فٹبال دنیا کا ایک مقبول کھیل ہے۔ لیکن کیا آپ جانتے ہیں کہ یہ کھیل ہماری زندگی میں کیسے داخل ہوا۔ اس کا آغاز کب اور کہاں ہوا؟
زمانۂ قدیم سے دنیا کی مشہور اور بڑی اقوام میں جن میں چینی، جاپانی، یونانی، ایرانی اور اطالوی شامل ہیں، ایک کھیل مقبول رہا ہے جس کے تذکروں اور آثار کی بنیاد پر اسے موجودہ دور کے کھیل فٹبال کی طرز کا کہا جاسکتا ہے۔ محققین کے مطابق چین میں چند صدیوں قبل نہیں بلکہ تین ہزار سال پہلے فٹبال کی طرز کا ایک کھیل کھیلا جاتا تھا۔
فٹبال کے کھیل کے بارے میں بعض دل چسپ روایات بھی ملتی ہیں کہ چین اور مصر کے ساحلی علاقوں میں بچّے جمع ہو کر سوکھے ناریل کو پیر سے ٹھوکر مارتے ہوئے دور تک لے جاتے اور واپس لاتے تھے۔ یہی فٹبال کی ابتدا تھی۔ کچھ لوگوں کا خیال ہے کہ جرمنی اور ڈنمارک کے درمیان جنگ ہوئی تو دونوں ممالک کے سپاہی دشمن کو خوف زدہ کرنے اور اپنی طاقت اور برتری جتانے کی غرض سے مردہ فوجیوں کا تن دھڑ سے جدا کر کے ان کی کھوپڑیوں کو ٹھوکر مارتے ہوئے دور تک لے جاتے تھے۔ ان کا یہ غیر انسانی اور وحشیانہ فعل فٹبال کے آغاز کا سبب بنا۔ تاہم یہ باتیں صرف روایات اور قصّے ہیں۔
فٹبال یا اس سے ملتا جلتا کھیل سب سے پہلے برطانیہ میں شروع ہوا۔ جب کہ وہاں 1863ء میں رگبی اور فٹبال ایسوسی ایشن کا قیام عمل میں آیا۔ اکتوبر 1863ء میں لندن کے گیارہ کلبوں اور اسکول کی ٹیموں نے فٹبال کے کھیل کے اُصول و ضوابط طے کرنے کے لیے اجلاس منعقد کیا۔ اس اجلاس میں ایک فٹبال ایسوسی ایشن کا قیام عمل میں آیا۔ آٹھ سال بعد برطانیہ میں اس فٹبال ایسوسی ایشن کے 50 کلب رکن بن گئے۔ اسی سال دنیا کا پہلا فٹبال ٹورنمنٹ ایف اے کپ کے نام سے کھیلا گیا۔ یورپ کے دیگر ممالک میں فٹبال کا ابھی آغاز ہی تھا کہ برطانیہ میں فٹبال کے بین الاقوامی میچ کھیلے جانے لگے۔
1872ء میں برطانیہ اور اسکام لینڈ کے درمیان میچ کھیلا گیا۔ برطانیہ کی فٹبال ایسوسی ایشن کے طرز پر بہت جلد دیگر ممالک میں بھی فٹبال ایسوسی ایشن قائم ہونے لگے جن میں اسکاٹش فٹبال ایسوسی ایشن 1873ء، ویلز فٹبال ایسوسی ایشن 1875ء اور آئرش فٹبال ایسوسی ایشن 1880ء شامل ہیں۔
1904ء میں پیرس میں فٹبال کی عالمی تنظیم المعروف فیفا کا قیام عمل میں آیا۔ اس کے بانی سات ممالک فرانس، بیلجیئم، ڈنمارک، نیدر لینڈ، اسپین، سویڈن اور سوئٹزر لینڈ تھے۔ بعد میں اس کے رکن ممالک کی تعداد بڑھتی گئی۔
یہ تنظیم ہر چار سال میں فٹبال کے عالمی کپ کا انعقاد کرواتی ہے اور دیگر اہم بین الاقوامی مقابلے منعقد کرتی ہے۔ آج فٹبال کا کھیل یورپ، امریکا، افریقہ، ایشیا اور آسٹریلیا سمیت سبھی بر اعظموں میں مقبول ہے۔
ہندوستان میں فٹبال کی تاریخ پر سرسری نظر ڈالیں تو یہاں انگریزی دورِ اقتدار میں یہ کھیل متعارف ہوا۔ ابتدائی دور کے فٹبال میچ آرمی ٹیموں کے درمیان ہوا کرتے تھے۔ کہا جاتا ہے کہ ہندوستان میں فٹبال کے کھیل کا پہلا میچ 1854ء میں کھیلا گیا تھا۔
(سلیم اللہ کے مضمون سے اقتباسات)
