے نکال کر لکڑی کے چمچ سے دبا دبا کر اچھی طرح نچوڑ لیں۔

    نچوڑی ہوئی سلائس کو ادرک لہسن٬ نمک٬ لال مرچ٬ گرم مصالحہ، پپیتا٬ ہرا دھنیہ٬ پودینہ اور ہری مرچوں کے ساتھ قیمہ میں اچھی طرح ملا لیں۔

    قیمے میں فریش کریم ملا کر لمبے لمبے کباب بنا لیں اور لکڑی کی سیخوں پر لگا کر کچھ دیر کے لیے فریج میں رکھ دیں۔

    کڑاہی میں کوکنگ آئل کو درمیانی آنچ پر 3 سے 5 منٹ تک گرم کریں اور کبابوں کو پھینٹے ہوئے انڈوں میں ڈبو کر سنہرے ہونے تک فرائی کر لیں۔

  • پھولوں سے بنی چائے پینا چاہیں گے؟

    پھولوں سے بنی چائے پینا چاہیں گے؟

    ہمارے ارد گرد بہت سے افراد چائے کے شوقین ہوتے ہیں اور نئے نئے ذائقوں کی چائے پینا پسند کرتے ہیں۔ یہ منفرد چائے بھی ایسے افراد کو نہایت پسند آئے گی۔

    چین میں مقبول یہ چائے گرم پانی میں جا کر پھول کی طرح کھل جاتی ہے۔ یہ چائے دراصل پھولوں سے بنائی جاتی ہے۔

    اس کے لیے عموماً چنبیلی، للی، روز یا کارنیشن کے پھولوں کی ایک گیند بنائی جاتی ہے اور اس کی بیرونی سطح پر چائے کے پتے سی دیے جاتے ہیں۔

    پانی میں ڈالنے کے بعد اسے 20 سے 30 منٹ تک دھیمی آنچ پر پکایا جاتا ہے جس کے بعد اس چائے کو سرو کیا جاتا ہے۔

    اس چائے کو بلومنگ ٹی کا نام دیا گیا ہے۔ اس کا ذائقہ کچھ خاص نہیں ہوتا کیونکہ پھول چائے کے ذائقے کو ختم کردیتے ہیں۔ ذائقے کے لیے اس میں مزید کچھ اشیا بھی شامل کی جاتی ہیں۔

    کہا جاتا ہے کہ یہ چائے چین میں قدیم دور سے استعمال کی جاتی رہی ہے۔ سنہ 1980 سے اسے جدید طریقے سے پیش کیا جارہا ہے اور اب یہ یورپ اور شمالی امریکا میں بھی مقبول ہورہی ہے۔

  • سبزیوں سے بیزار بچے ان سبزیوں کو نہایت شوق سے کھائیں گے

    سبزیوں سے بیزار بچے ان سبزیوں کو نہایت شوق سے کھائیں گے

    بچوں کو کھانا کھلانا ایک مشکل مرحلہ ہوسکتا ہے خاص طور پر اگر آپ چاہتے ہیں کہ بچے جنک فوڈ کے بجائے غذائیت بخش پھل اور سبزیاں کھائیں تو اس کوشش میں بچے آپ کو آٹھ آٹھ آنسو رلا سکتے ہیں۔

    ایسی ہی مشکل سے دو چار ماں نے بھی اتفاق سے اس صورتحال کو دلچسپ بنا لیا۔ لیلیٰ نامی یہ خاتون جو اب باقاعدہ فوڈ آرٹسٹ کہلائی جاتی ہیں، نے اپنے 3 سالہ بیٹے کے لیے کھانے کو نہایت دلچسپ شکل دے دی۔

    لیلیٰ نے یوں ہی ایک دن اسنیکس کو شیر کی شکل میں پلیٹ میں رکھ کر اپنے بیٹے کو پیش کیا جسے دیکھ کر وہ بہت خوش ہوا۔

    اگلے دن اس نے ماں سے فرمائش کی کہ اس کے کھانے کو اس کے پسندیدہ فلم کے کردار جیسا تشکیل دیا جائے، اور اس کے بعد یہ سلسلہ چل نکلا۔

    لیلیٰ سبزیوں کو مختلف شکلوں میں پیش کرتی جسے اس کا بیٹا نہایت شوق سے کھاتا۔ لیلیٰ نے سوشل میڈیا پر ان تصاویر کو پوسٹ کرنا شروع کردیا جہاں بہت جلد اسے لوگوں کی پذیرائی حاصل ہوگئی۔

     

    View this post on Instagram

     

    Daydreaming of our amazing time at @clubmedbintan – where mornings started with a cocktail 🍸 and swim and the evenings ended with amazing show and a limitless amount of delicious food. Where Jacob would get up and and the first thing he would say is “Mum- can I go to kids club?” And you just knew he was going to have the best time! We have stayed at many resorts but I have to say the #kidsclub at @clubmedbintan is one like no other! The GO’s are just incredible – they are not just staff they become your friends. They entertain, they even dine with you! From talent shows to acrobatics to pirate treasure hunts the children have entertainment from morning all the way through to night! @clubmedbintan is truly a remarkable place for both adults and children! We will definitely be back! ❤️ . . . #clubmed #clubmedbintan #bintanisland #travel #food #art #holiday #tourish #resort #foodstyling #foodphotography #healthychoices #beautifulcuisines #thechalkboardeats #happyandhealthy #glowlean #onthetable #organicmoments #colouryourplate #eattherainbow #wholefood #feedfeed #foods4thought #lovefood #organicfood #sundlivsstil #nemmad

    A post shared by LALEH MOHMEDI (@jacobs_food_diaries) on

    یقیناً آپ کے بچے بھی اس طرح سے سبزیوں کو کھانا پسند کریں گے لہٰذا اس طریقے کو آپ بھی اپنے گھر میں اپنا سکتے ہیں۔

  • آج کے افطار کو تکہ سموسوں سے سجائیں

    آج کے افطار کو تکہ سموسوں سے سجائیں

    ماہ رمضان اپنے اختتام پر ہے، ان اختتامی روزوں میں آج کے افطار کو تکہ سموسوں سے سجائیں۔

    اجزا

    چکن بریسٹ: 2 عدد

    لیموں کا رس: 2 کھانے کے چمچ

    تکہ مصالحہ: 2 سے 3 کھانے کے چمچ

    سموسہ پٹی: 10 عدد

    انڈہ (پھینٹا ہوا): 1 عدد

    لہسن ادرک کا پیسٹ: 1 کھانے کا چمچ

    نمک: حسب ضرورت

    ترکیب

    سب سے پہلے چکن بریسٹ پر اچھی طرح تکہ مصالحہ لگا کر ایک گھنٹے کے لیے میری نیٹ کر لیں۔

    ایک پین میں 2 سے 3 کھانے کے چمچ تیل گرم کر کے اس میں چکن شامل کر کے پکائیں یہاں تک کہ چکن گل جائے۔

    اب اسے فوڈ پروسیسر میں شامل کر کے پیس لیں اور باقی کے تمام اجزا بھی شامل کردیں۔

    اب سموسہ پٹی میں چکن مکسچر رکھ کر سموسہ کی شکل میں فولڈ کریں اور انڈے کی مدد سے کناروں کو بند کردیں۔

    گرم تیل میں ڈیپ فرائی کرلیں یہاں تک کہ سنہرے ہو جائیں۔

    کیچپ کے ساتھ گرم گرم سرو کریں۔

  • مزیدار ریشمی چکن ہانڈی سے دستر خوان سجائیں

    مزیدار ریشمی چکن ہانڈی سے دستر خوان سجائیں

    آج اپنے دستر خوان کی رونق کچھ مختلف کھانوں سے بڑھائیں اور ریشمی چکن ہانڈی بنا کر اپنے اہلخانہ کا دل جیت لیں۔

    اجزا

    مرغی (بغیر ہڈی کے): آدھا کلو

    سفید زیرہ (بھنا اور پسا ہوا): 1 کھانے کا چمچ

    لہسن ادرک (پسا ہوا): 1 کھانے کا چمچ

    گرم مصالحہ (پسا ہوا): 1 چائے کا چمچ

    لیموں کا رس: 2 کھانے کے چمچ

    تازہ کریم: 300 گرام

    کالی مرچ (کٹی ہوئی): 1 چائے کا چمچ

    شملہ مرچ (باریک کٹی ہوئی): 1 عدد

    پیاز (باریک کٹی ہوئی): 1 عدد

    نمک: حسب ذائقہ

    مکھن: 1 کھانے کا چمچ

    تیل: آدھی پیالی

    ترکیب

    دیگچی میں تیل گرم کر کے مرغی کو لہسن ادرک کا رنگ تبدیل ہونے تک بھونیں۔

    اس میں دھنیہ، زیرہ، کالی مرچ اور گرم مصالحہ ڈال کر چند منٹ تک پکائیں۔

    اب شملہ مرچ اور پیاز ڈال کر گوشت گلنے تک پکائیں۔

    اس میں مکھن اور لیموں کا رس ملا کر چولہا بند کر دیں۔

    ایک روٹی کا ٹکڑا دیگچی میں رکھیں اور جلتا ہوا کوئلہ رکھ کر چند قطرے تیل ٹپکائیں اور فوراً ڈھانپ دیں۔

    کوئلہ ہٹا کر اس میں کریم ملائیں، مزیدار ریشمی چکن ہانڈی تیار ہے گرما گرم پیش کریں۔

  • مزیدار تندوری چکن بریانی کھانا چاہیں گے؟

    مزیدار تندوری چکن بریانی کھانا چاہیں گے؟

    بریانی پاکستان کی مشہور ترین ڈش ہے جو تقریباً ہر شخص کو پسند ہوتی ہے۔ آج ہم آپ کو تندوری چکن بریانی بنانے کی ترکیب بتا رہے ہیں۔

    اجزا

    چکن: آدھا کلو

    دہی: 1 پاؤ

    پیاز: 1 عدد

    ٹماٹر: 2 عدد

    ہری مرچ: 4 عدد

    ہرا دھنیہ، پودینہ: چوتھائی گٹھی

    گھی: آدھا کپ

    آلو بخارہ: 100 گرام

    چاول: 300 گرام

    لال مرچ پاؤڈر: 1 کھانے کا چمچ

    ہلدی پاؤڈر: 1 کھانے کا چمچ

    گرم مصالحہ پاؤڈر: 1 کھانے کا چمچ

    ادرک، لہسن پیسٹ: 2 کھانے کے چمچ

    زردہ رنگ: آدھا چائے کا چمچ

    جائفل جاوتری پاؤڈر: آدھا چائے کا چمچ

    چھوٹی بڑی الائچی کا پاؤڈر: آدھا چائے کا چمچ

    ثابت گرم مصالحہ: حسب ضرورت

    کیوڑہ: 2 کھانے کے چمچ

    نمک: حسب ذائقہ

    ترکیب

    سب سے پہلے چکن کو کٹ لگائیں اور اسے ایک کھانے کا چمچ ادرک، لہسن پیسٹ، لال مرچ پاؤڈر، ہلدی پاؤڈر، گرم مصالحہ پاؤڈر، نمک اور آدھا پاؤ دہی کے ساتھ میری نیٹ کریں۔

    اوون کو 180 ڈگری پر پری ہیٹ کرلیں۔

    چاولوں کو آدھے گھنٹے کے لیے پانی میں بھگو دیںِ۔

    بیکنگ ٹرے کو چکنا کرلیں اور اس پر چکن رکھ کے اوون میں دس سے پندرہ منٹ رکھ دیں۔

    کیوڑہ میں زردہ رنگ مکس کرلیں۔

    گریوی بنانے کے لیے

    پین میں گھی گرم کر کے اس میں پیاز اور ثابت گرم مصالحہ ہلکی آنچ پر پکائیں، جب پیاز گولڈن ہو جائے تو ایک کھانے کا چمچ ادرک، لہسن پیسٹ شامل کر کے مکس کریں کہ کچا پن دور ہوجائے۔

    اب باقی آدھا پاؤ دہی اور ہری مرچیں شامل کر کے پکائیں۔

    جب دہی کا پانی خشک ہو جائے تو آلو بخارہ، ٹماٹر، 2 چائے کے چمچ کیوڑہ مکسچر، آدھا ہرا دھنیہ پودینہ، نمک اور آدھا کپ پانی ڈال کے 2 منٹ پکالیں اور چولہا بند کردیں، گریوی تیار ہے۔

    اس گریوی کے اوپر چوتھائی چائے کا چمچ جائفل جاوتری، چوتھائی چائے کا چمچ چھوٹی اور بڑی الائچی کا پاؤڈر اور باقی ہرا دھنیہ پودینہ ڈال دیں۔

    اب اس کے اوپر اوون کی تندوری چکن رکھ دیں۔

    چاولوں کو نمک ڈال کے پانی میں ابال لیں۔

    جب پانی کو ابال آنے لگے تو چاولوں کا تیسرا حصہ چھلنی سے نکال کر گریوی کے اوپر ڈال دیں۔ (یہ کچے چاول گریوی کے پانی سے دم میں پکیں گے)۔

    جب باقی چاولوں میں چار کنی رہ جائے تو چھلنی سے پانی چھان کے ان کو پہلے والے چاولوں کے اوپر ڈال دیں۔

    اب چاولوں کے اوپر باقی چوتھائی چائے کا چمچ جائفل جاوتری پاؤڈر، چوتھائی چائے کا چمچ چھوٹی بڑی الائچی کا پاؤڈر، ایک سے ڈیڑھ چائے کے چمچ کیوڑہ مکسچر اور 2 کھانے کے چمچ گھی شامل کر کے اسے دس سے بارہ منٹ دم پر رکھ دیں۔

    تیار ہونے پر نکال کے مزے دار تندوری چکن بریانی پیش کریں۔

    نوٹ: نمک تین حصوں میں ڈالنا ہے اس لیے احتیاط سے ڈالیں۔ جب بریانی دم پر رکھیں تب آنچ تیز رکھیں اور دو منٹ بعد دم والی کر دیں۔

  • آج مینگو آئسکریم سے افطار کی رونق بڑھائیں

    آج مینگو آئسکریم سے افطار کی رونق بڑھائیں

    سخت گرمی کا موسم ہے اور ایسے میں تمام دن کے روزے کے بعد افطار میں ٹھنڈی ٹھار اشیا کھانے کا دل چاہتا ہے۔

    اسی لیے آج ہم آپ کو گھر میں مزیدار مینگو آئسکریم بنانے کی ترکیب بتا رہے ہیں۔

    اجزا

    دودھ: 1 لیٹر

    آم: 1 کلو

    انڈے: 3 عدد

    کارن فلور: 3 کھانے کے چمچ

    چینی: ڈیڑھ پیالی

    فریش کریم: 2 پیالی

    زردے کا رنگ: چٹکی بھر

    مینگو ایسنس (دستیاب نہ ہو تو ضروری نہیں): 1 چائے کا چمچہ

    ترکیب

    سب سے پہلے دودھ کو ابال لیں اور جب ابال آجائے تو چینی ملا کر 15 منٹ پکائیں۔

    آم کو چھیل کر پیسٹ بنا لیں۔

    فریش کریم کو پیالے میں نکال کر فریج میں رکھ کر ٹھنڈا یخ کر لیں۔

    انڈے کی زردی اور سفیدی کو الگ الگ کرلیں اور زردی میں کارن فلور اور زردے کا رنگ ملا کر پھینٹ لیں۔

    چولہے کی آنچ ہلکی کر کے اس مکسچر کو پکتے ہوئے دودھ میں ڈالیں اور چمچ چلاتے ہوئے مکس کرلیں۔

    سارا مکسچر ڈالنے کے بعد آنچ کو درمیانی کر کے تیزی سے چمچ چلاتے ہوئے 5 منٹ تک پکائیں اور چولہے سے اتار کر ٹھنڈا ہونے کے لیے رکھ دیں۔

    انڈے کی سفیدیوں کو الگ سے اتنی دیر پھینٹیں کہ سخت سا جھاگ بن جائے۔

    پھر فریش کریم کو 4 سے 5 منٹ برف پر رکھ کر پھینٹیں۔

    اب ان دونوں چیزوں کو مینگو ایسنس کے ساتھ دودھ کے مکسچر میں ملا کر 10 منٹ تک اچھی طرح مکس کریں۔

    کسی ایئر ٹائٹ ڈبے میں ڈال کر 4 گھنٹے کے لیے فریزر میں رکھ دیں۔ ان 4 گھنٹوں میں 4 یا 5 بار آئسکریم فریزر سے نکال کر پھینٹیں اور آخری بار پھینٹتے ہوئے آم کا پیسٹ شامل کر لیں۔

    اچھی طرح ایئر ٹائٹ ڈبے میں بند کر کے 6 سے 8 گھنٹے کے لیے فریزر میں رکھ دیں۔

    جب آئسکریم تیار ہوجائے تو خوبصورت آئسکریم گلاس میں نکال کر آم کے ٹکڑوں اور کریم سے گارنش کر کے پیش کریں۔

  • مزیدار پیزا اسٹکس بنانے کی ترکیب

    مزیدار پیزا اسٹکس بنانے کی ترکیب

    پیزا کھانا تو عام سی بات ہے جسے بعض اوقات گھر میں بھی بنایا جاتا ہے، آج ہم آپ کو ایک منفرد طریقے سے اسٹکس کی شکل میں پیزا بنانے کی ترکیب بتا رہے ہیں۔

    اجزا

    میدہ چھنا ہوا: 250 گرام

    خمیر: آدھا چائے کا چمچ

    چینی: 1 چائے کا چمچ

    بیکنگ پاؤڈر: 1 چائے کا چمچ

    نمک: 1 چٹکی

    مرغی کا گوشت (ابال کر چوپ کرلیں): 250 گرام

    شملہ مرچ (چوپ کرلیں): 1 عدد

    پیزا سوس: 4 کھانے کے چمچ

    موزریلا پنیر (کدو کش کرلیں): 200 گرام

    تلی ہوئی پیاز: آدھی پیالی

    کٹی ہوئی کالی مرچ: آدھا چائے کا چمچ

    زیتون (باریک کٹے ہوئے): آدھی پیالی

    اوریگانو: آدھا چائے کا چمچ

    انڈا: 1 عدد

    مکھن؛ 1 کھانے کا چمچ

    ترکیب

    سب سے پہلے تھوڑے سے نیم گرم پانی میں خمیر اور چینی ملا کر 15 منٹ کے لیے چھوڑ دیں۔

    میدے میں نمک٬ بیکنگ پاؤڈر اور خمیر ڈال کر گوندھیں اور 4 گھنٹوں کے لیے رکھ دیں۔

    اس آٹے کے 2 پیڑے بنا کر بیل لیں۔

    ایک پیالے میں مکھن کے علاوہ فلنگ کے تمام اجزا ملا لیں اور روٹیوں پر اس کی تہہ لگا دیں۔

    روٹیوں کو لپیٹ کر ہاتھ کی مدد سے چپٹا کر لیں اور کناروں کو انڈا لگا کر بند کر دیں۔

    ان کے چھوٹے ٹکڑے کاٹ کر اوون کی ٹرے میں رکھ دیں۔

    ٹرے کو پہلے سے گرم اوون میں 200 ڈگری سینٹی گریڈ پر 20 منٹ تک پکا کر نکال لیں۔

    ان پر برش کی مدد سے مکھن لگائیں اور دو منٹ کے لیے دوبارہ اوون میں رکھ کر پکائیں۔

    گرما گرم مزیدار پیزا اسٹکس تیار ہیں۔